Telangana Police | షూటింగ్‌లో తెలంగాణ పోలీసుల జోరు.. విజేత‌ల‌కు డీజీపీ అభినంద‌న

రాష్ట్ర, సౌత్‌జోన్‌ పోటీల్లో 15 పతకాలు
6 స్వర్ణాలు.. 4 రజతాలు.. 5 కాంస్యాలు

Telangana Police | త్రినేత్ర‌.న్యూస్ : షూటింగ్‌ క్రీడల్లో తెలంగాణ పోలీసు సిబ్బంది సత్తా చాటారు. రాష్ట్ర, సౌత్‌జోన్‌ స్థాయి పోటీల్లో కలిపి 6 స్వర్ణాలు, 4 రజతాలు, 5 కాంస్యాలతో మొత్తం 15 పతకాలు సాధించారు. మంగళవారం డీజీపీ కార్యాలయంలో విజేతలను డీజీపీ సీవీ ఆనంద్‌ అభినందించారు. క్రీడల్లోనూ ప్రతిభ కనబరుస్తూ పోలీసు శాఖకు పేరు తీసుకురావడం అభినందనీయమని పేర్కొన్నారు. రాబోయే జాతీయ, అంతర్జాతీయ పోటీల్లో మరిన్ని విజయాలు సాధించాలని ఆకాంక్షించారు.

రాష్ట్ర స్థాయి పోటీల్లో 11 పతకాలు

12వ తెలంగాణ రాష్ట్ర షూటింగ్‌ ఛాంపియన్‌షిప్‌–2026 జూన్‌ 20 నుంచి 28 వరకు హైదరాబాద్‌ గచ్చిబౌలిలోని హెచ్‌సీయూ, సాట్‌జీ షూటింగ్‌ రేంజ్‌లో జరిగింది. రైఫిల్‌, పిస్టల్‌ విభాగాల్లో తెలంగాణ పోలీసు షూటర్లు 4 స్వర్ణాలు, 3 రజతాలు, 4 కాంస్యాలు సాధించారు. 13వ బెటాలియన్‌ టీజీఎస్పీకి చెందిన పీసీ 1304 జి. నిరంజన్‌రెడ్డి 50 మీటర్ల పిస్టల్‌లో స్వర్ణం, 25 మీటర్ల స్టాండర్డ్‌ పిస్టల్‌, 10 మీటర్ల ఎయిర్‌ పిస్టల్‌లో రజతాలు సాధించారు. డిజి టెక్నికల్‌ సర్వీసెస్‌కు చెందిన ఇన్‌స్పెక్టర్‌ ఎ. ప్రసన్నకుమార్‌ 50 మీటర్ల పిస్టల్‌ మాస్టర్‌ విభాగంలో స్వర్ణం, 25 మీటర్ల సెంటర్‌ ఫైర్‌ పిస్టల్‌లో కాంస్యం సాధించారు. ఫ్యూచర్‌సిటీ లో పని చేస్తున్న ఇన్‌స్పెక్టర్‌ బి. జేమ్స్‌బాబు రజతం, కాంస్య పతకాలు సాధించారు. వరంగల్‌ కమిషనరేట్ పరిధిలో పనిచేస్తున్న వాసీ వి. సువర్ణ 50 మీటర్ల రైఫిల్‌ ప్రోన్‌లో స్వర్ణం దక్కించుకున్నారు. సీఎస్‌డబ్ల్యూ హైదరాబాద్‌ సీఐ బి. శంకర్‌ 25 మీటర్ల స్టాండర్డ్‌ పిస్టల్‌ మాస్టర్‌ విభాగంలో స్వర్ణం సాధించారు.

సౌత్‌జోన్‌లో 4 పతకాలు

17వ సౌత్‌జోన్‌ షూటింగ్‌ ఛాంపియన్‌షిప్‌–2026 ఆగస్టు 31 నుంచి సెప్టెంబరు 8 వరకు కేరళలోని తిరువనంతపురంలో నిర్వహించారు. తెలంగాణ పోలీసు షూటర్లు 2 స్వర్ణాలు, ఒక రజతం, ఒక కాంస్యం సాధించారు. 3వ బెటాలియన్‌ టీజీఎస్పీకి చెందిన జి. నిరంజన్‌రెడ్డి 50 మీటర్ల ఫ్రీ పిస్టల్‌, 25 మీటర్ల సెంటర్‌ ఫైర్‌ పిస్టల్‌లో రెండు స్వర్ణాలు, 25 మీటర్ల స్టాండర్డ్‌ పిస్టల్‌లో రజతం సాధించారు. ఫ్యూచర్‌సిటీ ఐటీ సెల్‌కు చెందిన ఇన్‌స్పెక్టర్‌ బి. జేమ్స్‌బాబు కాంస్య పతకం సాధించారు.