Tiger Shroff Attackers Arrested Kota | టైగర్ ష్రాఫ్ కారుపై కాల్పులు.. రాజస్థాన్‌లో దొరికిపోయిన ముగ్గురు షూటర్లు

Tiger Shroff Attackers Arrested Kota | త్రినేత్ర న్యూస్ : బాలీవుడ్ ప్రముఖ నటుడు టైగర్ ష్రాఫ్ కారుపై ముంబైలో జరిగిన కాల్పుల ఘటన దేశవ్యాప్తంగా సంచలనం సృష్టించింది. ఈ కేసుకు సంబంధించి ఆదివారం రాత్రి దాడికి పాల్పడిన ప్రధాన నిందితులను సోమవారం రాజస్థాన్‌లోని కోటా రైల్వే స్టేషన్‌లో పోలీసులు అత్యంత నాటకీయరీతిలో అరెస్ట్ చేశారు. ముంబై పోలీసులు, రాజస్థాన్ యాంటీ గ్యాంగ్‌స్టర్ టాస్క్ ఫోర్స్ (AGTF) సంయుక్త ఆపరేషన్‌తో ఈ దాడికి పాల్పడిన నిందితులను క్షణాల వ్యవధిలో పట్టుకోగలిగారు.

ఆదివారం సాయంత్రం ఏం జరిగింది?

ఆదివారం (అక్టోబర్ 18, 2026) సాయంత్రం ముంబైలోని జుహు ప్రాంతంలో టైగర్ ష్రాఫ్ ప్రయాణిస్తున్న కారును లక్ష్యంగా చేసుకుని ముగ్గురు దుండగులు కాల్పులకు తెగబడ్డారు. ఈ ప్రమాదంలో అదృష్టవశాత్తు టైగర్ ష్రాఫ్ ఎలాంటి గాయాలు లేకుండా క్షేమంగా బయటపడ్డారు. అయితే ఆయన కారు డ్రైవర్, మరో వ్యక్తికి గాయాలయ్యాయి. ష్రాఫ్ ప్రతి ఆదివారం జుహు ఫుట్‌బాల్ గ్రౌండ్‌కు వెళ్లే రొటీన్‌ను పక్కాగా రెక్కీ (Recce) నిర్వహించి, ఆయన కారు వెళ్లే సమయంలో ఈ దాడికి పాల్పడినట్లు పోలీసులు గుర్తించారు.

కోటాలో రైలులో పరుగు.. 15 నిమిషాల్లో ట్రాప్

కాల్పుల అనంతరం నిందితులు ఎస్‌వీ రోడ్డు మీదుగా అంధేరి వెస్ట్ రైల్వే స్టేషన్ వద్ద బైక్‌ను వదిలేసి, బోరివలి వైపు వెళ్లే రైలు ఎక్కారు. అక్కడి నుంచి గుజరాత్ మీదుగా రాజస్థాన్ వైపు పారిపోయేందుకు ప్రయత్నించారు. అయితే, ముంబై పోలీసులు అందించిన పక్కా సమాచారంతో కోటా సిటీ పోలీసులు అప్రమత్తమయ్యారు. పుణె-జైపూర్ ఎక్స్‌ప్రెస్ రైలులో నిందితులు వస్తున్నారనే సమాచారం అందుకున్న పోలీసులు.. కేవలం 15 నిమిషాల్లోనే కోటా స్టేషన్‌లో భారీ వలపన్ని రైలును తనిఖీ చేసి ముగ్గురు నిందితులను అదుపులోకి తీసుకున్నారు.

కోటా ఎస్పీ తేజస్విని గౌతమ్ మీడియాతో మాట్లాడుతూ.. అరెస్టయిన నిందితులను హర్యానాలోని సోనిపట్‌కు చెందిన రెహాన్ అలియాస్ సుక్కా (18), బీహార్‌లోని బెగుసరాయ్‌కు చెందిన, గత కొన్నేళ్లుగా ముంబైలో ఉంటున్న హ్రితిక్ కుర్మి అలియాస్ రోషన్ (22), అలాగే 17 ఏళ్ల మైనర్‌గా గుర్తించినట్లు తెలిపారు. త్వరలోనే వీరిని ముంబై పోలీసులకు అప్పగించనున్నట్లు ఆమె వెల్లడించారు. మహారాష్ట్ర ముఖ్యమంత్రి దేవేంద్ర ఫడ్నవీస్ కూడా ఈ ఆపరేషన్ విజయవంతం కావడంపై స్పందిస్తూ, ఇరు రాష్ట్రాల పోలీసుల సమన్వయంతోనే నిందితులు పట్టుబడ్డారని తెలిపారు.

లారెన్స్ బిష్ణోయ్ గ్యాంగ్ ప్రమేయం?

ఈ దాడుల వెనుక లారెన్స్ బిష్ణోయ్ గ్యాంగ్ హస్తం ఉందని సోషల్ మీడియాలో ఒక పోస్ట్ వైరల్ అయినప్పటికీ, పోలీసులు దీనిపై ఇంకా అధికారికంగా ధృవీకరించలేదు. క్రైమ్ బ్రాంచ్ (Crime Branch) అధికారులు ఈ కోణంలోనూ దర్యాప్తును ముమ్మరం చేశారు.

'బుల్లెట్లకు బుల్లెట్లతోనే బదులిస్తాం' - ఏక్‌నాథ్ షిండే హెచ్చరిక

ఘటన జరిగిన వెంటనే మహారాష్ట్ర డిప్యూటీ సీఎం ఏక్‌నాథ్ షిండే బాంద్రాలోని టైగర్ ష్రాఫ్ నివాసానికి వెళ్లి ఆయనను, కుటుంబ సభ్యులను పరామర్శించారు. ముంబైలో గ్యాంగ్‌స్టర్ల అరాచకాలను ఎట్టి పరిస్థితుల్లోనూ సహించేది లేదని ఆయన హెచ్చరించారు. 1990లలో గ్యాంగ్‌వార్‌లను ఏవిధంగానైతే అణచివేశామో, ఇప్పుడు కూడా అదే రీతిలో వారి వేర్లను తుడిచిపెట్టే సమయం వచ్చిందని షిండే స్పష్టం చేశారు. "ఇది కంటికి కన్ను, బుల్లెట్లకు బుల్లెట్లతో బదులిచ్చే సమయం" అంటూ ఆయన తీవ్ర స్థాయిలో హెచ్చరించారు.

#WATCH | Kota, Rajasthan: Three accused, including a minor, have been apprehended by Kota Police in connection with the firing on Bollywood actor Tiger Shroff

SP Tejaswani Gautam said the accused, Rehan alias Sukka of Haryana, Hritik Kurmi alias Roshan of Bihar, and a minor, will be handed over to Mumbai Police.

— ANI (@ANI) October 19, 2026