Google | జీమెయిల్, డాక్స్‌లో గూగుల్ కొత్త వాయిస్ ఫీచర్లు

Google | గూగుల్ జీమెయిల్, గూగుల్ డాక్స్, గూగుల్ కీప్‌లో కొత్త వాయిస్ ఫీచ‌ర్ల‌ను అందుబాటులోకి తీసుకొచ్చింది. జెమిని ఆడియో మోడల్స్ ఆధారంగా పనిచేసే ఈ ఫీచర్లతో వినియోగదారులు తమ ఇన్‌బాక్స్‌లో సమాచారాన్ని వెతకడం, డాక్యుమెంట్లను రూపొందించడం, మాట్లాడిన ఆలోచనలను క్రమబద్ధమైన నోట్స్‌గా మార్చడం వంటి పనులను రియల్‌టైమ్ సంభాషణల ద్వారా చేయవచ్చు. గూగుల్ గతంలో జరిగిన ఐవోలో వర్క్‌స్పేస్ కోసం జెమిని ఆడియో మోడల్స్‌ను ప్రివ్యూ చేసింది. ఇప్పుడు జీమెయిల్, డాక్స్, కీప్‌లో ఈ కొత్త ఫీచర్ల‌ను అందుబాటులోకి తీసుకొచ్చింది. జీమెయిల్ లైవ్ ద్వారా ఇన్‌బాక్స్‌లో సంభాషణాత్మక సెర్చ్‌ను ఉపయోగించుకోవచ్చు. ఉదాహరణకు నా ఫ్లైట్ గేట్ నంబర్ ఎంత? లేదా ఈ వారం నా పిల్లల స్కూల్‌లో ఏం జరుగుతోంది? వంటి ప్రశ్నలను అడిగితే, జీమెయిల్ లైవ్ ఇన్‌బాక్స్‌లోని ఈ-మెయిల్స్‌ను పరిశీలించి సమాధానాన్ని అందిస్తుంది. దీంతో వినియోగదారులు ఒక్కో ఈ-మెయిల్ థ్రెడ్‌ను మాన్యువల్‌గా వెతకాల్సిన అవసరం లేకుండా, సాధారణంగా ప్రశ్న అడగడం ద్వారా తమ ఈ-మెయిల్స్‌లోని సమాచారాన్ని తెలుసుకోవ‌చ్చు.

గూగుల్ డాక్స్, కీప్‌..

గూగుల్ డాక్స్‌లో డాక్స్ లైవ్ హ్యాండ్స్‌ఫ్రీ సంభాషణ అనుభవాన్ని అందిస్తుంది. వినియోగదారులు తమ ఆలోచనలను మాట్లాడుతుంటే, డాక్స్ లైవ్ వాటిని రియల్‌టైమ్‌లో అర్థం చేసుకుని క్రమబద్ధమైన, సందర్భానికి అనుగుణమైన డాక్యుమెంట్‌గా రూపొందిస్తుంది. ఇది ఆలోచనలను క్రమబద్ధీకరించడం, డాక్యుమెంట్‌కు సరైన నిర్మాణాన్ని రూపొందించడం, మొదటి డ్రాఫ్ట్‌ను సిద్ధం చేయడం, కంటెంట్‌ను అవుట్‌లైన్ చేయడం, దాని టోన్‌ను మెరుగుపరచడం వంటి పనుల్లో సహాయపడుతుంది. వినియోగదారు అనుమతి ఇస్తే డాక్స్ లైవ్ జీమెయిల్, డ్రైవ్, చాట్‌తో పాటు విస్తృత వెబ్ నుంచి కూడా సంబంధిత వివరాలను సేకరిస్తుంది. అలాగే గూగుల్ కీప్‌లో కీప్ లైవ్ వాయిస్ ద్వారా ఆలోచనలను నమోదు చేసి, వాటిని క్రమబద్ధీకరించడానికి, మెరుగుపరచడానికి ఉపయోగపడుతుంది. వినియోగదారులు తమకు వచ్చిన ఆలోచనలను ఎలాంటి క్రమం లేకుండా వరుసగా మాట్లాడవచ్చు. ఈ వాయిస్ ఇన్‌పుట్‌ను బ్యాక్‌గ్రౌండ్‌లో ప్రాసెస్ చేసే కీప్ లైవ్, ఆలోచనలను అర్థవంతమైన నోట్స్‌గా మార్చుతుంది. మాట్లాడిన సమాచారాన్ని క్రమబద్ధమైన లిస్టులు, నోట్స్‌గా మార్చడం ద్వారా టైప్ చేయకుండానే ఆలోచనలను నమోదు చేసుకోవడంతో పాటు వాటిని సులభంగా ఆర్గనైజ్ చేసుకోవచ్చు.

ఈ కొత్త సంభాషణాత్మక ఫీచర్లు ఈ వారం నుంచి దశలవారీగా అందుబాటులోకి వస్తున్నాయి. జీమెయిల్ లైవ్, కీప్ లైవ్ ఫీచర్లు గూగుల్ ఏఐ ప్లస్,ప్రొ, అల్ట్రా సబ్‌స్క్రైబర్లకు అందుబాటులో ఉంటాయి. డాక్స్ లైవ్ మాత్రం గూగుల్ ఏఐ ప్రొ, అల్ట్రా సబ్‌స్క్రైబర్లకు అందుబాటులో ఉంటుంది. గూగుల్ వర్క్‌స్పేస్ బిజినెస్ కస్టమర్లకు ఈ ఫీచర్లు త్వరలో అందుబాటులోకి రానున్నాయి.