Ranveer Singh | రూ.10 కోట్లు ఇవ్వండి.. ర‌ణ్‌వీర్ సింగ్‌కు బిష్ణోయ్ గ్యాంగ్ బెదిరింపులు

Ranveer Singh | గ్యాంగ్‌స్ట‌ర్ బిష్ణోయ్ గ్యాంగ్ (Bishnoi gang) నుంచి బాలీవుడ్ స్టార్ న‌టుడు రణ్ వీర్ సింగ్ (Ranveer Singh)కు మ‌రోసారి బెదిరింపులు వ‌చ్చాయి. రూ.10 కోట్లు డిమాండ్ చేస్తూ హ‌రి బాక్స‌ర్ అనే వ్య‌క్తి న‌టుడికి వాయిస్ నోట్ పంపాడు. అమెరికాలో రిజిస్ట‌ర్ అయిన ఫోన్ నెంబ‌ర్ (American number) నుంచి ఈ వాయిస్ నోట్ వ‌చ్చిన‌ట్లుగా తెలుస్తోంది. ఈ బెదిరింపుల‌పై ముంబై క్రైమ్ బ్రాంచ్ పోలీసులు (Mumbai Crime Branch Police) కేసు న‌మోదు చేసి ద‌ర్యాప్తు చేస్తున్నారు. నెంబర్‌కు సంబంధించిన వివరాలు కోసం అమెరికా అధికారులను సంప్రదించినట్టు తెలుస్తోంది.

కాగా, వారం రోజుల క్రితం కూడా హ‌రి బాక్స‌ర్ (Harry Boxer) నుంచి ర‌ణ్‌వీర్ సింగ్‌కు బెదిరింపులు వ‌చ్చిన విష‌యం తెలిసిందే. "రణ్‌వీర్ సింగ్.. మీ త‌ర్వాతి ఏడు త‌రాలు గుర్తించుకునేలా నీకు బుద్ధి చెబుతాం. సలహాలు ఇవ్వడం, వెళ్లి పోలీస్ స్టేషన్‌లో ఫిర్యాదు చేయమని ప్రజలకు సూచించ‌డం నీకు బాగా అలవాటుగా మారింది. సరే అయితే, నువ్వు కూడా ఫిర్యాదు చేశావు. ఇబ్బందేమీ లేదు. ఇది మాత్రం జాగ్ర‌త్త‌గా విను. నీ ద‌గ్గ‌ర ప‌నిచేసే ప్ర‌తి మేనేజ‌ర్‌, ప్ర‌తి వ్య‌క్తికి సంబంధించిన పూర్తి వివ‌రాలు మా ద‌గ్గ‌ర ఉన్నాయి. వారు ఎక్క‌డ నివ‌సిస్తున్నారు, ఎప్పుడు ఆఫీస్‌కు వ‌స్తారు, ఎప్పుడు వెళ్లిపోతారు, వారి కుటుంబ స‌భ్యులు ఎవ‌రు.. ఇలా ప్ర‌తీ స‌మాచారం మా ద‌గ్గర ఉంది. మేము నేరుగా నిన్ను ఏమీ చెయ్యం. నీ కింద ప‌నిచేసే వాళ్ల నుంచి మొద‌లు పెడ‌తాం. వారంద‌రినీ చంపేస్తాం. అప్పుడు నీకు బుద్ధివ‌స్తుంది. మేం ప‌ని మొద‌లు పెట్టేలోపే మేలుకో" అంటూ అందులో హెచ్చ‌రించాడు. ఇదే హెచ్చ‌రిక‌లు ప్రముఖ దర్శకుడు రోహిత్ శెట్టి (Rohit Shetty)కి కూడా వ‌ర్తిస్తాయిన అందులో పేర్కొన్నాడు. ఇప్పుడు ర‌ణ్‌వీర్‌సింగ్‌కు మ‌రోసారి బెదిరింపులు రావ‌డం బాలీవుడ్‌లో తీవ్ర క‌ల‌క‌లం రేపుతోంది.