Hoot Torpedo | అమెరికా గుండెల్లో దడ పుట్టించేలా ఇరాన్ ‘సూపర్ ఆయుధం’.. క్షణాల్లో యుద్ధనౌకలు బూడిదే!

Hoot Torpedo | త్రినేత్ర.న్యూస్ : ఇరాన్, అమెరికా మధ్య ఎప్పటినుంచో పచ్చగడ్డి వేస్తే భగ్గుమనే పరిస్థితులు నెలకొన్నాయి. హార్ముజ్ జలసంధిని తిరిగి తెరవడానికి బదులుగా నావికా దిగ్బంధనాన్ని ఎత్తివేయాలన్న టెహ్రాన్ డిమాండ్‌ను డొనాల్డ్ ట్రంప్ తిరస్కరించడంతో అమెరికాతో శాంతి చర్చలు ప్రతిష్టంభనకు గురయ్యాయి. ఈ తరుణంలో ఇరాన్ చేసిన ఒక ప్రకటన ప్రపంచ రక్షణ రంగంలో తీవ్ర చర్చనీయాంశంగా మారింది. శత్రువుల గుండెల్లో వణుకు పుట్టించే, వారికి "హార్ట్ ఎటాక్" తెప్పించే ఒక సరికొత్త రహస్య ఆయుధాన్ని ప్రయోగించనున్నట్లు ఇరాన్ వెల్లడించింది.

యుద్ధం కారణంగా ఇరాన్ నావికాదళం తీవ్రంగా దెబ్బతిన్నప్పటికీ, ఇరాన్ నావికాదళ కమాండర్ షహ్రామ్ ఇరానీ సంచలన వ్యాఖ్యలు చేశారు. "మేము శత్రువులకు అత్యంత సమీపంలోనే ఉన్నాం. త్వరలోనే మా కొత్త ఆయుధంతో దాడి చేస్తాం. ఆ దెబ్బకు వారికి హార్ట్ ఎటాక్ రాకూడదని ఆశిస్తున్నాను" అని హెచ్చరించారు. ఈ ప్రకటనతో ఆ రహస్య ఆయుధం ఏమై ఉంటుందా అనే ఉత్కంఠ మొదలైంది.

నిపుణులు ఏమంటున్నారంటే..

పలువురు రక్షణ రంగ నిపుణులు దీనిపై స్పందిస్తూ.. ఇరాన్ చెబుతున్న ఆ రహస్య ఆయుధం 'హూట్ (Hoot)' రాకెట్ టార్పెడో అయి ఉండొచ్చని అభిప్రాయపడుతున్నారు. దీనిని ఇరాన్ 2006వ సంవత్సరంలోనే అత్యంత రహస్యంగా పరీక్షించింది. బుల్లెట్ వేగంతో దూసుకెళ్లే ఈ ఆయుధాన్ని అడ్డుకోవడానికి శత్రువుల రక్షణ వ్యవస్థలకు కనీస సమయం కూడా దొరకదంటున్నారు.

 

అసలు ఈ 'హూట్ (Hoot)' టార్పెడో అంటే ఏమిటి?

పర్షియన్ భాషలో 'హూట్' అంటే తిమింగలం అని అర్థం. ఇది ప్రపంచంలోనే అత్యంత వేగవంతమైన అండర్ వాటర్ ఆయుధాల్లో ఒకటిగా ఇరాన్ పేర్కొంది. రష్యా తర్వాత సూపర్-కావిటేటింగ్ (super-cavitating) టార్పెడో కలిగిన రెండవ దేశం ఇరాన్ మాత్రమే. రష్యా తన సొంత వెర్షన్ అయిన VA-111 Shkval ను 1990లలోనే ప్రవేశపెట్టింది.

