Dapagliflozin | మ‌ధుమేహ చికిత్స‌కు కొత్త జ‌న‌రిక్ వెర్ష‌న్ ఔష‌ధం.. ఆమోదించిన అమెరికా ఎఫ్‌డీఏ..

Dapagliflozin | మధుమేహ చికిత్సలో ఓ కీలక పరిణామం చోటు చేసుకుంది. జైడ‌స్ లైఫ్ సైన్సెస్ త‌న డాపాగ్లిఫ్లోజిన్ టాబ్లెట్ల జనరిక్ వెర్షన్‌కు అమెరికా ఫుడ్ అండ్ డ్ర‌గ్ అడ్మినిస్ట్రేష‌న్ నుంచి తుది అనుమతి పొందింది. ఈ ఔషధం 5 మిల్లీగ్రాములు, 10 మిల్లీగ్రాముల‌ మోతాదుల్లో అందుబాటులో ఉంటుంది. టైప్ 2 డ‌యాబెటిస్‌తో బాధపడుతున్నరిలో రక్తంలో చక్కెర స్థాయిలను నియంత్రించేందుకు, ఆహారం, వ్యాయామంతోపాటు ఈ మందును సూచిస్తారు. అలాగే ఈ ఔషధాన్ని అమెరికాలో మార్కెటింగ్‌ చేయడానికి కంపెనీకి 180 రోజుల పాటు షేర్డ్ జనరిక్ మార్కెటింగ్ ఎక్స్‌క్లూజివిటీ కూడా లభించింది.

ఏంటా మెడిసిన్..

డాపాగ్లిఫ్లోజిన్ ఇటీవల సంవత్సరాల్లో మధుమేహ చికిత్సను మార్చిన ఔషధాల వర్గంలో చోటు సాధించింది. ఇది కేవలం రక్తంలో చక్కెరను తగ్గించడం మాత్రమే కాకుండా, గుండె, మూత్రపిండాల ఆరోగ్యానికి కూడా ప్రయోజనాలను అందిస్తుంది. భారత్‌తోపాటు ప్రపంచవ్యాప్తంగా టైప్ 2 డ‌యాబెటిస్‌ వేగంగా పెరుగుతున్న నేపథ్యంలో ఈ మందుల పని విధానం, ప్రాధాన్యతను అర్థం చేసుకోవడం రోగులు, సంరక్షకులకు ఆవ‌శ్య‌కంగా మారింది. డాపాగ్లిఫ్లోజిన్ SGLT2 ఇన్హిబిటర్స్ (సోడియం-గ్లూకోజ్ కో-ట్రాన్స్‌పోర్టర్ 2 ఇన్హిబిటర్స్) అనే ఔషధాల వర్గానికి చెందుతుంది. ఈ మందులు మూత్రపిండాల ద్వారా అధిక గ్లూకోజ్‌ను మూత్రం ద్వారా బయటకు పంపించడంలో సహాయపడతాయి.

అద‌న‌పు ప్ర‌యోజ‌నాలు..

నేష‌న‌ల్ ఇనిస్టిట్యూట్ ఆఫ్ డ‌యాబెటిస్ అండ్ డైజెస్టివ్ కిడ్నీ డిసీజ్ తెలిపిన ప్రకారం ఈ మందును ఇవ్వ‌డం వ‌ల్ల‌ ఇన్సులిన్‌పై ఆధారపడకుండా రక్తంలో చక్కెరను తగ్గించుకోవ‌చ్చు. అందువల్ల ఇన్సులిన్ రెసిస్టెన్స్ ఉన్నవారికి కూడా ఇది మరింత ఉపయోగకరంగా ఉంటుంది. ఆధునిక మధుమేహ చికిత్సలో కేవలం చక్కెర నియంత్రణ మాత్రమే కాకుండా, అనుబంధ సమస్యలను తగ్గించడం కూడా ముఖ్యంగా మారింది. ప్రపంచ ఆరోగ్య సంస్థ (WHO) తెలిపిన ప్ర‌కారం మధుమేహం గుండె వ్యాధులు, మూత్రపిండాల నష్టానికి కార‌ణ‌మ‌వుతోంది. ఈ నేపథ్యంలో డాపాగ్లిఫ్లోజిన్ కొన్ని అదనపు ప్రయోజనాలను అందిస్తుంది. గుండె ఆరోగ్యాన్ని మెరుగుపరచడం ద్వారా హార్ట్ ఫెయిల్యూర్ ప్రమాదాన్ని తగ్గించడంతోపాటు, క్రానిక్ కిడ్నీ డిసీజ్ రావ‌డాన్ని ఆల‌స్యం చేస్తుంది. అలాగే బరువు, రక్తపోటు తగ్గుదల వంటి ప్రయోజనాలు ఉన్నాయని అధ్యయనాలు సూచిస్తున్నాయి. నేష‌న‌ల్ సెంట‌ర్ ఫ‌ర్ బ‌యో టెక్నాల‌జీ ఇన్ఫ‌ర్మేష‌న్‌లో ప్రచురితమైన క్లినికల్ ట్రయల్స్ కూడా ఈ వివ‌రాల‌ను వెల్ల‌డించాయి.

