7Seas Entertainment | భారత్‌లో కొత్త రేసింగ్ గేమ్‌.. ‘ఫార్ములా రైడ్‌’తో 7సీస్ ఎంటర్‌టైన్‌మెంట్

7Seas Entertainment | భారతీయ గేమింగ్ రంగంలో మరో కొత్త అడుగు పడుతోంది. హైదరాబాద్‌కు చెందిన 7సీస్ ఎంటర్‌టైన్‌మెంట్ లిమిటెడ్ త్వరలో విడుదల చేయనున్న మొబైల్ రేసింగ్ గేమ్‌ 'ఫార్ములా రైడ్'ను ప్రకటించింది. వేగం, వ్యూహాత్మక నిర్ణయాలు, కెరీర్‌లో పురోగతి, రియల్‌టైమ్ మల్టీప్లేయర్ వంటి ప్రత్యేక ఫీచర్లతో ఈ గేమ్‌ను రూపొందిస్తోంది. ఆండ్రాయిడ్, ఐఓఎస్ వినియోగదారుల కోసం ప్రతిపాదిత వాణిజ్య విడుదలకు ముందుగానే గూగుల్ ప్లేలో ప్రీ-రిజిస్ట్రేషన్, యాప్ స్టోర్‌లో ప్రీ-ఆర్డర్ సదుపాయాలను అందుబాటులోకి తీసుకొచ్చింది. 'ఫార్ములా రైడ్'లో కేవలం వేగంగా వాహనాన్ని నడపడం మాత్రమే కాకుండా, రేసింగ్‌లో వ్యూహాత్మక నిర్ణయాలకు కూడా ప్రాధాన్యం ఇవ్వనున్నారు. టైర్ల నిర్వహణ, పిట్‌స్టాప్ వ్యూహాలు, వాహనానికి జరిగే నష్టాన్ని ఎదుర్కోవడం, బ్రేకింగ్ పనితీరు, రేసును నియంత్రించే నిర్ణయాలు వంటి అంశాలను గేమ్‌ప్లేలో చేర్చనున్నారు. మారుతున్న ట్రాక్ పరిస్థితులకు అనుగుణంగా ఆటగాళ్లు తమ నైపుణ్యాన్ని ప్రదర్శించాల్సి ఉంటుంది.

ఆటగాళ్ల కోసం ఆకట్టుకునే గేమింగ్ మోడ్‌లు..

ఆటగాళ్ల అభిరుచులకు అనుగుణంగా పలు గేమింగ్ మోడ్‌లను అందించేందుకు కంపెనీ ప్రణాళిక రూపొందించింది. ఛాంపియన్‌షిప్ మోడ్‌లో 10 జట్లు, 20 మంది డ్రైవర్లతో కూడిన రేసింగ్ సీజన్‌లో పాల్గొనే అవకాశం ఉంటుంది. కెరీర్ మోడ్‌లో వివిధ రేసింగ్ స్థాయిల్లో ముందుకు సాగుతూ కొత్త వాహనాలు, అప్‌గ్రేడ్‌లను అన్‌లాక్ చేసుకోవచ్చు. క్విక్ రేస్, క్లాసిక్ మోడ్‌ల ద్వారా తక్కువ సమయంలోనే రేసింగ్ అనుభవాన్ని ఆస్వాదించవచ్చు. రియల్‌టైమ్ మల్టీప్లేయర్ సదుపాయంతో ఇతర ఆటగాళ్లతో నేరుగా పోటీపడే అవకాశం కల్పించనున్నారు. వీటితోపాటు లీడర్‌బోర్డ్‌లు, విజయ సాధనలు, రోజువారీ బహుమతులు వంటి అదనపు ఫీచర్లను కూడా అందించనున్నారు.

భారతీయ గేమింగ్ ప్రతిభకు అంతర్జాతీయ వేదిక..

సొంత గేమింగ్ మేధోసంపత్తి, మొబైల్ గేమింగ్ ఉత్పత్తుల అభివృద్ధిపై దృష్టి సారిస్తున్న 7సీస్ ఎంటర్‌టైన్‌మెంట్‌కు 'ఫార్ములా రైడ్‌' మరో కీలక ప్రాజెక్టుగా నిలవనుంది. గేమ్ రూపకల్పన, సాఫ్ట్‌వేర్ ఇంజినీరింగ్, దృశ్య కంటెంట్ నిర్మాణం, నాణ్యత నిర్ధారణ, ప్రచురణ విభాగాలకు చెందిన బృందాలు ఈ ప్రాజెక్టులో భాగస్వాములయ్యాయి.

ఆటగాళ్ల అభిరుచులకు అనుగుణంగా అభివృద్ధి..

వేగవంతమైన రేసింగ్ సెషన్‌లను ఇష్టపడే వారితోపాటు, ఛాంపియన్‌షిప్‌లలో పాల్గొనాలని, దీర్ఘకాలిక కెరీర్ పురోగతిని సాధించాలని కోరుకునే ఆటగాళ్లను దృష్టిలో ఉంచుకుని ఈ గేమ్‌ను రూపొందిస్తున్నారు. గేమ్ విడుదలైన తర్వాత ఆటగాళ్ల అభిప్రాయాలు, పనితీరు గణాంకాలు, సాంకేతిక అంశాలు, ప్లాట్‌ఫామ్ విధానాల ఆధారంగా మరిన్ని మెరుగుదలలు చేపట్టాలని కంపెనీ భావిస్తోంది. 7సీస్ ఎంటర్‌టైన్‌మెంట్ లిమిటెడ్ మేనేజింగ్ డైరెక్టర్ ఎల్.ఎం. శంకర్ మాట్లాడుతూ రేసింగ్ ఉత్సాహానికి మించిన అనుభవాన్ని అందించేలా 'ఫార్ములా రైడ్‌'ను రూపొందిస్తున్నామ‌ని తెలిపారు. ఆటగాళ్లు పోటీపడుతూ, అర్థవంతమైన వ్యూహాత్మక నిర్ణయాలు తీసుకుంటూ, కాలక్రమేణా గేమ్‌లో ఎదిగే ఆసక్తికరమైన అనుభవాన్ని సృష్టించడంపై దృష్టి సారించామ‌ని వివ‌రించారు. భారత్‌లో అభివృద్ధి చేసిన సొంత గేమ్‌లను ప్రపంచవ్యాప్తంగా ఉన్న ఆటగాళ్లకు అందించాలనే త‌మ‌ ఆకాంక్షకు ఈ గేమ్ ప్రతిబింబం అని తెలిపారు.