TVK Vijay RTI Rollback | తీవ్ర వ్యతిరేకతతో విజయ్ సర్కార్ యూటర్న్: లా అండ్ ఆర్డర్ RTI మినహాయింపు రద్దు.. పక్కనే పోక్సో కేసు సెగ

TVK Vijay RTI Rollback | త్రినేత్ర న్యూస్ : తమిళనాడులో సీఎం విజయ్ నేతృత్వంలోని టీవీకే (TVK) ప్రభుత్వం కీలక నిర్ణయం నుంచి వెనక్కి తగ్గింది. రాష్ట్ర పబ్లిక్ (లా అండ్ ఆర్డర్) విభాగాన్ని సమాచార హక్కు చట్టం (RTI) పరిధి నుంచి మినహాయిస్తూ జారీ చేసిన వివాదాస్పద ఉత్తర్వులను ఉపసంహరించుకుంది. ప్రతిపక్షాలు, ప్రజా సంఘాల నుంచి భారీ ఎత్తున విమర్శలు రావడంతో ప్రభుత్వం వెంటనే ఆ జీవోను రద్దు చేస్తున్నట్లు అధికారికంగా ప్రకటించింది.

వివాదానికి దారితీసిన జీవో ఏమిటి?

సెప్టెంబర్ 21న హెచ్‌ఆర్ మేనేజ్‌మెంట్ శాఖ జీవో నెం. 57 ద్వారా లా అండ్ ఆర్డర్ విభాగాన్ని సెక్యూరిటీ అండ్ ఇంటెలిజెన్స్ సంస్థగా వర్గీకరిస్తూ, ఆర్టీఐ చట్టంలోని సెక్షన్ 24(4) కింద మినహాయింపు కల్పించింది.

అయితే, లా అండ్ ఆర్డర్ విభాగం పరిధిలోకి లాకప్ డెత్‌లు, పోలీస్ ఎన్‌కౌంటర్లు, అల్లర్ల విచారణ నివేదికలు, ప్రివెంటివ్ డిటెన్షన్ వంటి అత్యంత సున్నితమైన అంశాలు వస్తాయి. ఈ విభాగానికి ఆర్టీఐ మినహాయింపు ఇస్తే పోలీస్ దాడులు, కస్టడీ మరణాల గురించిన నిజాలు బయటకు రాకుండా పోతాయంటూ విపక్షాలు భగ్గుమన్నాయి.

పోలీస్ రాజ్యంగా మారుస్తున్నారంటూ విపక్షాల దాడి

ఈ ఉత్తర్వులపై కాంగ్రెస్ ఎంపీ కార్తి చిదంబరం స్పందిస్తూ.. "యూపీఏ ప్రభుత్వం ప్రజాస్వామ్య పారదర్శకత కోసం తెచ్చిన ఆర్టీఐ పరిధిని విస్తరించాల్సింది పోయి, ఇలా తగ్గించడం అన్యాయం" అని మండిపడ్డారు. తమిళనాడును ‘పోలీస్ స్టేట్’గా మార్చే కుట్ర జరుగుతోందని సీపీఎం ఎంపీ వెంకటేశన్ దుయ్యబట్టారు.

దీనిపై టీవీకే మంత్రులు రాజ్‌మోహన్, సీటీఆర్ నిర్మల్ కుమార్ వివరణ ఇస్తూ.. కేవలం మత ఘర్షణల సమాచారాన్ని తప్పుదోవ పట్టించకుండా ఉండేందుకే ఈ నిర్ణయం తీసుకున్నామని, ప్రజల నుంచి అసంతృప్తి వ్యక్తమైతే వెనక్కి తగ్గుతామని పేర్కొన్నారు. చివరికి వ్యతిరేకత తీవ్రతను గమనించిన ప్రభుత్వం, ఆర్టీఐ మినహాయింపును పూర్తిగా ఉపసంహరించుకుంటున్నట్లు ప్రకటించింది.

సీఎం విజయ్‌పై ఈసీకి డీఎంకే ఫిర్యాదు

ఓవైపు ఆర్టీఐ వివాదం సద్దుమణుగుతుండగానే, మరోవైపు సీఎం విజయ్‌ను మరో వివాదం చుట్టుముట్టింది. మదురాంతకం అసెంబ్లీ ఉపఎన్నిక ప్రచార సభలో వివాదాస్పద వీరమణి పోక్సో (POCSO) కేసు అంశాన్ని ప్రస్తావించడంపై డీఎంకే తీవ్ర అభ్యంతరం వ్యక్తం చేసింది.

ఈ కేసును డీఎంకే నేతలతో ముడిపెట్టి మాట్లాడవద్దని మద్రాస్ హైకోర్టు స్పష్టమైన ఆదేశాలు ఇచ్చినప్పటికీ, విజయ్, ఆయన మంత్రి ఆధవ్ అర్జున కోర్టు ధిక్కారానికి పాల్పడ్డారని డీఎంకే ఎంపీ జె. కాన్‌స్టాంటైన్ రవీంద్రన్ ఎన్నికల సంఘానికి (EC) ఫిర్యాదు చేశారు. గత డీఎంకే ప్రభుత్వ హయాంలో ఈ కేసును తొక్కిపెట్టారంటూ విజయ్ చేసిన ఆరోపణలు ఎన్నికల కోడ్ ఉల్లంఘన కిందకే వస్తాయని, వెంటనే చర్యలు తీసుకోవాలని డిమాండ్ చేశారు.

ఆర్టీఐ వెనకడుగు, తాజా ఈసీ ఫిర్యాదులతో తమిళనాడు రాజకీయాలు ఒక్కసారిగా వేడెక్కాయి.

Chief Minister Vijay-led TVK government in Tamil Nadu has exempted the Public (Law and Order) Department from the RTI Act.

A Gazette notification issued under Section 24(4) of the RTI Act has classified the department as an Intelligence and Security Organisation. This means… pic.twitter.com/Cfv4bGao9I

— ANI (@ANI) September 27, 2026