Microsoft | మైక్రోసాఫ్ట్‌కు తొలి వెరా రూబిన్ ఏఐ ప్లాట్‌ఫామ్.. కీలక మైలురాయి..

Microsoft | మైక్రోసాఫ్ట్ సంస్థ తొలి ఉత్పత్తి స్థాయి ఎన్విడియా వెరా రూబిన్ ఆర్టిఫిషియల్ ఇంటెలిజెన్స్ ప్లాట్‌ఫామ్‌ను అందుకుంది. అత్యున్నత స్థాయి ఆర్టిఫిషియల్ ఇంటెలిజెన్స్ మౌలిక సదుపాయాల విస్తరణలో ఇది కీలక మైలురాయిగా నిలిచింది. మైక్రోసాఫ్ట్ సీఈఓ సత్య నాదెళ్ల ఈ విషయాన్ని త‌న ఎక్స్ ఖాతాలో వెల్లడించారు. మైక్రోసాఫ్ట్ డేటా సెంటర్లకు తొలి ఉత్పత్తి స్థాయి వెరా రూబిన్ వ్యవస్థలు చేరుకున్నాయని తెలిపారు. ఈ మైలురాయిని సాధించేందుకు కృషి చేసిన ఎన్విడియా భాగస్వాములు, మైక్రోసాఫ్ట్ అజూర్ హార్డ్‌వేర్, డేటా సెంటర్ బృందాలకు ఆయన కృతజ్ఞతలు తెలిపారు. ఎన్విడియా కూడా ఈ భాగస్వామ్యాన్ని ధ్రువీకరించింది. వెరా రూబిన్ పూర్తి స్థాయి ఉత్పత్తి దిశగా వేగంగా విస్తరిస్తోందని పేర్కొంది. ఈ కీలక మైలురాయిని సాధించిన మైక్రోసాఫ్ట్ బృందాలకు అభినందనలు తెలిపింది.

ఏంటీ వెరా రూబిన్‌..?

ఎన్విడియా వెరా రూబిన్ ప్లాట్‌ఫామ్ బ్లాక్‌వెల్ సిరీస్‌కు కొన‌సాగింపుగా వ‌చ్చిన‌ తదుపరి తరం ఏఐ డేటా సెంటర్, సూపర్ కంప్యూటర్ ఆర్కిటెక్చర్. ప్రముఖ ఖగోళ శాస్త్రవేత్త వెరా రూబిన్ పేరును ఈ ప్లాట్‌ఫామ్‌కు పెట్టారు. ఏజెంటిక్ ఏఐ అవసరాలను దృష్టిలో ఉంచుకుని రూపొందించిన ఈ వ్యవస్థలో ప్రత్యేకంగా తయారు చేసిన వెరా సీపీయూలు, రూబిన్ జీపీయూలు, అధునాతన హెచ్‌బీఎం4 మెమరీ, ఎన్వీలింక్ 6 ఇంటర్‌కనెక్ట్ టెక్నాలజీని సమగ్రంగా ఉపయోగిస్తున్నారు. వెరా రూబిన్ ప్లాట్‌ఫామ్ ను ప్రధానంగా ఏజెంటిక్ ఏఐ కోసం రూపొందించారు. బహుళ దశల్లో సమస్యలను పరిష్కరించడం, క్లిష్టమైన రీజనింగ్ పనులు చేయడం, భారీ స్థాయి కాంటెక్స్ట్‌తో కూడిన వర్క్‌ఫ్లోలను నిర్వహించడం వంటి పనుల్లో అధిక పనితీరు అందించేలా దీన్ని అభివృద్ధి చేశారు.

https://twitter.com/satyanadella/status/2090929770779521310?s=20

త‌క్కువ విద్యుత్‌తో ఎక్కువ ఏఐ ప‌వ‌ర్‌..

ఇక సామర్థ్యం పరంగా కూడా వెరా రూబిన్ కీలకమైన మెరుగుదలను అందించనుంది. గత తరం ఆర్కిటెక్చర్లతో పోలిస్తే ప్రతి వాట్ విద్యుత్ వినియోగానికి ఇన్‌ఫరెన్స్ త్రూపుట్‌ను 10 రెట్ల‌ వరకు పెంచగలిగే సామర్థ్యం దీనికి ఉందని ఎన్విడియా పేర్కొంటోంది. అంటే తక్కువ విద్యుత్ వినియోగంతో మరింత ఏఐ ప్రాసెసింగ్‌ను నిర్వహించేందుకు ఈ ప్లాట్‌ఫామ్ సహాయపడుతుంది. చిప్ స్థాయిలో కూడా వెరా రూబిన్‌లో భారీ మార్పులు ఉన్నాయి. ప్రత్యేకమైన సీపీయూలు, అధిక సామర్థ్యం కలిగిన కొత్త తరం జీపీయూలతో పాటు కనెక్ట్‌ఎక్స్-9 సూపర్‌నిక్స్, బ్లూఫీల్డ్-4 డీపీయూలను ఒకే సమగ్ర ర్యాక్ వ్యవస్థలో అనుసంధానించారు. ఈ సమీకృత నిర్మాణం పెద్ద స్థాయిలో ఏఐ మోడళ్లకు శిక్షణ ఇవ్వడం, అమలు చేయడం, రీజనింగ్ పనులను వేగంగా నిర్వహించేందుకు ప‌నిచేస్తుంది. వెరా రూబిన్ సీపీయూ, రూబిన్ జీపీయూ సాంకేతిక స్పెసిఫికేషన్లు, బ్లాక్‌వెల్ ఆర్కిటెక్చర్‌తో దీనికి ఉన్న తేడాలు, అలాగే దీని విడుదల సమయక్రమం, ఉత్పత్తి స్థితి వంటి అంశాలు ఈ ప్లాట్‌ఫామ్‌పై మరింత స్పష్టమైన అవగాహనకు కీలకంగా ఉన్నాయి.