US Navy Ship Toilets Clogged | అమెరికా యుద్ధనౌకలో ‘టాయిలెట్ల’ కష్టాలు.. ఇరాన్‌తో టెన్షన్స్ వేళ 5000 మంది నావికుల అవస్థలు..!

US Navy Ship Toilets Clogged | త్రినేత్ర.న్యూస్ : ఇరాన్‌పై సైనిక చర్యకు అమెరికా అధ్యక్షుడు డొనాల్డ్ ట్రంప్ హెచ్చరికలు జారీ చేస్తున్న వేళ, పశ్చిమాసియాలో అమెరికా దశాబ్దాల కాలంలోనే అతిపెద్ద యుద్ధనౌకల బలగాన్ని మోహరిస్తోంది. కానీ, ప్రపంచంలోనే అతిపెద్ద విమాన వాహక నౌక అయిన 'USS గెరాల్డ్ ఆర్.ఫోర్డ్ (USS Gerald R.Ford)' లోని దాదాపు 5,000 మంది నావికులకు ఇరాన్‌తో యుద్ధం కంటే.. అందులోని టాయిలెట్ల కష్టాలే పెద్ద సవాల్‌గా మారాయి.

పొడిగించిన మోహరింపు.. పెరిగిన కష్టాలు

గత ఏడాది (2025) జూన్ నుంచి USS గెరాల్డ్ ఆర్ ఫోర్డ్ సముద్రంలోనే ఉంది. జనవరిలో వెనిజులా మాజీ అధ్యక్షుడు నికోలస్ మదురోను పట్టుకోవడంలో ఈ నౌక కీలక పాత్ర పోషించింది. ఆ మిషన్ పూర్తయిన తర్వాత, ఇరాన్‌పై అమెరికా దాడుల నేపథ్యంలో ఈ యుద్ధనౌకను తిరిగి మిడిల్ ఈస్ట్‌కి పంపించారు.

సాధారణంగా శాంతికాలంలో యుద్ధనౌకల మోహరింపు 6 నెలలు ఉంటుందని రిటైర్డ్ రియర్ అడ్మిరల్ మార్క్ మోంట్‌గోమరీ వాల్ స్ట్రీట్ జర్నల్‌కు తెలిపారు. కానీ, ఫోర్డ్ నావికులు ఇప్పటికే 8 నెలలుగా సముద్రంలోనే ఉన్నారు. ఈ వ్యవధి 11 నెలలకు పొడిగించే అవకాశం ఉంది. ఇదే జరిగితే అమెరికా నౌకాదళ చరిత్రలో ఇది సరికొత్త రికార్డు అవుతుంది.

పనిచేయని 650 టాయిలెట్లు.. ప్లంబింగ్ వైఫల్యం

8 నెలలుగా నిరంతరాయంగా సముద్రంలో ఉండటం నౌకపై తీవ్ర ప్రభావం చూపుతోంది. నౌక నిర్వహణ, అప్‌గ్రేడ్‌లు వాయిదా పడటంతో పరికరాలు పాడవుతున్నాయి. 13.3 బిలియన్ల డాలర్ల వ్యయంతో నిర్మించిన ఈ నౌకలో మురుగునీటి (Sewage) వ్యవస్థ పూర్తిగా దెబ్బతింది.

వాక్యూమ్ సిస్టమ్ లోపం: ఈ నౌకలోని ప్లంబింగ్ అంతా వాక్యూమ్ ఆధారితంగా పనిచేస్తుంది. ఒక్క వాల్వ్ పాడైనా, ఆ విభాగంలోని టాయిలెట్లు అన్నీ పనిచేయడం ఆగిపోతాయి.అలాగే టాయిలెట్లలో వస్తువులు ఇరుక్కుపోయి ఆ వ్యవస్థనే బ్లాక్ చేశాయి.

భారీ ఖర్చు: ఇరుకైన పైపుల్లో క్యాల్షియం పేరుకుపోవడం మరో పెద్ద సమస్య. ఈ వ్యవస్థను క్లీన్ చేయడానికి యాసిడ్ ఫ్లష్ కోసం నౌకాదళం ప్రతిసారీ 4,00,000 డాలర్లు ఖర్చు చేయాల్సి వస్తోంది.

45 నిమిషాల క్యూ: సుమారు 650 టాయిలెట్లు పనిచేయకపోవడంతో, నావికులు టాయిలెట్ కోసం రోజూ 45 నిమిషాల పాటు క్యూలో నిలబడాల్సిన దుస్థితి ఏర్పడింది. వీటిని బాగు చేయడానికి టెక్నీషియన్లు రోజుకు 19 గంటలు కష్టపడుతున్నారు.

నావికుల మానసిక ఆవేదన - రాజీనామా యోచన

నౌకలోని చాలా మంది నావికులు 20 ఏళ్ల వయసులో ఉన్న యువతీయువకులు. నెలల తరబడి సముద్రంలోనే ఉండటంతో వారు శారీరకంగా, మానసికంగా తీవ్రంగా అలసిపోయారు. కుటుంబాలకు దూరంగా ఉండటం, భద్రతా కారణాల దృష్ట్యా 'ఘోస్ట్ మోడ్' (Ghost mode)లో ఉంటూ వారితో మాట్లాడలేకపోవడం వారిని బాధిస్తోంది. శుభకార్యాలకు, వేడుకలకు దూరం అవుతున్నారు. ఈ డిప్లాయ్‌మెంట్ ముగియగానే మిలిటరీ ఉద్యోగాలను వదిలేయాలని పలువురు భావిస్తున్నట్లు వాల్ స్ట్రీట్ జర్నల్ పేర్కొంది.

గత ఏడాది ఏప్రిల్-మే (2025)లో ఎర్ర సముద్రంలో హౌతీ తిరుగుబాటుదారులతో జరిగిన పోరులో USS హ్యారీ ఎస్ ట్రూమాన్ నౌక పలు యుద్ధ విమానాలను కోల్పోయింది. సిబ్బందిపై విపరీతమైన పనిభారం పడటమే దీనికి కారణమని దర్యాప్తులో తేలింది.

ప్రస్తుతం USS గెరాల్డ్ ఫోర్డ్ నావికుల్లో ఉన్న కోపాన్ని, నిరాశను కెప్టెన్ డేవిడ్ స్కోరోసి అర్థం చేసుకున్నారు. "దేశం పిలిచినప్పుడు, మనం స్పందించాలి" అని ఆయన సైనికులకు రాసిన లేఖలో పేర్కొన్నారు. ఇరాన్‌పై డొనాల్డ్ ట్రంప్ మాటల దాడి పెంచుతున్న వేళ, అమెరికా ముందు ఇప్పుడు యుద్ధం కంటే తమ నౌకలోని 'టాయిలెట్ల' సమస్యను పరిష్కరించుకోవడమే పెద్ద సవాల్‌గా మారింది.

https://x.com/NuryVittachi/status/2025829366765383685