Murder | న‌డిరోడ్డుపై రియ‌ల్ట‌ర్ దారుణ హ‌త్య‌

Murder | తన పిల్లలను పాఠశాల వద్ద దింపి తిరుగు ప్రయాణమైన రియల్ ఎస్టేట్ వ్యాపారి (Realtor) వెంకటరత్నం (46) దారుణహత్యకు గురయ్యారు. ఈ ఘటన జవహర్నగర్ (Jawahar Nagar) పోలీస్ స్టేషన్ పరిధిలో చోటు చేసుకుంది. ద్విచక్రవాహనంపై వెళ్తున్న వెంకటరత్నంను సాకేత్ కాలనీ (Saket Colony)లోని ఫోస్టర్ బిల్లాబాంగ్ హై ఇంటర్నేషనల్ స్కూల్ సమీపంలో అటకాయించిన దుండగులు ముందుగా తుపాకీతో కాల్చి, కింద పడిపోయిన అతడిపై కత్తులతో మూకుమ్మడిగా దాడికి పాల్పడ్డారు. తీవ్ర కత్తిపోట్లకు గురైన వెంకటరత్నం అక్కడికక్కడే మృతి చెందాడు. అతడు మరణించాడని నిర్ధారించుకున్న అనంతరం ఒక ఆటో, ఒక ద్విచక్రవాహనంపై పరారయ్యారు. సమాచారం అందుకున్న పోలీసులు ఘటనా స్థలానికి చేరుకుని, అక్కడి నుంచి బుల్లెట్తో పాటు కత్తులు స్వాధీనం చేసుకున్నారు. వెంకటరత్నంపై ధూల్పేట్ (Dhoolpet) లో రౌడీషీట్ (Rowdy Sheet) ఉన్నట్లు గుర్తించారు. గతంలో జంట హత్యల కేసులో ఆయన నిందితుడిగా ఉన్నారు. ప్రత్యర్థులు చంపి ఉంటారా, ఆర్థిక లావాదేవీల కారణంగా హత్యకు గురయ్యారా అని పోలీసులు ఆరా తీస్తున్నారు. పోలీసులు కేసు నమోదు చేసుకుని దర్యాప్తు చేస్తున్నారు.