Anthropic | ఆంథ్రోపిక్‌ నుంచి క్లాడ్‌ ఫేబుల్‌ 5.1, మిథోస్‌ 5.1.. ప్రత్యేకతలివే..

Anthropic | ఆంథ్రోపిక్‌ కొత్తగా క్లాడ్‌ ఫేబుల్‌ 5.1, క్లాడ్‌ మిథోస్‌ 5.1 మోడళ్లను లాంచ్ చేసింది. రెండూ ఒకే ప్రాథమిక మోడల్‌పై ఆధారపడి ఉన్నప్పటికీ, వాటిలో భద్రతా పరిమితులు వేర్వేరుగా ఉంటాయి. ఫేబుల్‌ 5.1ను సాధారణ వినియోగం కోసం రూపొందించగా, మిథోస్‌ 5.1ను ధ్రువీకరించిన సైబర్‌ సెక్యూరిటీ, లైఫ్‌ సైన్సెస్‌ వినియోగదారులను దృష్టిలో ఉంచుకుని అందిస్తోంది. క్లాడ్‌ ఫేబుల్‌ 5.1ను కోడింగ్‌, నాలెడ్జ్‌ వర్క్‌, ఎక్కువ సమయం పట్టే సమస్యల పరిష్కారం కోసం రూపొందించారు. తక్కువ, మధ్యస్థ స్థాయి ప్రయత్న సామర్థ్యాలతోనే కొన్ని పనుల్లో ఫేబుల్‌ 5 కంటే సమానంగా లేదా మెరుగైన ఫలితాలను తక్కువ కంప్యూటింగ్‌ వనరులతో అందిస్తుంద‌ని ఆంథ్రోపిక్‌ చెబుతోంది. క్లాడ్‌ కోడ్‌లో ఇది డిఫాల్ట్‌గా హై ఎఫర్ట్‌ స్థాయిలో, క్లాడ్‌ కోవర్క్‌, క్లాడ్‌.ఏఐలో మీడియం ఎఫర్ట్‌ స్థాయిలో పనిచేస్తుంది. ఇన్వెస్ట్‌మెంట్‌ సంస్థ మిలీనియం కూడా దీనిని ఉపయోగించి, ఎన్నో ఏళ్లుగా పరిష్కారం కాని అరుదైన అంతర్గత సిస్టమ్‌ క్రాష్‌కు కారణాన్ని గుర్తించింది.

పాత మోడ‌ల్స్‌తో పోలిస్తే మ‌రింత మెరుగుద‌ల‌..

ఆంథ్రోపిక్‌ ఈ మోడళ్లను మాలిక్యులర్‌ డిజైన్‌, కంప్యూటేషనల్‌ అనాలిసిస్‌, కంప్యూటేషనల్‌ బయాలజీ వంటి రంగాల్లో పరీక్షించింది. మిథోస్‌ 5.1 ఓపెన్‌ సోర్స్‌ ప్రోటీన్‌ డిజైన్‌, ఫోల్డింగ్‌ టూల్స్‌ను ఉపయోగించి మాలిక్యులర్‌ డిజైన్‌ పనులు చేసింది. మూడు లక్ష్యాల్లో అత్యుత్తమ అడాప్టివ్‌ బయో పోటీ డిజైన్లతో పోలిస్తే 10 రెట్లు అధిక బైండింగ్‌ అఫినిటీని సాధించింది. 12 లక్ష్యాల్లో దాదాపు 50 శాతం విజయవంతమైన బైండర్లను గుర్తించింది. సాధారణంగా ప్రోటీన్‌ డిజైన్‌లో విజయవంతమైన హిట్‌ రేటు 10 నుంచి 15 శాతం మధ్య ఉంటుందని ఆంథ్రోపిక్‌ తెలిపింది. ఫేబుల్‌ 5.1 నాసా మాగెల్లాన్‌ రాడార్‌ చిత్రాలను ఉపయోగించి శుక్రగ్రహంలోని దాదాపు మూడో వంతు ప్రాంతానికి హై-రిజల్యూషన్‌ ఎలివేషన్‌ మ్యాప్‌ను రూపొందించింది. సాధారణంగా 10 నుంచి 20 కిలోమీటర్ల వివరాలు కనిపించే మ్యాప్‌లతో పోలిస్తే ఇందులో 2 నుంచి 3 కిలోమీటర్ల స్థాయి వివరాలు అందుబాటులో ఉన్నాయి. ఎత్తులను కూడా 25 శాతం వరకు మరింత కచ్చితంగా కొలిచింది. నాసా వెరిటాస్‌, ఈఎస్ఏ ఎన్విజన్‌ మిషన్లకు ముందుగానే దీనిని క్రియేటివ్‌ కామన్స్‌ లైసెన్స్‌ కింద విడుదల చేయాలని ఆంథ్రోపిక్‌ భావిస్తోంది.

