Rahul Gandhi vs Election Commission | ‘రాహుల్ వర్సెస్ ఎలక్షన్ కమిషన్’: సుప్రీంకోర్టులో పిటిషన్ దాఖలు.. రేపే సీజేఐ బెంచ్ విచారణ

Rahul Gandhi vs Election Commission | త్రినేత్ర న్యూస్ : ఎన్నికల సంఘం ప్రధాన కమిషనర్ జ్ఞానేష్ కుమార్‌కు వ్యతిరేకంగా విపక్ష ఇండియా (INDIA) కూటమి న్యాయపోరాటం కీలక మలుపు తిరిగింది. ఓటర్ల జాబితా సవరణ (SIR) పేరిట సామూహికంగా ఓట్లను తొలగించారన్న ఆరోపణలపై సుప్రీంకోర్టులో సోమవారం సాయంత్రం పిటిషన్ దాఖలైంది. సీజేఐ జస్టిస్ సూర్యకాంత్ నేతృత్వంలోని ధర్మాసనం ఈ పిటిషన్‌ను మంగళవారమే (అక్టోబర్ 13) విచారించే అవకాశాలు బలంగా కనిపిస్తున్నాయి.

వాస్తవానికి రాహుల్ గాంధీ, ప్రియాంక గాంధీ నేతృత్వంలో వేలాది మంది నేతలు సుప్రీంకోర్టు వైపు చేపట్టిన భారీ పాదయాత్ర కారణంగా ట్రాఫిక్ నిలిచిపోయింది. దీంతో నిర్దేశిత సాయంత్రం 4:30 గంటల డెడ్‌లైన్ లోపు రాహుల్ స్వయంగా న్యాయస్థానానికి చేరుకోలేకపోయారు. దీంతో ఆయన తరఫున సీనియర్ న్యాయవాది ఎస్. ప్రసన్న నేరుగా రిజిస్ట్రీలో ఈ పిటిషన్‌ను సమర్పించారు.

పిటిషనర్‌గా రాహుల్.. జాబితాలో మరో 10 మంది విపక్ష నేతలు

ఈ పిటిషన్‌లో ప్రధాన పిటిషనర్‌గా లోక్‌సభ ప్రతిపక్ష నేత రాహుల్ గాంధీ పేరు ఉండగా, ఆయనతో పాటు ఇండియా కూటమికి చెందిన 10 మంది కీలక నేతలు జాయింట్ పిటిషనర్లుగా చేరారు.

• మల్లికార్జున ఖర్గే (కాంగ్రెస్)
• అఖిలేష్ యాదవ్ (సమాజ్‌వాదీ పార్టీ)
• తేజస్వి యాదవ్ (ఆర్జేడీ)
• సౌగతా రాయ్ (టీఎంసీ)
• సంజయ్ రౌత్ (శివసేన - యూబీటీ)
• సుప్రియా సూలే (ఎన్సీపీ - శరద్ పవార్)
• డి. రాజా (సీపీఐ)
• ఎం.ఎ. బేబీ (సీపీఎం)
• మహువా మాఝీ (జేఎంఎం)
• ఈటీ మహమ్మద్ బషీర్ (ఐయూఎంఎల్)

లోపాలు సరిదిద్ది.. రేపే లిస్టింగ్ చేయాలని ఆదేశం

సోమవారం సాయంత్రంలోగా పిటిషన్ దాఖలు చేస్తే, మరుసటి రోజే విచారణ చేపడతామని సీజేఐ సూర్యకాంత్ ఇప్పటికే విపక్ష నేతలకు రాసిన లేఖలో హామీ ఇచ్చారు. ఈ నేపథ్యంలో పిటిషన్‌ను తక్షణమే పరిశీలించి, ఏవైనా లోపాలు (డిఫెక్ట్స్) ఉంటే వెంటనే సరిచేసి మంగళవారం నాటి కాజ్ లిస్ట్‌లో చేర్చాల్సిందిగా సుప్రీంకోర్టు రిజిస్ట్రీకి ఆదేశాలు వెళ్లాయి. దీంతో రేపు సుప్రీంకోర్టులో జరగబోయే విచారణ దేశ రాజకీయాల్లో తీవ్ర ఉత్కంఠ రేపుతోంది.

Also Read | ఢిల్లీలో దద్దరిల్లిన ‘మార్చ్ ఫర్ డెమోక్రసీ’: సుప్రీంకోర్టుకు రాహుల్, ప్రియాంక పాదయాత్ర.. సీఈసీపై పిటిషన్ దాఖలు