US-Iran tensions | ఇరాన్‌ వైపు భారీ నౌకాదళం… అణు ఒప్పందం చేసుకోండి, లేదంటే తీవ్ర పరిణామాలు తప్పవు: ట్రంప్ హెచ్చరిక

US-Iran tensions | త్రినేత్ర.న్యూస్: అమెరికా అధ్యక్షుడు డొనాల్డ్ ట్రంప్ ఇరాన్‌కు తీవ్రమైన హెచ్చరికలు జారీ చేశారు. ఇరాన్ తన అణ్వాయుధ ఆశయాలను విరమించుకునేలా ఒప్పందం చేసుకునేందుకు చర్చలకు రావాలని, లేకపోతే తీవ్ర పరిణామాలను ఎదుర్కోవాల్సి ఉంటుందని స్పష్టం చేశారు. ఈ మేరకు 'యుఎస్ఎస్ అబ్రహం లింకన్' (USS Abraham Lincoln) ఎయిర్‌క్రాఫ్ట్ క్యారియర్ నేతృత్వంలోని "భారీ నౌకాదళం (Massive Armada)" ఇరాన్ వైపు కదులుతోందని ఆయన ప్రకటించారు.

ట్రంప్ సోషల్ మీడియా వేదికగా హెచ్చరిక

తన సొంత సోషల్ మీడియా ప్లాట్‌ఫామ్ అయిన 'ట్రూత్ సోషల్‌' (Truth Social)లో ట్రంప్ ఈ విషయాన్ని వెల్లడించారు. వెనిజులాకు పంపిన దానికంటే ఇది చాలా పెద్ద నౌకాదళమని, ఇది శక్తి, ఉత్సాహం, లక్ష్యంతో వేగంగా కదులుతోందని పేర్కొన్నారు. ఈ సైన్యం తన మిషన్‌ను వేగంగా.. అవసరమైతే విధ్వంసకరంగా పూర్తి చేయడానికి సిద్ధంగా ఉందని ట్రంప్ హెచ్చరించారు.

అణ్వాయుధాలు వద్దు - ఒప్పందం ముద్దు

ఇరాన్ త్వరగా "చర్చల టేబుల్ (Table)" వద్దకు వచ్చి, అందరికీ ఆమోదయోగ్యమైన, న్యాయమైన ఒప్పందాన్ని కుదుర్చుకుంటుందని ఆశిస్తున్నట్లు ట్రంప్ తెలిపారు. "అణ్వాయుధాలు వద్దు (NO NUCLEAR WEAPONS)" అనేదే తమ ప్రధాన అజెండా అని స్పష్టం చేశారు. సమయం మించిపోతోందని, పరిస్థితి చాలా కీలకంగా మారిందని ఆయన పేర్కొన్నారు.

గత దాడులను గుర్తు చేసిన ట్రంప్

గతంలో ఇరాన్‌తో జరిగిన ఘర్షణలను ప్రస్తావిస్తూ ట్రంప్ కీలక వ్యాఖ్యలు చేశారు. "నేను గతంలోనే ఇరాన్‌కు చెప్పాను, ఒప్పందం చేసుకోమని. అయినా వారు వినలేదు, ఫలితంగా 'ఆపరేషన్ మిడ్‌నైట్ హ్యామర్' (Operation Midnight Hammer) జరిగింది. అది ఇరాన్‌కు భారీ నష్టాన్ని మిగిల్చింది." అని గుర్తు చేశారు. ఇప్పుడు జరగబోయే దాడి దానికంటే చాలా రెట్లు భయంకరంగా ఉంటుందని, అటువంటి పరిస్థితి తెచ్చుకోవద్దని టెహ్రాన్‌ను స్పష్టం చేశారు.

ఇరాన్ త్వరగా చర్చలకు వస్తుందని ఆశిస్తున్నా. ఈ విషయంపై దృష్టి సారించినందుకు ధన్యవాదాలు.. అంటూ తన సందేశాన్ని ముగించారు.

https://x.com/WhiteHouse/status/2016485714930569524