భార‌త్‌లోనే త‌యారీ..

ఈ ఔషధాన్ని అహ్మదాబాద్‌లోని తయారీ కేంద్రంలో తయారు చేయనున్నట్లు కంపెనీ తెలిపింది. డాపాగ్లిఫ్లోజిన్ టాబ్లెట్లు అమెరికాలో సంవత్సరానికి 10.2 బిలియన్ డాలర్ల అమ్మకాలను నమోదు చేశాయని వెల్లడించింది, ఇది ప్రపంచవ్యాప్తంగా ఈ మందుకు ఉన్న డిమాండ్‌ను సూచిస్తోంది. కాగా అమెరికా ఇచ్చిన ఈ అనుమతి ద్వారా 180 రోజుల పాటు షేర్డ్ ఎక్స్‌క్లూజివిటీ లభించడం వల్ల పరిమిత పోటీ న‌డుమ‌ ఈ జనరిక్ వెర్షన్‌ను మార్కెటింగ్‌ చేయడానికి అవకాశం ఉంటుంది. దీని వల్ల ముఖ్యంగా దీర్ఘకాలిక వ్యాధి అయిన మధుమేహ చికిత్స ఖర్చు తగ్గి, మరింత మందికి అందుబాటులోకి వచ్చే అవకాశం ఉంటుంది.

టైప్ 2 డ‌యాబెటిస్ ఉన్న‌వారికే..

డాపాగ్లిఫ్లోజిన్ ను ప్రధానంగా టైప్ 2 డ‌యాబెటిస్‌తో బాధపడుతున్నవారికి సూచిస్తారు. జీవనశైలి మార్పులతో మాత్రమే సరిపోని సందర్భాల్లో అదనపు చక్కెర నియంత్రణ కోసం దీనిని వాడుతారు. గుండె లేదా మూత్రపిండాల సమస్యలకు ప్రమాదంలో ఉన్నవారికి కూడా ఇది ఉపయోగకరంగా ఉంటుంది. అయితే టైప్ 1 డ‌యాబెటిస్‌ ఉన్నవారు లేదా కొన్ని మూత్రపిండ సంబంధిత సమస్యలు ఉన్నవారు వైద్యుల పర్యవేక్షణ లేకుండా దీనిని ఉపయోగించ‌కూడ‌దు. ఇతర మందుల మాదిరిగానే డాపాగ్లిఫ్లోజిన్ కూడా కొన్ని దుష్ప్రభావాలను కలిగిస్తుంది. అమెరికా ఫుడ్ అండ్ డ్ర‌గ్ అడ్మినిస్ట్రేష‌న్ తెలిపిన ప్రకారం మూత్రపిండ మార్గ ఇన్ఫెక్షన్లు, డీహైడ్రేషన్, అధిక మూత్ర విసర్జన వంటి సమస్యలు తలెత్తే అవకాశాలు ఉంటాయి. అందువల్ల ఈ మందును ప్రారంభించే ముందు వైద్యులను సంప్రదించాల్సి ఉంటుంది.