Axis Bank Digital Merchant Loan | చిరు వ్యాపారుల‌కు యాక్సిస్ బ్యాంక్ ఆఫర్‌.. సెక్యూరిటీ లేకుండానే రూ.20 ల‌క్ష‌ల వ‌ర‌కు లోన్‌..

Axis Bank Digital Merchant Loan | దేశంలోని సూక్ష్మ‌, చిన్న త‌ర‌హా వ్యాపారులు, చిరు వ్యాపారుల‌కు యాక్సిస్ బ్యాంక్ అద్భుత‌మైన ఆఫ‌ర్‌ను అందిస్తోంది. ఎలాంటి సెక్యూరిటీ లేకుండానే రూ.20 ల‌క్ష‌ల వ‌ర‌కు లోన్‌ను అందిస్తోంది. డిజిట‌ల్ మ‌ర్చంట్ క్యాష్ అడ్వాన్స్ లోన్స్ పేరిట యాక్సిస్ బ్యాంక్ ఓ ప్ర‌త్యేక లోన్ స్కీమ్‌ను ప్రారంభించింది. ఈ స్కీమ్ లో భాగంగా చిరు వ్యాపారులు లేదా సూక్ష్మ‌, చిన్న త‌ర‌హా వ్యాపారులు ఎలాంటి సెక్యూరిటీ లేకుండానే క‌నిష్టంగా రూ.2 ల‌క్ష‌ల నుంచి గ‌రిష్టంగా రూ.20 ల‌క్ష‌ల వ‌ర‌కు లోన్‌ను పొంద‌వ‌చ్చు. దీని వ‌ల్ల రిటెయిల్ షాప్స్ లాంటి వ్యాపారం నిర్వ‌హించే వారికి ఎంతో మేలు జ‌రుగుతుంద‌ని యాక్సిస్ బ్యాంక్ తెలియ‌జేసింది. ఈ లోన్ స్కీమ్ వ‌ల్ల వ్యాపారుల‌కు కావ‌ల్సిన ఆర్థిక స‌హాయం ల‌భిస్తుందని, దీంతో వారు డ‌బ్బు కోసం ఏవిధ‌మైన ఆందోళ‌న చెందకుండానే త‌మ రోజువారి వ్యాపార కార్య‌క‌లాపాల‌ను నిరాటంకంగా కొన‌సాగించ‌వ‌చ్చ‌ని తెలియ‌జేసింది.

చాలా త్వ‌ర‌గా లోన్‌..

దేశంలోనే మొద‌టి సారిగా ఈ త‌ర‌హా లోన్ స్కీమ్‌ను తామే అందిస్తున్నామ‌ని యాక్సిస్ బ్యాంకు తెలియజేసింది. సాధార‌ణంగా వ్యాపారుల‌కు లోన్ కావాలంటే సెక్యూరిటీగా ఏదైనా స‌మ‌ర్పించాల్సి ఉంటుంద‌ని, పైగా ప‌త్రాల ప‌రిశీల‌న‌, రుణ మంజూరుకు స‌మ‌యం ప‌డుతుంద‌ని, కానీ తాము ప్ర‌వేశ‌పెట్టిన డిజిట‌ల్ మ‌ర్చంట్ క్యాష్ అడ్వాన్స్ లోన్స్ స్కీమ్‌లో భాగంగా ఎలాంటి సెక్యూరిటీని స‌మ‌ర్పించాల్సిన అవస‌రం లేద‌ని యాక్సిస్ బ్యాంకు క‌మ‌ర్షియ‌ల్ బ్యాంకింగ్ గ్రూప్ ప్రెసిడెంట్ విజ‌య్ శెట్టి తెలిపారు. అలాగే వ్యాపారుల రోజువారి లావాదేవీల వివ‌రాల‌ను, ఇత‌ర ప‌త్రాలు స‌మ‌ర్పిస్తే తాము క్ష‌ణాల్లోనే రుణాన్ని అందిస్తామ‌ని, దీంతో వ్యాపార లావాదేవీల‌కు ఎలాంటి ఆటంకం ఏర్ప‌డ‌కుండా ఉంటుంద‌ని అన్నారు. సాధార‌ణ లోన్ల‌కు రోజుల త‌ర‌బ‌డి స‌మ‌యం ప‌డుతుంద‌ని, కానీ తాము ప్ర‌వేశ‌పెట్టిన ఈ స్కీమ్ వ‌ల్ల చాలా త్వ‌ర‌గా లోన్ పొంద‌వ‌చ్చ‌ని తెలిపారు.

రోజువారి ఈఎంఐ..

ఈ స్కీమ్‌లో భాగంగా వ్యాపారులు తాము తీసుకునే రుణానికి గాను భారీ ఎత్తున నెల‌వారి ఈఎంఐ ల‌ను చెల్లించాల్సిన అవ‌స‌రం లేదు. రోజువారి వాయిదాల ప‌ద్ద‌తిలోనూ రుణాన్ని చెల్లించ‌వ‌చ్చు. దీన్నే Everyday Installment (EDI) మోడ‌ల్‌గా యాక్సిస్ బ్యాంకు వ్య‌వ‌హ‌రిస్తోంది. వ్యాపారులు త‌మ రుణాన్ని రోజువారి వాయిదాల్లో చెల్లించ‌వ‌చ్చు. ఏరోజుకారోజు త‌మ‌కు అయ్యే వ్యాపారాన్ని బ‌ట్టి కూడా రుణ ఈఎంఐ చెల్లింపులు చేయ‌వ‌చ్చ‌ని యాక్సిస్ బ్యాంకు తెలియ‌జేసింది. దీని వ‌ల్ల నెల‌వారి ఈఎంఐల ప‌ట్ల ఆందోళ‌న చెందాల్సిన అవ‌స‌రం ఉండ‌ద‌ని పేర్కొంది. కాగా తాము అందిస్తున్న ఈ లోన్ స్కీమ్ వ‌ల్ల దేశంలోని చిరు వ్యాపారులు, ఎంఎస్ఎంఈల‌కు ఎంత‌గానో ఉప‌యోగం ఉంటుంద‌ని యాక్సిస్ బ్యాంక్ అభిప్రాయం వ్య‌క్తం చేసింది.