New Zealand Bra Fence | న్యూజిలాండ్‌లో వింత టూరిస్ట్ స్పాట్: 40 మీటర్ల కంచె నిండా వందలాది బ్రాలు.. అసలు కథేంటంటే!

New Zealand Bra Fence | త్రినేత్ర న్యూస్ : సాధారణంగా పర్యాటక ప్రాంతాలంటే అందమైన కొండలు, జలపాతాలు లేదా చారిత్రక కట్టడాలు గుర్తొస్తాయి. కానీ న్యూజిలాండ్‌లోని క్వీన్స్‌టౌన్ (Queenstown) నుంచి వానకా (Wanaka) వెళ్లే దారిలో మాత్రం ఓ వింత దృశ్యం టూరిస్టులను ఆశ్చర్యపరుస్తోంది. చుట్టూ పచ్చని కొండలు, లావెండర్ పూల తోటల మధ్య ఉండే 'కార్డ్రోనా' (Cardrona) ప్రాంతంలో రోడ్డు పక్కన ఉన్న ఓ కంచె నిండా వందలాది బ్రాలు వేలాడుతూ కనిపిస్తాయి. ప్రస్తుతం ఈ ప్రాంతం ప్రపంచవ్యాప్తంగా ఒక ప్రముఖ టూరిస్ట్ స్పాట్‌గా మారింది.

'బ్రాడ్రోనా' (Bradrona)గా పిలిచే ఈ కంచె దాదాపు 40 మీటర్ల పొడవు ఉంటుంది. రంగురంగుల, రకరకాల సైజుల్లో ఉండే వందలాది బ్రాలు ఈ కంచెకు వేలాడుతూ కనిపిస్తాయి. ఇటుగా వెళ్లే టూరిస్టులు ఇక్కడ ఆగి ఫోటోలు దిగడమే కాకుండా, తమ వెంట తెచ్చుకున్న మరో బ్రాను కూడా ఆ కంచెకు తగిలించి వెళ్తుంటారు.

సోషల్ మీడియాలో వైరల్

ఇటీవల ఓ ట్రావెల్ వ్లాగర్ ఈ ప్రదేశాన్ని సందర్శించి తీసిన వీడియో సోషల్ మీడియాలో వైరల్‌గా మారింది. 'ఓ వైపు సముద్రం, మరోవైపు అందమైన కొండలు.. వీటి మధ్యలో ఇలా వరుసగా బ్రాలు వేలాడుతుండటం నిజంగా ఆశ్చర్యంగా ఉంది. అందుకే నేను కూడా ఈ బ్రా క్రూ (Bra Crew)లో చేరి నా బ్రాను ఇక్కడ తగిలిస్తున్నాను' అంటూ ఆమె తన అనుభవాన్ని పంచుకుంది.

అసలు ఈ ఆచారం ఎలా మొదలైంది?

ఈ వింత సంప్రదాయం 1998 క్రిస్మస్ - 1999 న్యూ ఇయర్ మధ్య కాలంలో మొదలైంది. ఒటాగోలోని కార్డ్రోనా వ్యాలీ రోడ్డులో ఉన్న కార్డ్రోనా హోటల్‌లో న్యూ ఇయర్ పార్టీ చేసుకున్న నలుగురు గుర్తుతెలియని మహిళలు, సరదాగా తమ బ్రాలను రోడ్డు పక్కన ఉన్న కంచెకు తగిలించి వెళ్లారు.

ఆ నలుగురు ఎవరనేది ఇప్పటికీ ఎవరికీ తెలియదు. కానీ ఆ తర్వాత అటుగా వెళ్లే మరికొందరు మహిళలు కూడా దానికి తమ బ్రాలను జత చేయడం మొదలుపెట్టారు. చూస్తుండగానే ఆ కంచె నిండా వందల సంఖ్యలో బ్రాలు చేరిపోవడంతో, ఈ సాధారణ కంచె కాస్తా ఓ ఫేమస్ ల్యాండ్‌మార్క్‌గా మారిపోయింది.

వివాదాలు.. 1,500 బ్రాల తొలగింపు

అయితే ఈ కంచెపై స్థానికుల్లో భిన్నాభిప్రాయాలు వ్యక్తమయ్యాయి. మెయిన్ హైవే పక్కనే ఇలా బ్రాలు వేలాడుతుండటం వల్ల డ్రైవర్ల దృష్టి మళ్లి రోడ్డు ప్రమాదాలు జరిగే అవకాశం ఉందని కొందరు అభ్యంతరం తెలిపారు.

దీంతో 2006లో లోకల్ కౌన్సిల్ రంగంలోకి దిగి ఆ కంచెపై ఉన్న సుమారు 1,500 బ్రాలను తొలగించింది. అయినా సరే, టూరిస్టులు మళ్లీ బ్రాలను తగిలించడం ఆపలేదు. ఇలా తొలగించడం, మళ్లీ పెట్టడం ఏళ్ల తరబడి కొనసాగింది. చివరకు 2014 నవంబర్‌లో జరిగిన పెద్ద వివాదం తర్వాత, ఈ బ్రా కంచెను మెయిన్ హైవే పై నుంచి తొలగించి సమీపంలోని 'ది కార్డ్రోనా - హార్స్ ట్రెక్కింగ్ అండ్ క్వాడ్ బైకింగ్', 'కార్డ్రోనా డిస్టిలరీ' ఎంట్రన్స్ వద్దకు మార్చారు.

'బ్రాడ్రోనా' పేరు ఎలా వచ్చింది? దీని వెనుకున్న గొప్ప ఉద్దేశం ఇదే

కేవలం ఒక సరదా ఆచారంగా మొదలైన ఈ ఫెన్స్, 2015లో ఒక గొప్ప సామాజిక కార్యక్రమానికి వేదికైంది. బ్రెస్ట్ క్యాన్సర్ (రొమ్ము క్యాన్సర్)పై అవగాహన కల్పించేందుకు నిర్వహించిన ఫండ్ రైజర్ ఈవెంట్‌లో దీనికి 'బ్రాడ్రోనా' (Bradrona) అని అధికారికంగా పేరు పెట్టారు.

ఈ వింత అట్రాక్షన్ ద్వారా అప్పట్లోనే దాదాపు 30,000 డాలర్ల విరాళాలు సేకరించారు. అప్పటి నుంచి అక్కడ ఒక డొనేషన్ బాక్స్‌ను కూడా ఏర్పాటు చేశారు. ఇక్కడికి వచ్చే పర్యాటకులు బ్రెస్ట్ క్యాన్సర్ బాధితుల సహాయార్థం తమవంతు విరాళాలు అందిస్తుంటారు. అలా నలుగురు మహిళలు సరదాగా చేసిన పని, నేడు క్యాన్సర్ బాధితులకు అండగా నిలిచే గొప్ప వేదికగా మారింది.

 

View this post on Instagram

 

A post shared by Pallavi Raj (@myshadowbeats)