ACB Raids | హెచ్ఎండీఏ చీఫ్ ఇంజినీర్ నివాసంపై ఏసీబీ దాడులు..

ACB Raids | త్రినేత్ర‌.న్యూస్‌: ప్ర‌భుత్వ ఉద్యోగాన్ని అడ్డుగా పెట్టుకుని అక్ర‌మాస్తులు కూడ‌బెడుతున్న అధికారులకు ఏసీబీ (ACB) ముచ్చెమ‌ట‌లు ప‌ట్టిస్తున్న‌ది. వ‌రుస‌గా దాడులు (ACB Raids) నిర్వ‌హిస్తూ వంద‌ల కోట్ల‌లో ఆస్తుల‌ను బ‌య‌ట‌పెడుతున్న‌ది. ఇదేక్ర‌మంలో హైద‌రాబాద్ మెట్రోపాలిట‌న్ డెవ‌ల‌ప్‌మెంట్ అథారిటీ (HMDA) చీఫ్ ఇంజినీర్ బచ్చు రవీందర్ (B.Ravinder) ఆస్తుల‌పై ఏసీబీ అధికారులు దాడులు నిర్వ‌హించారు. నాన‌క్‌రామ్‌గూడ‌లోని ర‌వీంద‌ర్ (HMDA Chief Engineer) ఇంటితోపాటు కార్యాల‌యాల్లో సోదాలు చేస్తున్నారు. ఏసీబీ డీఎస్పీ మాజిద్ అలీఖాన్ నేతృత్వంలో ర‌వీంద‌ర్ ఇండ్ల‌తోపాటు బంధువులు, కుటుంబ స‌భ్యు నివాసాలు.. మొత్తం 15 చోట్ల ఏక‌కాలంలో తనిఖీలు చేస్తున్నారు. ఇప్ప‌టికే ర‌వీంద‌ర్ ఇంట్లో భారీగా నోట్ల క‌ట్ట‌లు, ఆస్తి ప‌త్రాలు గుర్తించిన‌ట్లు స‌మాచారం.

గ‌తంలో హెచ్ఎండీఏ టౌన్ ప్లానింగ్ మాజీ డైరెక్ట‌ర్ శివ‌బాల‌కృష్ణ ఇంట్లో ఏసీబీ అధికారులు సోదాలు నిర్వ‌హించిన విష‌యం తెలిసిందే. ఈ సంద‌ర్భంగా వంద‌ల కోట్ల‌లో అక్ర‌మాస్తుల‌ను అధికారులు గుర్తించారు. ఇటీవ‌ల డీఎస్సీ భీమ్‌రెడ్డి పై నిర్వ‌హించిన దాడుల్లో సుమారు రూ.10.12 కోట్ల విలువైన ఆస్తులు, పెట్టుబ‌డులు, బంగారు న‌గ‌లు, న‌గ‌దు బ‌య‌ట‌ప‌డ్డాయి.