Lawrence Bishnoi Sahab | గ్యాంగ్‌స్టర్‌కు ‘సాహెబ్’ మర్యాదా? టైగర్ ష్రాఫ్‌పై కాల్పుల వేళ పోలీసుల పాత వీడియోతో దుమారం

• పోలీసుల తీరును ప్రశ్నించిన అభిజీత్ దిప్కే
• బాలీవుడ్‌కు బిష్ణోయ్ గ్యాంగ్ వార్నింగ్

Lawrence Bishnoi Sahab | త్రినేత్ర న్యూస్ : ముంబైలో బాలీవుడ్ నటుడు టైగర్ ష్రాఫ్ కారుపై ఆదివారం జరిగిన కాల్పుల ఘటన ఇప్పుడు రాజకీయంగానూ, సోషల్ మీడియాలోనూ పెద్ద దుమారం రేపుతోంది. ఈ దాడి వెనుక గ్యాంగ్‌స్టర్ లారెన్స్ బిష్ణోయ్ ముఠా హస్తం ఉందన్న ప్రచారం జరుగుతున్న వేళ, 'కాక్రోచ్ జనతా పార్టీ' (CJP) వ్యవస్థాపకుడు అభిజీత్ దిప్కే సోమవారం ఎక్స్ (X) వేదికగా షేర్ చేసిన ఒక పాత వీడియో వైరల్‌గా మారింది. గ్యాంగ్‌స్టర్ల పట్ల, సామాన్య నిరసనకారుల పట్ల పోలీసులు వ్యవహరించే తీరును ఆయన తీవ్రంగా ప్రశ్నించారు.

'లారెన్స్ బిష్ణోయ్ సాహెబ్'.. పోలీసుల మర్యాదపై విమర్శలు

2025 ఆగస్టు చివరిలో జరిగిన ఒక ప్రెస్ కాన్ఫరెన్స్‌లో ఈస్ట్ ఢిల్లీ డీసీపీ అభిషేక్ ధానియా మాట్లాడుతూ గ్యాంగ్‌స్టర్ లారెన్స్ బిష్ణోయ్‌ని "లారెన్స్ బిష్ణోయ్ సాహెబ్" అని సంబోధించారు. నాటి వీడియోను అభిజీత్ దిప్కే తాజాగా మళ్లీ షేర్ చేస్తూ పోలీసుల ప్రాధాన్యతలపై విరుచుకుపడ్డారు.

"లారెన్స్ బిష్ణోయ్ సాహెబ్ అట! గ్యాంగ్‌స్టర్ల పట్ల ఢిల్లీ పోలీసులకు ఉన్న గౌరవం ఇది. శాంతియుతంగా నిరసన తెలిపే విద్యార్థులు, యాక్టివిస్టుల పట్ల కనీసం ఇందులో 10 శాతం మర్యాద చూపించినా బాగుండేది" అని దిప్కే ఎద్దేవా చేశారు. విద్యార్థులు, ఉద్యమకారులపై ఉక్కుపాదం మోపడం మానేసి, అసలైన నేరస్థులపై దృష్టి పెట్టాలని పోలీసులకు, ప్రభుత్వానికి ఆయన హితవు పలికారు.

సల్మాన్ ఖాన్‌తో పనిచేస్తే వదిలిపెట్టం: వైరల్ పోస్ట్ కలకలం

మరోవైపు టైగర్ ష్రాఫ్‌పై కాల్పుల ఘటనకు తామే బాధ్యులమంటూ లారెన్స్ బిష్ణోయ్ గ్యాంగ్‌కు చెందిన అనిల్ పండిత్, హర్మన్ సంధు పేరిట ఒక సోషల్ మీడియా పోస్ట్ బయటకు వచ్చింది. టైగర్ ష్రాఫ్‌ను తాము గతంలోనే కాంటాక్ట్ చేసి హెచ్చరించామని, కానీ ఆయన తమ వార్నింగ్‌ను పట్టించుకోలేదని ఆ మెసేజ్‌లో పేర్కొన్నారు.

అంతటితో ఆగకుండా ముంబై సినీ పరిశ్రమకు కూడా ఆ పోస్ట్‌లో గట్టి వార్నింగ్ ఇచ్చారు. తమ డిమాండ్లను పట్టించుకోకపోయినా లేదా నటుడు సల్మాన్ ఖాన్‌తో కలిసి పనిచేయడం కొనసాగించినా.. తదుపరి టార్గెట్ వారే అవుతారని బెదిరించారు. భద్రతా ఏజెన్సీలు, ముంబై పోలీసులు ఈ పోస్ట్ ఎక్కడి నుంచి వచ్చింది, ఇందులో నిజానిజాలు ఎంత అనే కోణంలో దర్యాప్తు చేస్తున్నారు.

గుంపులో నుంచి కాల్పులు.. డ్రైవర్ ఫిర్దౌస్‌కు బుల్లెట్ గాయం

పోలీసులు వెల్లడించిన వివరాల ప్రకారం.. ఆదివారం గ్రౌండ్ నుంచి టైగర్ ష్రాఫ్ కారులో బయలుదేరుతున్న సమయంలో ఆయనను చూసేందుకు అక్కడికి భారీగా జనం గుమిగూడారు. ఆ గుంపులో నుంచే దుండగులు కారుపై మూడు నుంచి నాలుగు రౌండ్ల కాల్పులు జరిపారు.

ఈ ఘటనలో టైగర్ ష్రాఫ్ క్షేమంగా బయటపడినప్పటికీ, ఆయన కారు డ్రైవర్ ఫిర్దౌస్ ఎడమ చేతికి బుల్లెట్ గాయమైంది. ఆయనతో పాటు మరో వ్యక్తి కూడా గాయపడ్డారు. ఈ కేసును తీవ్రంగా పరిగణించిన ముంబై పోలీసులు భారతీయ న్యాయ సంహిత (BNS) సెక్షన్లు 109(1), 3(5) తో పాటు ఆర్మ్స్ యాక్ట్ కింద ఎఫ్ఐఆర్ నమోదు చేసి, దర్యాప్తు కోసం 15 ప్రత్యేక బృందాలను ఏర్పాటు చేశారు.

'వాళ్లు పిరికిపందలు.. వదిలిపెట్టే ప్రసక్తే లేదు' - సీఎం ఫడ్నవీస్

ఈ కాల్పుల ఘటనపై మహారాష్ట్ర ముఖ్యమంత్రి దేవేంద్ర ఫడ్నవీస్ స్పందిస్తూ.. ఎవరూ భయపడాల్సిన అవసరం లేదని భరోసా ఇచ్చారు. "ఇలాంటి దాడులు చేసేవాళ్లు పిరికిపందలు. ఎక్కడో దాక్కుని కమ్యూనికేషన్ ఛానల్స్ ద్వారా బెదిరింపులకు పాల్పడుతున్నారు. ముంబై పోలీసులు అత్యంత ప్రొఫెషనల్‌గా పనిచేస్తారు. నేరస్థులను పట్టుకునే వరకు వారు విశ్రమించరు, అతి త్వరలోనే దోషులను అరెస్ట్ చేస్తారు" అని సీఎం స్పష్టం చేశారు.

“Lawrence Bishnoi Sahab”

The respect Delhi Police has for gangsters…

Wish they showed even 10% of this courtesy to students and activists who are doing nothing but protest. https://t.co/znv66dxoNI

— Abhijeet Dipke (@abhijeet_dipke) October 19, 2026