vivo T5 | 7000 ఎంఏహెచ్ భారీ బ్యాట‌రీ, వాట‌ర్‌, డ‌స్ట్ రెసిస్టెన్స్‌తో వివో కొత్త ఫోన్‌.. ధ‌ర ఎంతంటే..

vivo T5 | వివో ఇండియా తన పనితీరుపై ప్రధానంగా దృష్టి సారించిన సిరీస్ టి స్మార్ట్‌ఫోన్‌ పోర్ట్‌ఫోలియోలో కొత్తగా వివో టి5ను విడుదల చేసింది. పనితీరు, ఫోన్‌లోనే కృత్రిమ మేధస్సు సామర్థ్యాలు, బ్యాటరీ బ్యాకప్, డిస్‌ప్లే నాణ్యతపై ప్రత్యేకంగా దృష్టి సారిస్తూ ఈ ఫోన్‌ను అల్ట్రా-స్లిమ్ డిజైన్‌తో తీసుకొచ్చింది. వివో టి5లో మీడియాటెక్ డైమెన్సిటీ 7500 టర్బో ప్రాసెసర్‌ను అందించారు. ఆక్టాకోర్ చిప్‌లో క్రేక్ జీపీయూ, 8వ తరం జెన్‌ఏఐ-రెడీ ఎన్‌పీయూ ఉన్నాయి. వీటి ద్వారా క్లౌడ్ సర్వర్లపై తక్కువ ఆధారపడుతూ ఫోన్‌లోనే కృత్రిమ మేధస్సు పనులను నిర్వహించవచ్చు. ఉదాహరణకు 3 బిలియన్ పారామీటర్ల లార్జ్ లాంగ్వేజ్ మోడల్‌ను సెకనుకు సుమారు 10 టోకెన్ల వేగంతో అమలు చేస్తుందని కంపెనీ తెలిపింది. ఎక్కువసేపు వినియోగించినప్పుడు ఉత్పత్తయ్యే వేడిని నియంత్రించేందుకు వేపర్ ఛాంబర్ కూలింగ్ యూనిట్‌ను ఇచ్చారు. రియల్‌టైమ్ ఉష్ణోగ్రత పర్యవేక్షణ కోసం 10 టెంపరేచర్ సెన్సార్లను అందించారు.

ప‌వ‌ర్‌ఫుల్ డిస్‌ప్లే..

వివో టి5లో 6.83 ఇంచుల 1.5కె 3డి కర్వ్డ్ అమోలెడ్ డిస్‌ప్లే ఉంది. ఇది 144 హెడ్జ్‌ రిఫ్రెష్ రేట్ ను క‌లిగి ఉంది. గరిష్ఠంగా 2000 నిట్స్ హై బ్రైట్‌నెస్ మోడ్‌ను సపోర్ట్ చేస్తుంది. హెచ్‌డీఆర్10 ప్ల‌స్ సర్టిఫికేషన్‌తో పాటు తక్కువ బ్లూ లైట్, తక్కువ ఫ్లికర్, ఎండలో మెరుగైన విజిబిలిటీ కోసం ఎస్‌జీఎస్ ధ్రువీకరణలు ఉన్నాయి. కళ్ల రక్షణ కోసం ఐ ప్రొటెక్షన్ మోడ్, నిద్ర సమయంలో సౌకర్యవంతమైన వీక్షణ కోసం స్లీప్ కంఫర్ట్ మోడ్, ఎక్కువసేపు స్క్రీన్ చూసే సమయంలో అలసటను తగ్గించేందుకు యాంటీ-ఫ‌టీగ్ బ్రైట్‌నెస్ అడ్జస్ట్‌మెంట్ వంటి ఫీచర్లను కూడా అందించారు. ఆడియో కోసం సిమెట్రికల్ డ్యుయల్ స్టీరియో స్పీకర్లతోపాటు తక్కువ వాల్యూమ్‌లో బాస్‌ను పెంచే వివో వీఈక్యూ అల్గారిథమ్ ఉంది. ఈ ఫోన్‌ను రాయల్ బ్రాంజ్, సిల్వర్ గ్రీన్ రంగుల్లో లాంచ్ చేశారు. వెనుక భాగంలో 50 మెగాపిక్స‌ల్ ప్రధాన సెన్సార్‌, 8 మెగాపిక్స‌ల్ అల్ట్రా వైడ్ కెమెరా ఉన్నాయి. సెల్ఫీలు, వీడియో కాల్స్ కోసం ముందు భాగంలో 32 మెగాపిక్స‌ల్ కెమెరా ఇచ్చారు.

భారీ బ్యాట‌రీ..

