Penguin | సోష‌ల్ మీడియాలో వైర‌ల్ అవుతున్న పెంగ్విన్ వీడియో.. అస‌లేంటి విష‌యం..?

Penguin | మొదట చూసినప్పుడు అది పెద్దగా సంచలనం కలిగించే దృశ్యం కాదు. విస్తారమైన మంచు ప్రదేశంలో, తన కాలనీకి దూరంగా నడుచుకుంటూ వెళ్తున్న ఒక చిన్న పెంగ్విన్ మాత్రమే. కానీ ఇప్పుడు అదే వీడియో సోషల్ మీడియాలో తిరిగి వైరల్ అవుతూ, అసలు ఉద్దేశానికి మించిన అర్థాలను సంతరించుకుంది. ఈ క్లిప్‌ను ఇప్పుడు నెటిజన్లు నిహిలిస్ట్ పెంగ్విన్ (Nihilist Penguin) అంటూ పిలుస్తున్నారు. అంటార్కిటికాలోని అడెలీ (Adélie) జాతికి చెందిన ఒక పెంగ్విన్ తన గుంపును, సముద్రాన్ని వదిలి లోపలికి, మంచు ప్రాంతాల వైపు నడిచిపోతున్న దృశ్యమే ఈ వీడియోలో కనిపిస్తోంది. ఇది కొత్త వీడియో కాదు. ఏళ్ల క్రితం విడుదలైన ఓ డాక్యుమెంటరీ నుంచి తీసుకున్న భాగం ఇది. అయితే తాజాగా దీనికి వచ్చిన విపరీతమైన ఆదరణ, ప్రజలు దీనికి ఆపాదిస్తున్న భావోద్వేగాలే దీనిని ప్రత్యేకంగా మార్చాయి. ఒంటరితనం, అలసట, జీవితంపై నిరాశ, గుంపు నుంచి దూరంగా వెళ్లాలనే భావన.. ఇలా అనేక అర్థాలను నెటిజన్లు ఈ నిశ్శబ్ద దృశ్యంపై రుద్దుతున్నారు.

డాక్యుమెంట‌రీలోని క్లిప్‌..

సాధారణంగా పెంగ్విన్లు గుంపుగా జీవించే జీవులు. కల‌సి వలస వెళ్లడం, కల‌సి ఆహారం వెతకడం, ఒకరినొకరు రక్షించుకోవడం వీటి సహజ లక్షణం. అలాంటి జంతువు ఒక్కసారిగా ఒంటరిగా వేరే దారి పట్టడం చాలామందికి అసహజంగా, కలవరపెట్టేలా అనిపించింది. అందుకే ఈ వీడియోను చాలామంది మానసిక అలసటకు, సమాజం నుంచి నెమ్మ‌దిగా దూరమయ్యే మనిషి మనస్థితికి ప్రతీకగా భావిస్తూ షేర్ చేస్తున్నారు. వీడియోలో ఎలాంటి వివరణ లేకపోవడంతో, ప్రతి ఒక్కరూ తమ భావాలకు తగ్గట్టుగా అర్థం చెబుతున్నారు. అదే ఈ క్లిప్ మరింత వైరల్ కావడానికి కారణమైంది. ఈ దృశ్యం 2007లో ప్రముఖ దర్శకుడు వెర్నర్ హెర్జాగ్ రూపొందించిన Encounters at the End of the World అనే డాక్యుమెంటరీ నుంచి తీసుకున్నది. అందులో పెంగ్విన్ మొదట తన కాలనీ దగ్గర నిలబడి, మిగతావన్నీ సముద్రం వైపు వెళ్లగా, తాను మాత్రం లోపలికి నడవడం ప్రారంభిస్తుంది. ముందున్నది ఖాళీ మంచు భూమి, కొండలు, ఎలాంటి ఆహారం లేదు, ఆశ్రయం లేదు. అయినా అది వెనక్కి తిరగకుండా నిశ్చలంగా ముందుకు సాగుతుంది. హెర్జాగ్ వ్యాఖ్యానం ప్రకారం, ఆ దారి పెంగ్విన్ జీవించడానికి అనుకూలమైనది కాదు. అది ముందుకు వెళ్లితే తిరిగి వచ్చే అవకాశాలు చాలా తక్కువ. కానీ కెమెరా ఎక్కువసేపు అనుసరించదు. దృశ్యం అలాగే అర్థాంతరంగా ముగిసింది.

ట్రంప్ క్రియేష‌న్‌పై విమ‌ర్శ‌లు..

ఇటీవల ఈ మీమ్ మరింత ప్రాచుర్యం పొందడానికి అమెరికా వైట్ హౌస్ చేసిన ఓ సోషల్ మీడియా పోస్ట్ కూడా కారణమైంది. అమెరికా అధ్యక్షుడు డొనాల్డ్ ట్రంప్ ఒక పెంగ్విన్‌తో పాటు నడుస్తూ, ఆ పెంగ్విన్ అమెరికా జెండా పట్టుకున్నట్లుగా ఏఐతో క్రియేట్ చేసిన చిత్రాన్ని వైట్ హౌస్ షేర్ చేసింది. ఈ ఫోటో వైరల్ అయినప్పటికీ, దీనిపై విమర్శలు కూడా వెల్లువెత్తాయి. పెంగ్విన్లు ఆర్కిటిక్‌లో ఉండవని, పాదముద్రలు ఒకేలా ఉండటం వంటి సాంకేతిక లోపాలను నెటిజన్లు గుర్తించారు. అంతేకాదు, ట్రంప్ గతంలో గ్రీన్‌ల్యాండ్ గురించి చేసిన వ్యాఖ్యలతో ఈ ఫోటోను జతచేసి రాజకీయ కోణంలోనూ చర్చ మొదలైంది. దీంతో అసలు పెంగ్విన్ వీడియోకి ఉన్న నిశ్శబ్ద భావన కాస్తా మసకబారిపోయింది.

భావోద్వేగాల కోణంలో చూడొద్దు..

విజ్ఞానశాస్త్రవేత్తలు మాత్రం ఈ వీడియోను భావోద్వేగాల కోణంలో చూడడం సరికాదని చెబుతున్నారు. అడెలీ పెంగ్విన్లు సాధారణంగా సముద్ర తీరానికి దగ్గరే ఉంటాయి, అక్కడే ఆహారం, ప్ర‌త్యుత్ప‌త్తి ప్రాంతాలు ఉంటాయి. లోపలికి వెళ్లడం చాలా అరుదు. అలాంటి సందర్భాల్లో కొన్ని కారణాలు ఉండొచ్చని పరిశోధకులు చెబుతున్నారు. యువ పెంగ్విన్లు దారి తప్పడం, అనారోగ్యం లేదా గాయాల వల్ల దిశా జ్ఞానం కోల్పోవడం, లేదా ఇత‌ర కార‌ణాల వ‌ల్ల కూడా అరుదుగా జరిగే అన్వేషణ ప్రవర్తన కావచ్చని వారు వివరిస్తున్నారు. ఇవన్నీ కార‌ణాలే తప్ప, ఏదైనా ఆత్మహత్యా యాత్ర లేదా భావోద్వేగ నిర్ణయం కాదని స్పష్టం చేస్తున్నారు. క‌నుక ఆ పెంగ్విన్ గురించి ఇష్టం వ‌చ్చిన‌ట్లు ఊహించుకుని ప్ర‌క‌ట‌న‌లు చేయ‌వ‌ద్ద‌ని వారు కోరుతున్నారు.