Reliance Jio | జియో రీఛార్జ్ ధరలు 12 శాతం పెరిగే ఛాన్స్.. ఎప్పటి నుంచి అంటే?

Reliance Jio | రిలయన్స్ జియో వినియోగదారులకు త్వరలో షాక్ తగిలే అవకాశం ఉంది. రాబోయే మూడు నుంచి నాలుగు నెలల్లో జియో మొబైల్ టారిఫ్‌లను సుమారు 12 శాతం పెంచే అవ‌కాశం ఉంద‌ని బ్రోకరేజ్ సంస్థ సెంట్రమ్ బ్రోకింగ్ అంచనా వేసింది. టెలికాం సంస్థ ఆదాయ వృద్ధికి ఒక్కో వినియోగదారుడి నుంచి వచ్చే సగటు ఆదాయం (ఏఆర్‌పీయూ) పెరుగుదల కీలకంగా మారుతుందని పేర్కొంది. మరోవైపు, జియో ప్లాట్‌ఫామ్స్ ప్రారంభ పబ్లిక్ ఆఫర్ (ఐపీఓ) ద్వారా స్టాక్ మార్కెట్లలోకి ప్రవేశించేందుకు సిద్ధమవుతోంది. జియో ప్లాట్‌ఫామ్స్ అక్టోబర్ 14న రెడ్ హెర్రింగ్ ప్రాస్పెక్టస్ (ఆర్‌హెచ్‌పీ)ని దాఖలు చేసింది. ఇది ఐపీఓకు సంబంధించిన దాదాపు తుది ఆఫర్ పత్రం. ఈ ఐపీఓ అక్టోబర్ 21న ప్రారంభమై అక్టోబర్ 23న ముగియనుంది. ఈ ఆఫర్‌లో భాగంగా గరిష్ఠంగా 27 కోట్ల కొత్త షేర్లను జారీ చేయనున్నారు.

ఏఆర్‌పీయూ ఎందుకు కీలకం?

ఏఆర్‌పీయూ అంటే ఒక్కో వినియోగదారుడి నుంచి ఒక నెలలో టెలికాం సంస్థకు వచ్చే సగటు ఆదాయం. కోట్లాది మంది వినియోగదారులు ఉన్న సంస్థకు ఈ ఆదాయంలో స్వల్ప పెరుగుదల వచ్చినా మొత్తం ఆదాయంపై గణనీయమైన ప్రభావం పడుతుంది. జియో వినియోగదారుల సంఖ్య పెరగడం, డేటా వినియోగం అధికమవడం వల్ల 5జి, ఫిక్స్‌డ్ బ్రాడ్‌బ్యాండ్ సేవల కోసం చేసిన పెట్టుబడుల నుంచి మరింత ఆదాయాన్ని పొందే అవకాశం ఉందని సెంట్రమ్ బ్రోకింగ్ నివేదిక పేర్కొంది. 2026-27 ఆర్థిక సంవత్సరం తొలి త్రైమాసికంలో (ఏప్రిల్‌-జూన్‌ 2026) జియో ఏఆర్‌పీయూ రూ.208.8 నుంచి రూ.215.6కు పెరిగింది. ఇదే సమయంలో సంస్థ వినియోగదారుల సంఖ్య 53.33 కోట్లకు చేరింది. ఒక్కో వినియోగదారుడి నెలవారీ డేటా వినియోగం 37 జీబీ నుంచి 43.7 జీబీకి పెరిగింది. వినియోగదారుల సంఖ్య ఇప్పటికే భారీ స్థాయికి చేరిన నేపథ్యంలో, ఇకపై ఆదాయ వృద్ధికి ఏఆర్‌పీయూ పెరుగుదల మరింత కీలకమవుతుందని సెంట్రమ్ అభిప్రాయపడింది.

ఐపీఓకు ముందు ఆదాయ వృద్ధిపై దృష్టి..

