Soaps | సబ్బులు, షాంపూలు, టూత్‌పేస్ట్‌ల‌పై ఇక ఆకుప‌చ్చ‌, ఎరుపు రంగు చుక్క‌లు.. కొత్త నిబంధనలు..

Soaps | సబ్బులు, షాంపూలు, టూత్‌పేస్టులు, సౌందర్య సాధనాలు, వ్యక్తిగత సంరక్షణ ఉత్పత్తుల ప్యాకెట్లపై ఇక ప్రత్యేక రంగు గుర్తులు తప్పనిసరి కానున్నాయి. శాకాహార మూలాలతో తయారైన ఉత్పత్తులకు ఆకుపచ్చ రంగు చుక్క, శాకాహారం కాని మూలాలతో తయారైన ఉత్పత్తులకు ఎరుపు లేదా గోధుమ రంగు చుక్క ముద్రించాల్సి ఉంటుంది. ఈ గుర్తును ప్యాకెట్‌ ముందు భాగంలోని ప్రధాన ప్రదర్శన ప్రదేశం పైభాగంలో ఉంచాలని కేంద్ర వినియోగదారుల వ్యవహారాల శాఖ జారీ చేసిన సవరణ నిబంధనల్లో పేర్కొంది. కేంద్ర వినియోగదారుల వ్యవహారాలు, ఆహారం, ప్రజా పంపిణీ మంత్రిత్వ శాఖ పరిధిలోని వినియోగదారుల వ్యవహారాల శాఖ న్యాయ కొలతలు (ప్యాకేజ్డ్‌ వస్తువులు) నాలుగో సవరణ నిబంధనలు-2026ను జారీ చేసింది. ఇవి 2011 నాటి న్యాయ కొలతల‌ (ప్యాకేజ్డ్‌ వస్తువులు) నిబంధనలకు సవరణలుగా వ‌చ్చాయి. సవరించిన నిబంధనల్లో భాగంగా రూల్‌ 6లో కొత్త క్లాజ్‌ను చేర్చారు. దీని ప్రకారం సబ్బులు, షాంపూలు, టూత్‌పేస్టులు, ఇతర సౌందర్య సాధనాలు, వ్యక్తిగత వినియోగ వస్తువులపై ఈ రంగు గుర్తులను తప్పనిసరిగా ముద్రించాలి. శాకాహార మూలాలతో తయారైన ఉత్పత్తులకు ఆకుపచ్చ చుక్క, శాకాహారం కాని మూలాలతో తయారైన ఉత్పత్తులకు ఎరుపు లేదా గోధుమ చుక్క ఉండాలి.

కొత్త ప్యాకేజింగ్‌ నిబంధన ఏమిటి?

నోటిఫికేషన్‌లో రూల్‌ 6కు 6(4ఎ)(డి) అనే కొత్త క్లాజ్‌ను చేర్చారు. ప్యాకెట్‌లో తప్పనిసరిగా చూపించాల్సిన వివరాలు ఉండే ప్రధాన ప్రదర్శన ప్రదేశం పైభాగంలో ఈ రంగు చుక్కను ముద్రించాలని స్పష్టం చేశారు. సబ్బులు, షాంపూలు, టూత్‌పేస్టులతోపాటు ఇతర సౌందర్య సాధనాలు, వ్యక్తిగత సంరక్షణ ఉత్పత్తులకు కూడా ఈ నిబంధన వర్తిస్తుంది. ఈ విధానాన్ని ఎందుకు తీసుకొచ్చారనే దానిపై నోటిఫికేషన్‌లో ప్రత్యేక వివరణ ఇవ్వలేదు. కేవలం కొత్త రంగు గుర్తులను ముద్రించాల్సిన నిబంధనను మాత్రమే పేర్కొన్నారు.

ఎప్పటి నుంచి అమల్లోకి?

ఈ సవరణను తాజాగా గెజిట్‌లో ప్రచురించారు. అధికారిక గెజిట్‌లో ప్రచురించిన తేదీ నుంచే కొత్త నిబంధనలు అమల్లోకి వస్తాయని నోటిఫికేషన్‌లో పేర్కొన్నారు. అలాగే రూల్‌ 6లోని సబ్‌ రూల్‌ (8)ను కూడా ఈ సవరణలో తొలగించారు. 2009 నాటి న్యాయ కొలతల చట్టం ద్వారా కేంద్రానికి కల్పించిన అధికారాల ఆధారంగా ఈ మార్పులను తీసుకొచ్చారు.