వివో టి5లో 7050ఎంఏహెచ్ భారీ బ్యాటరీని అందించారు. కనీసం 80 శాతం ప్రభావవంతమైన సామర్థ్యాన్ని కొనసాగిస్తూ 1600 ఛార్జ్-డిశ్చార్జ్ సైకిళ్ల వరకు బ్యాటరీ పనిచేసేలా రూపొందించినట్లు కంపెనీ తెలిపింది. 44 వాట్ల ఫ్లాష్‌ఛార్జ్‌కు మద్దతు ఉండగా, పూర్తిగా ఖాళీ అయిన బ్యాటరీని 30 నిమిషాల్లో 44 శాతం వరకు ఛార్జ్ చేయవచ్చు. బ్యాటరీ కీలక స్థాయికి పడిపోయినప్పుడు ప్రాథమిక కనెక్టివిటీని కొనసాగించేందుకు బ్యాటరీ లైఫ్ ఎక్స్‌టెండర్ ఫీచర్ పనిచేస్తుంది. అలాగే బ్యాటరీ 20 శాతానికి పైగా ఉన్నప్పుడు గ్లోబల్ బైపాస్ ఛార్జింగ్ ద్వారా విద్యుత్‌ను నేరుగా సిస్టమ్ భాగాలకు అందించి, ఫోన్ వినియోగిస్తున్న సమయంలో వేడి పెరగకుండా సహాయపడుతుంది. ఈ ఫోన్‌లో ఆండ్రాయిడ్ ఆధారిత ఆరిజిన్ ఓఎస్ 6.0ను ఇచ్చారు. దీనికి మూడు ఆండ్రాయిడ్ వెర్షన్ అప్‌గ్రేడ్‌లు, ఐదేళ్ల సెక్యూరిటీ అప్‌డేట్‌లను అందించనున్నట్లు కంపెనీ ప్రకటించింది. వివో ఆఫీస్ కిట్ ద్వారా పీసీ మిర్రరింగ్, సర్కిల్ టు సెర్చ్ 2.0, ఏఐ ట్రాన్స్‌క్రిప్ట్ అసిస్ట్, ప్రైవేట్ వర్క్‌స్పేస్ విభజన వంటి ఉత్పాదకత ఫీచర్లు ఇందులో ఉన్నాయి. ఫోన్‌కు ఐపీ68, ఐపీ69 రేటింగ్‌లు ఉన్నాయి. దీంతో అధిక పీడనంతో వచ్చే నీటి జెట్లను, నీటిలో మునిగే పరిస్థితులను తట్టుకునే రక్షణ లభిస్తుంది. మిలిటరీ స్టాండర్డ్ ఎంఐఎల్-ఎస్‌టీడీ-810హెచ్ మన్నికా ప్రమాణాలకు అనుగుణంగా రూపొందించారు.

ధ‌ర ఎంతంటే..

వివో టి5 విక్రయాలు సెప్టెంబర్ 9 నుంచి ప్రారంభమవుతాయి. ఫ్లిప్‌కార్ట్, వివో ఇండియా ఈ-స్టోర్, భాగస్వామ్య ఆఫ్‌లైన్ రిటైల్ స్టోర్ల ద్వారా ఈ ఫోన్‌ను కొనుగోలు చేయవచ్చు. 6జీబీ, 128జీబీ వేరియంట్ ధర రూ.34,999 కాగా లాంచ్ ఆఫర్ తర్వాత నెట్ ఎఫెక్టివ్ ధర రూ.31,499గా ఉంటుంది. 8జీబీ, 128జీబీ వేరియంట్ ధర రూ.39,999, ఆఫర్ ధర రూ.35,999గా ఉంది. 8జీబీ, 256జీబీ మోడల్ ధర రూ.44,999 కాగా ఆఫర్ ధర రూ.40,999గా ఉంది. టాప్ ఎండ్ 12జీబీ, 256జీబీ వేరియంట్ ధర రూ.49,999 కాగా ఆఫర్ తర్వాత రూ.45,999కు లభిస్తుంది. లాంచ్ ఆఫర్‌లో హెచ్‌డీఎఫ్‌సీ, ఎస్‌బీఐ, యాక్సిస్ బ్యాంక్ కార్డులతో బేస్ వేరియంట్‌పై రూ.3,500, మిగిలిన వేరియంట్లపై రూ.4వేల వరకు కార్డ్ డిస్కౌంట్ లభిస్తుంది. దీనికి అదనంగా వర్తించే ఆరు నెలల నో-కాస్ట్ ఈఎంఐ ఆప్షన్లు కూడా ఉన్నాయి.