వేగం: సాధారణంగా నీటి అడుగున ప్రయాణించే టార్పెడోల (గైడెడ్ క్షిపణులు) వేగం గంటకు 60 నుంచి 100 కిలోమీటర్లు ఉంటుంది. కానీ, ఇరాన్ చెబుతున్న దాని ప్రకారం ఈ హూట్ వేగం నీటి అడుగున ఏకంగా గంటకు 360 కిలోమీటర్లు.

టెక్నాలజీ: నీటి సాంద్రత గాలి కంటే 1000 రెట్లు ఎక్కువ కాబట్టి, ఆయుధాలు నీటి అడుగున వేగాన్ని కోల్పోతాయి. కానీ సూపర్-కావిటేషన్ టెక్నాలజీ అలా కాదు. ఈ టార్పెడోలో సాలిడ్-ఫ్యూయల్డ్ రాకెట్ మోటార్ ఉంటుంది. ఇది ప్రయాణించేటప్పుడు తన చుట్టూ ఒక గ్యాస్ బబుల్ (వాయు బుడగ) ను సృష్టించుకుంటుంది. దీనివల్ల నీటి ఘర్షణ తగ్గిపోయి, సముద్రమే ఒక హై-స్పీడ్ రన్‌వేగా మారిపోతుంది.

విధ్వంసం: ఇది సుమారు 200 కిలోలకు పైగా అత్యంత శక్తివంతమైన పేలుడు పదార్థాలను మోసుకెళ్లగల ఫైర్ అండ్ ఫర్‌గెట్ (fire-and-forget) మిస్సైల్.

దీనికి ఉన్న లోపాలు ఏంటి?

వేగమే దీనికి ఉన్న ప్రధాన బలం, అదే దానికి శాపం కూడా. అత్యధిక వేగంతో దూసుకెళ్లడం వల్ల ఇది ఇంధనాన్ని చాలా వేగంగా దహించేస్తుంది. అందువల్ల ఈ హూట్ టార్పెడో (లేదా రష్యన్ Shkval) రేంజ్ కేవలం 15 కిలోమీటర్లు మాత్రమే. సాధారణ టార్పెడోలు సులభంగా 30 కిలోమీటర్ల వరకు ప్రయాణించగలవు.

ఇరాన్ 'హూట్', అమెరికా ఎయిర్‌క్రాఫ్ట్ క్యారియర్‌ను ముంచగలదా?

వాస్తవానికి ఈ టార్పెడోలను రియల్ టైమ్ యుద్ధ వాతావరణంలో ఇంకా పరీక్షించలేదు. ఈ సూపర్ టార్పెడోల వేగం, అవి చేసే శబ్దం, వాటి చుట్టూ ఉండే గ్యాస్ బుడగల వల్ల సోనార్ (SONAR) వ్యవస్థ సరిగ్గా పనిచేయదు. కాబట్టి వీటిని కచ్చితమైన లక్ష్యం వైపు గైడ్ చేయడం చాలా కష్టం.

అంతేకాకుండా, ఇరాన్ సమీపంలో మోహరించిన 'USS అబ్రహం లింకన్' వంటి భారీ అమెరికన్ ఎయిర్‌క్రాఫ్ట్ క్యారియర్‌లు బహుళ పొరల డిజైన్‌ను (Double/Triple hull), భారీ ఆర్మర్ బెల్ట్‌లను కలిగి ఉంటాయి. భారీ టార్పెడో దాడులను సైతం ఇవి తట్టుకోగలవు. వీటికి తోడు క్యారియర్ చుట్టూ డిస్ట్రాయర్లు, సబ్‌మెరైన్లు, ఫైటర్ జెట్‌లతో కూడిన 'క్యారియర్ స్ట్రైక్ గ్రూప్ (CSG)' రక్షణ వలయం వందల మైళ్ల మేర విస్తరించి ఉంటుంది. కాబట్టి, ఎంత వేగంగా దూసుకొచ్చినా.. ఇరాన్ ఆయుధం అమెరికా నౌకలను ముంచడం అంత సులభమైన విషయం కాదని రక్షణ నిపుణులు విశ్లేషిస్తున్నారు.