2026-27 ఆర్థిక సంవత్సరం తొలి త్రైమాసికంలో జియో ఆదాయం ఏడాది ప్రాతిపదికన 10.8 శాతం పెరిగి రూ.34,212 కోట్లకు చేరింది. వడ్డీ, పన్నులు, తరుగుదల, రుణ విమోచనకు ముందు ఆదాయం (ఈబీఐటీడీఏ) 12.1 శాతం వృద్ధితో రూ.18,709 కోట్లకు పెరిగింది. ఈబీఐటీడీఏ మార్జిన్ గత ఏడాది 54 శాతంగా ఉండగా, ప్రస్తుతం 54.7 శాతానికి చేరింది. 2025-26 నుంచి 2028-29 ఆర్థిక సంవత్సరాల మధ్య జియో ఆదాయం ఏటా సగటున 14 శాతం, ఈబీఐటీడీఏ 16 శాతం, పన్నుల అనంతర లాభం 16 శాతం చొప్పున వృద్ధి చెందుతుంద‌ని సెంట్రమ్ అంచనా వేసింది. ప్రతిపాదిత టారిఫ్ పెంపు ఏఆర్‌పీయూ వృద్ధికి మద్దతునిస్తుందని పేర్కొంది. టెలికాం వ్యాపారంతో పాటు జియో ప్లాట్‌ఫామ్స్‌లోని ఇతర సంస్థల విలువను పరిగణనలోకి తీసుకుని, జియో ఈక్విటీ విలువను సుమారు రూ.11.5 లక్షల కోట్లుగా అంచనా వేసింది.

ఛార్జీలు పెరుగుతాయా..?

జియో టారిఫ్‌లను 12 శాతం పెంచుతున్నది సెంట్రమ్ బ్రోకింగ్ అంచనా మాత్రమే. జియో అధికారికంగా ధరల పెంపును ప్రకటించలేదు. ధరలు పెరిగితే ఒక్కో వినియోగదారుడి నుంచి వచ్చే ఆదాయం పెరిగే అవకాశం ఉన్నప్పటికీ, వినియోగదారులు ఎలా స్పందిస్తారు, పోటీ సంస్థలు ఎలాంటి నిర్ణయాలు తీసుకుంటాయి, జియో తన వినియోగదారులను ఎంతవరకు నిలుపుకోగలుగుతుంది అనే అంశాలపై వాస్తవ ప్రయోజనం ఆధారపడి ఉంటుంది.
ఈ ప్రమాదాలను జియో ప్లాట్‌ఫామ్స్ తన ఆర్‌హెచ్‌పీలోనూ ప్రస్తావించింది. 2024-25 ఆర్థిక సంవత్సరం రెండో త్రైమాసికంలో టెలికాం రంగవ్యాప్తంగా టారిఫ్‌లు పెంచినప్పుడు ఏఆర్‌పీయూ పెరిగిందని, అయితే అదే సమయంలో కొంతమంది వినియోగదారులు సేవలను వదిలివేయడం పెరిగిందని, కొత్త వినియోగదారుల వృద్ధి మందగించిందని తెలిపింది.

వ్య‌తిరేక‌త వ‌స్తే..

భవిష్యత్తులోనూ టారిఫ్‌ల పెంపునకు ధరల విషయంలో సున్నితంగా స్పందించే వినియోగదారుల నుంచి వ్యతిరేకత ఎదురయ్యే అవకాశం ఉందని సంస్థ పేర్కొంది. పోటీ సంస్థలు కూడా ధరలను పెంచకపోవచ్చని, టెలికాం రెగ్యులేటరీ అథారిటీ ఆఫ్ ఇండియా (ట్రాయ్) ధరల విషయంలో జోక్యం చేసుకునే అవకాశాన్ని కూడా తోసిపుచ్చలేమని వివరించింది. భవిష్యత్తులో టారిఫ్‌లను సవరించగలమని లేదా ధరల పెంపు తర్వాత వినియోగదారులను గణనీయంగా కోల్పోకుండా ఆ ధరలను కొనసాగించగలమని ఎలాంటి హామీ లేదని జియో తన ఆర్‌హెచ్‌పీలో పేర్కొంది. పెరుగుతున్న డేటా వినియోగం, విస్తరిస్తున్న 5జి, బ్రాడ్‌బ్యాండ్ సేవలను అధిక ఆదాయంగా మార్చుకోవడంలో జియో ఎంతవరకు విజయం సాధిస్తుందన్నది కీలకంగా మారింది. ఐపీఓ సమీపిస్తున్న నేపథ్యంలో ఏఆర్‌పీయూ వృద్ధి, ప్రతిపాదిత టారిఫ్ పెంపు జియో పెట్టుబడి ఆకర్షణను నిర్ణయించే ప్రధాన అంశాలుగా నిలవనున్నాయి.