Software Engineer Noodle Stall | “సాఫ్ట్‌వేర్ జాబ్ బోరింగ్ బాస్”.. లక్షల ప్యాకేజీ వదిలేసి గర్ల్‌ఫ్రెండ్‌తో కలిసి నూడుల్స్ అమ్ముకుంటున్న ‘మెటా’ టెకీ

Software Engineer Noodle Stall | త్రినేత్ర.న్యూస్ : ప్రపంచంలోని టాప్ టెక్ కంపెనీల్లో ఒకటైన 'మెటా' (Meta)లో జాబ్ వస్తే లైఫ్ సెటిల్ అయినట్లే అని చాలామంది అనుకుంటారు. కానీ, ఆల్విన్ టాన్ (Alvin Tan) అనే సాఫ్ట్‌వేర్ ఇంజనీర్ మాత్రం అందుకు భిన్నంగా ఆలోచించాడు. లక్షల రూపాయల జీతాన్ని కాదని, సింగపూర్‌లో తన గర్ల్‌ఫ్రెండ్‌తో కలిసి ఓ చిన్న నూడుల్స్ స్టాల్ (Noodle stall) పెట్టుకున్నాడు. ఈ నిర్ణయం వెనుక ఉన్న అసలు కారణం ఇప్పుడు సోషల్ మీడియాలో వైరల్‌గా మారింది.

సాఫ్ట్‌వేర్ ఇంజనీరింగ్ చాలా బోరింగ్!

ఆర్థిక విషయాలపై కంటెంట్ క్రియేట్ చేసే లూయిసా టే.. ఆల్విన్‌ను ఇన్‌స్టాగ్రామ్ కోసం ఇటీవల ఇంటర్వ్యూ చేసింది. ఆ వీడియోలో ఎవరైనా కలలు కనే మెటా ఉద్యోగాన్ని ఎందుకు వదిలేశావని అడిగినప్పుడు.. "ఎందుకంటే సాఫ్ట్‌వేర్ ఇంజనీరింగ్ చాలా బోరింగ్" అని నవ్వుతూ బదులిచ్చాడు ఆల్విన్. ఆ ఉద్యోగంలో హోదా, లక్షల్లో ప్యాకేజీ ఉన్నప్పటికీ, రోజూ ఒకే రకమైన పని చేయడం తనకు ఏమాత్రం సంతృప్తినివ్వలేదని చెప్పుకొచ్చాడు.

డబ్బు కంటే ప్యాషన్‌కే ఇంపార్టెన్స్

మెటాలో ఉన్నప్పుడు తాను ఇప్పుడు సంపాదిస్తున్న దానికంటే రెండు, మూడు రెట్లు ఎక్కువ జీతం తీసుకునేవాడినని ఆల్విన్ తెలిపాడు. అయినప్పటికీ, డబ్బు కంటే తనకు ఇష్టమైన పని చేయడానికే ఓటు వేశాడు. ప్రస్తుతం అతని జీవితం సింగపూర్, ఆగ్నేయాసియాలో ఎంతో ఫేమస్ అయిన 'హోకియన్ మీ' (Hokkien Mee) నూడుల్స్ తయారు చేయడం, వడ్డించడం చుట్టూనే తిరుగుతోంది. ఈ వ్యాపారంలో అతని గర్ల్‌ఫ్రెండ్ కూడా ప్రధాన భాగస్వామిగా సాయం చేస్తోంది. ఇతర సిబ్బందిని పెట్టుకునే ఆర్థిక స్థోమత ప్రస్తుతానికి లేకపోవడంతో, ఆమె ఇస్తున్న మద్దతు ఎంతో కీలకమని ఆల్విన్ కృతజ్ఞతలు తెలిపాడు.

టెక్ ఇండస్ట్రీలో లేఆఫ్స్ టెన్షన్

కేవలం వ్యక్తిగత సంతృప్తి కోసమే కాకుండా.. టెక్ ఇండస్ట్రీలో ఉన్న అనిశ్చితి కూడా తన నిర్ణయానికి ఒక ప్రధాన కారణమని ఆల్విన్ వివరించాడు. మెటాలో ఉన్నప్పుడు ఎన్నోసార్లు టీమ్ రీస్ట్రక్చరింగ్ (Team restructuring), భారీగా జరిగిన లేఆఫ్స్ (Layoffs) చూడటం తనను ఆలోచింపజేసిందన్నాడు. కార్పొరేట్ కెరీర్‌ను వదిలేయడాన్ని ఒక రిస్క్ లా కాకుండా, కొత్త అవకాశంగా భావిస్తున్నట్లు చెప్పాడు.

కెరీర్ మార్పు గురించి ఆలోచించే వారికి అతను ఒక సలహా ఇచ్చాడు. "ఏదైనా నిర్ణయం తీసుకునే ముందు తొందరపడొద్దు. ఒకవేళ ఈ వ్యాపారం వర్కౌట్ కాకపోయినా, నాకు వేరే ఆప్షన్స్ ఎప్పుడూ ఉంటాయి. కానీ ఏ వ్యాపారం కోసమూ మన ఆరోగ్యాన్ని బలిపెట్టకూడదు" అని సూచించాడు.

ఏఐ (AI) ఏమీ చేయలేదు

డబ్బు కంటే ప్యాషన్‌కు విలువనిచ్చిన ఆల్విన్ నిర్ణయాన్ని నెటిజన్లు తెగ మెచ్చుకుంటున్నారు. ముఖ్యంగా ప్రస్తుత ఏఐ (AI) యుగంలో ఒక యూజర్ చేసిన కామెంట్ హైలైట్‌గా నిలిచింది. "సాఫ్ట్‌వేర్ ఇంజనీర్‌ను ఏఐ (AI) రీప్లేస్ చేయగలదు కానీ.. ఒక నూడుల్స్ వండే వాడిని ఏమీ చేయలేదు" అంటూ సరదాగా స్పందించారు. "అంత ఎత్తుకు ఎదిగి కూడా సింపుల్‌గా ఆలోచిస్తున్న మీ మైండ్‌సెట్ మీకు తప్పక విజయాన్ని అందిస్తుంది" అని మరొకరు కామెంట్ చేశారు.

 

View this post on Instagram

 

A post shared by Louisa | Investments ✨ (@louisatay)