Justice PS Koshy Telangana High Court | హైకోర్టు తాత్కాలిక సీజేగా జస్టిస్ పీఎస్ కోషి: సుప్రీంకోర్టుకు జస్టిస్ అపరేశ్ కుమార్ సింగ్

• కేంద్ర న్యాయశాఖ గెజిట్ విడుదల

Justice PS Koshy Telangana High Court | త్రినేత్ర న్యూస్ : తెలంగాణ హైకోర్టుకు నూతన సారథి వచ్చారు. హైకోర్టు తాత్కాలిక ప్రధాన న్యాయమూర్తిగా (యాక్టింగ్ చీఫ్ జస్టిస్) సీనియర్ న్యాయమూర్తి జస్టిస్ పుతిచిర సామ్ కోషి (జస్టిస్ పీఎస్ కోషి) నియమితులయ్యారు. ఈ మేరకు కేంద్ర న్యాయశాఖ (డిపార్ట్‌మెంట్ ఆఫ్ జస్టిస్) సోమవారం అధికారిక గెజిట్ నోటిఫికేషన్ విడుదల చేసింది. భారత రాజ్యాంగంలోని ఆర్టికల్ 223 ద్వారా సంక్రమించిన అధికారాల మేరకు భారత రాష్ట్రపతి ఈ నియామకానికి ఆమోదం ముద్ర వేశారు.

సుప్రీంకోర్టు జడ్జిగా జస్టిస్ అపరేశ్ కుమార్ సింగ్ పదోన్నతి

తెలంగాణ హైకోర్టు ప్రస్తుత ప్రధాన న్యాయమూర్తి జస్టిస్ అపరేశ్ కుమార్ సింగ్ దేశ అత్యున్నత న్యాయస్థానం సుప్రీంకోర్టు న్యాయమూర్తిగా పదోన్నతి పొందారు. సుప్రీంకోర్టు జడ్జిగా ప్రమాణ స్వీకారం చేసే క్రమంలో ఆయన హైకోర్టు సీజే పదవి బాధ్యతల నుంచి రిలీవ్ కానున్నారు.

జస్టిస్ అపరేశ్ కుమార్ సింగ్ బాధ్యతలు విడిచిపెట్టిన వెంటనే జస్టిస్ పీఎస్ కోషి తెలంగాణ హైకోర్టు యాక్టింగ్ చీఫ్ జస్టిస్‌గా బాధ్యతలు స్వీకరిస్తారని కేంద్ర ప్రభుత్వ జాయింట్ సెక్రటరీ జగన్నాథ్ శ్రీనివాసన్ జారీ చేసిన ఉత్తర్వుల్లో స్పష్టం చేశారు.

జస్టిస్ పీఎస్ కోషి నేపథ్యం

న్యాయరంగంలో సుదీర్ఘ అనుభవం కలిగిన జస్టిస్ పీఎస్ కోషి 2013 సెప్టెంబర్‌లో ఛత్తీస్‌గఢ్ హైకోర్టు అదనపు న్యాయమూర్తిగా నియమితులయ్యారు. ఆ తర్వాత 2016 మార్చిలో ఆయన శాశ్వత న్యాయమూర్తిగా బాధ్యతలు చేపట్టారు.

Also Read | తెలంగాణ నెక్స్ట్ సీఎం ఎవరు?

2023లో ఆయన ఛత్తీస్‌గఢ్ నుంచి తెలంగాణ హైకోర్టుకు బదిలీపై వచ్చారు. అప్పటి నుంచి తెలంగాణ హైకోర్టులో కీలక ధర్మాసనాలకు ప్రాతినిధ్యం వహిస్తూ అనేక ముఖ్యమైన తీర్పులు వెలువరించారు. తాజాగా సీజే పదోన్నతితో హైకోర్టు పరిపాలనా, న్యాయపరమైన కీలక బాధ్యతలు ఆయన చేతుల్లోకి వెళ్లాయి.

ఈ నియామక ఉత్తర్వుల కాపీలను తెలంగాణ గవర్నర్, ముఖ్యమంత్రి, ప్రభుత్వ ప్రధాన కార్యదర్శి కార్యాలయాలతో పాటు సుప్రీంకోర్టు, హైకోర్టు రిజిస్ట్రార్ జనరల్‌లకు అధికారికంగా పంపించారు.