SIP | వేతనం పెరిగిన కొద్దీ ఏటా 10 శాతం ఎస్ఐపీ పెంచాలా..?

SIP | ద్రవ్యోల్బణం పెరుగుతున్న నేపథ్యంలో ఉద్యోగులకు ప్రతి సంవత్సరం జీతాల పెంపు లభిస్తుంది. దేశంలో ఉద్యోగుల పనితీరును బట్టి కంపెనీలు సాధారణంగా 5 నుంచి 10 శాతం వరకు వార్షిక వేతన పెంపును అందిస్తుంటాయి. ఇలా ఏటా జీతం పెరుగుతూ ఉంటే ఆదాయం మెరుగుపడడంతోపాటు జీవన ప్రమాణాలు పెరుగుతాయి. ఖర్చులకు పోను చేతిలో మిగిలే డబ్బు కూడా పెరుగుతుంది. ఉదాహరణకు, ఒక ఉద్యోగి వార్షిక వేతనం ప్రారంభంలో రూ.5 లక్షలు ఉండి, పదేళ్ల తర్వాత రూ.15 లక్షలకు చేరుకుందని అనుకుందాం. అంటే ఆ కాలంలో అతని జీతం సగటున ఏడాదికి 11 శాతానికి పైగా పెరిగినట్లు లెక్క. జీతం పెరిగే కొద్దీ జీవనశైలిని మెరుగుపరుచుకోవడం ఎంత ముఖ్యమో, అదే సమయంలో భవిష్యత్తు కోసం సంపదను కూడబెట్టుకోవడం కూడా అంతే ముఖ్యం. ఆదాయం పెరిగిన ప్రతిసారీ ఖర్చులను మాత్రమే పెంచుకుంటూ, పొదుపుపై దృష్టి పెట్టకపోతే పదవీ విరమణ తర్వాత ఆర్థిక ఇబ్బందులు ఎదురయ్యే అవకాశం ఉంటుంది. ప్రస్తుత జీవనశైలిని కొనసాగించడానికి సరిపడా డబ్బు ల‌భించే అవ‌కాశాలు త‌గ్గుతాయి.

ఎస్ఐపీ పెట్టుబడి స‌రిపోతుందా..

అందుకే మ్యూచువల్ ఫండ్లలో సాధారణ సిస్టమాటిక్ ఇన్వెస్ట్‌మెంట్ ప్లాన్ (ఎస్‌ఐపీ) ద్వారా పెట్టుబడి పెట్టడం మాత్రమే సరిపోదని ఆర్థిక నిపుణులు సూచిస్తున్నారు. జీతం పెరుగుదలకు అనుగుణంగా పెట్టుబడిని కూడా పెంచుకోవడం ద్వారా ద్రవ్యోల్బణ ప్రభావాన్ని ఎదుర్కోవడంతోపాటు దీర్ఘకాలంలో మెరుగైన సంపదను సృష్టించే అవకాశం ఉంటుంది. ఇందుకోసం చాలామంది స్టెప్‌అప్ ఎస్‌ఐపీ విధానాన్ని ఎంచుకుంటున్నారు. ఈ విధానంలో సాధారణంగా ప్రతి సంవత్సరం ఎస్‌ఐపీ పెట్టుబడి మొత్తాన్ని నిర్దిష్ట శాతం మేర పెంచుతారు. ఉదాహరణకు, జీతం పెరిగినప్పుడు నెలవారీ పెట్టుబడిని కూడా 5 లేదా 10 శాతం పెంచుకుంటే, అదే మొత్తంతో పెట్టుబడిని కొనసాగించడంతో పోలిస్తే దీర్ఘకాలంలో లభించే తుది నిధిలో గణనీయమైన వ్యత్యాసం కనిపిస్తుంది.

స్టెప్ అప్ లేకుండా ఎస్‌ఐపీ చేస్తే..

నెలకు రూ.10వేల చొప్పున 25 సంవత్సరాల పాటు ఎస్‌ఐపీ ద్వారా పెట్టుబడి పెట్టి, ఏటా 12 శాతం రాబడి లభిస్తుందని అంచనా వేస్తే, మొత్తం పెట్టుబడి రూ.30 లక్షలు అవుతుంది. ఈ కాలంలో అంచనా లాభం రూ.1,59,76,350 కాగా, పెట్టుబడి విలువతో కలిపి తుది నిధి రూ.1,89,76,350కు చేరుతుంది. నెలవారీ పెట్టుబడిని రూ.10వేల‌తో ప్రారంభించి, ప్రతి సంవత్సరం ఎస్‌ఐపీ మొత్తాన్ని 5 శాతం పెంచుకుంటూ 25 సంవత్సరాల పాటు కొనసాగిస్తే, ఏటా 12 శాతం రాబడి వస్తుందని అంచనా వేసిన లెక్కల ప్రకారం మొత్తం పెట్టుబడి రూ.57,27,251 అవుతుంది. అంచనా లాభం రూ.2,16,20,609 కాగా, తుది నిధి విలువ రూ.2,73,47,860కు చేరుతుంది. నెలకు రూ.10వేల‌తో పెట్టుబడిని ప్రారంభించి, ప్రతి సంవత్సరం ఎస్‌ఐపీ మొత్తాన్ని 10 శాతం పెంచుకుంటూ 25 సంవత్సరాల పాటు కొనసాగిస్తే, ఏటా 12 శాతం రాబడి లభిస్తుందనే అంచనాతో మొత్తం పెట్టుబడి రూ.1,18,01,647 అవుతుంది. అంచనా లాభం రూ.3,09,53,813 కాగా, పెట్టుబడితో కలిపి తుది నిధి విలువ రూ.4,27,55,461కు చేరుతుంది.

స్టెప్ అప్ ఎస్ఐపీతో మేలు..

ఈ లెక్కలను పరిశీలిస్తే, దీర్ఘకాలిక పెట్టుబడుల్లో స్టెప్‌అప్ ఎస్‌ఐపీ ఎంతటి వ్యత్యాసాన్ని తీసుకువ‌స్తుందో అర్థమవుతుంది. ఏటా 5 శాతం పెట్టుబడిని పెంచుకుంటే సుమారు రూ.2.73 కోట్ల నిధి సమకూరే అవకాశం ఉండగా, 10 శాతం పెంచుకుంటే సుమారు రూ.4.27 కోట్ల నిధిని నిర్మించుకోవచ్చని అంచనాలు సూచిస్తున్నాయి. పెట్టుబడి వ్యవధి ఎక్కువగా ఉన్నప్పుడు మార్కెట్ ఒడిదొడుకుల ప్రభావాన్ని దీర్ఘకాలంలో కొంతవరకు అధిగమించడానికి, చక్రవడ్డీ ప్రయోజనాన్ని పొందడానికి అవకాశం ఉంటుంది. అయితే, మ్యూచువల్ ఫండ్ పెట్టుబడులు మార్కెట్ రిస్క్‌కు లోబడి ఉంటాయి. వీటిపై వచ్చే రాబడులు హామీతో కూడినవి కావు. కాబట్టి పెట్టుబడి పెట్టే ముందు ఆర్థిక లక్ష్యాలు, రిస్క్‌ను భరించే సామర్థ్యం, పెట్టుబడి వ్యవధిని పరిగణనలోకి తీసుకోవాలి.