60 శాతం వ‌ర‌కు ఖ‌ర్చులు త‌గ్గే చాన్స్‌..

మిథోస్‌ 5.1 ఏడు ఓపెన్‌ సోర్స్‌ డీప్‌ లెర్నింగ్‌ మోడళ్లను వేగవంతం చేసేందుకు కస్టమ్‌ జీపీయూ కర్నల్స్‌, క్యాష్‌ చేసిన ఇంటర్మీడియట్‌ ఫలితాలను రూపొందించింది. ఫలితాలు మారకుండా వేగాన్ని 2.5 రెట్లు పెంచింది. ఈ ఆప్టిమైజేషన్లతో జీపీయూ ఖర్చులను 30 నుంచి 60 శాతం వరకు తగ్గించే అవకాశం ఉందని కంపెనీ తెలిపింది. వీటిని ఓపెన్‌ సోర్స్‌ చేయనుంది. శాస్త్రీయ రంగానికి మోడల్‌ హార్డ్‌వేర్‌ స్టాండర్డ్‌ ద్వారా క్లాడ్‌ ప్రయోగశాల పరికరాలను నేరుగా, సురక్షితంగా నిర్వహిస్తుంది. అధిక ప్రభావం చూపే పరిశోధనలపై పనిచేసే శాస్త్రవేత్తలకు ఏఐ ఫర్‌ సైన్స్‌ కార్యక్రమం ద్వారా ఉచిత క్రెడిట్లు అందిస్తారు. అలాగే క్లాడ్‌ టీమ్‌ ద్వారా శాస్త్రవేత్తలకు రాయితీ వినియోగాన్ని అందిస్తున్నారు.

ఎవ‌రెవ‌రికి అందుబాటులో..

ఆంథ్రోపిక్‌ ఈ మోడళ్లను రసాయన, బయోలాజికల్‌ ప్రమాదాలు, సైబర్‌ సెక్యూరిటీ, ఏజెంటిక్‌ సేఫ్టీ, అలైన్‌మెంట్‌ అంశాల్లో పరీక్షించింది. ఇందులో ఆటోమేటెడ్‌ మూల్యాంకనాలు, నిపుణుల రెడ్‌ టీమింగ్‌, బాహ్య పరీక్షలను ఉపయోగించింది. క్లాడ్‌ ఫేబుల్‌ 5.1 ప్రస్తుతం ఆంథ్రోపిక్‌ ప్లాట్‌ఫామ్‌లతో పాటు ఏడబ్ల్యూఎస్‌, గూగుల్‌ క్లౌడ్‌, మైక్రోసాఫ్ట్‌ అజూర్‌లో అందుబాటులో ఉంది. డెవలపర్లు క్లాడ్‌ ఏపీఐ ద్వారా క్లాడ్‌-ఫేబుల్ 5.1ను ఉపయోగించవచ్చు. క్యాష్‌-రీడ్‌ ధర 75 శాతం తగ్గి ప్రతి మిలియన్‌ టోకెన్లకు 0.25 డాలర్లుగా ఉంది. సాధారణ పనుల్లో ఫేబుల్‌ 5తో పోలిస్తే సుమారు 25 శాతం తక్కువ ఖర్చవుతుంది. క్లిష్టమైన కోడింగ్‌, అధిక ఏజెంటిక్‌ పనుల్లో దాదాపు 45 శాతం వరకు ఆదా అయ్యే అవకాశం ఉంది. ఫేబుల్‌ 5.1 ఇన్‌పుట్‌ ధర ప్రతి మిలియన్‌ టోకెన్లకు 10 డాలర్లు కాగా, అవుట్‌పుట్‌ ధర ప్రతి మిలియన్‌ టోకెన్లకు 50 డాలర్లుగా ఉంది. క్లాడ్‌ మిథోస్‌ 5.1 ప్రస్తుతం ధ్రువీకరించిన సైబర్‌ డిఫెండర్లు, లైఫ్‌ సైన్స్‌ నిపుణులకు మాత్రమే నమ్మకమైన యాక్సెస్‌ ప్రోగ్రామ్‌ల ద్వారా అందుబాటులో ఉంది. ప్రస్తుతానికి ఇది అమెరికాలోని ఎంపిక చేసిన సంస్థలకు పరిమితం కాగా, భవిష్యత్తులో మరిన్ని దేశీయ, అంతర్జాతీయ భాగస్వాములకు విస్తరించనున్నట్లు ఆంథ్రోపిక్‌ తెలిపింది.