Sunil Gavaskar | హార్దిక్‌ పాండ్యాకు ప్రత్యామ్నాయం కష్టమే.. బీసీసీఐ సునీల్ గ‌వాస్క‌ర్ అడ్వైజ్‌

Sunil Gavaskar | భారత క్రికెట్‌ జట్టులో హార్దిక్‌ పాండ్యా పాత్రను భర్తీ చేయడం అంత సులభం కాదని మాజీ కెప్టెన్‌ సునీల్‌ గవాస్కర్‌ అభిప్రాయపడ్డారు. అతడికి ప్రత్యామ్నాయాన్ని వెతకడం కంటే.. జట్టు అవసరాలకు తగ్గట్టుగా విభిన్న పాత్రలు పోషించగల ఆటగాళ్లను సిద్ధం చేయాలని సూచించారు. బ్యాటింగ్‌ ఆర్డర్‌ను ఎనిమిదో స్థానం వరకు బలోపేతం చేసే ప్రయత్నంలో బౌలింగ్‌ సామర్థ్యాన్ని తగ్గించుకోవద్దని స్పష్టం చేశారు. జట్టులో కనీసం నలుగురు స్పెషలిస్ట్‌ బౌలర్లు ఉండాలని, ఐదు, ఆరు బౌలింగ్‌ ఆప్షన్లుగా ఆల్‌రౌండర్లను ఉపయోగించుకోవాలని పేర్కొన్నారు.

హార్దిక్‌లాంటి ఆటగాడు దొరకడం కష్టం

వెస్టిండీస్‌తో శనివారం బెంగళూరులో జరగాల్సిన ఐదో టీ20 వర్షం కారణంగా రద్దయిన అనంతరం గవాస్కర్‌ ఈ వ్యాఖ్యలు చేశారు. ‘హార్దిక్‌ పాండ్యాకు ప్రత్యామ్నాయం కోసం మనం కొన్నిసార్లు ఎక్కువగా ఆలోచిస్తుంటాం. కానీ అత‌నికి సరైన ప్రత్యామ్నాయం దొరకడం కష్టం. అతడి స్థాయి ఆటగాడు లభించకపోతే.. జట్టు కోసం కొంత భిన్నమైన పాత్ర పోషించగల ఆటగాడిని ఎంపిక చేసుకోవాలి’ అని సూచించారు. నమన్‌ ధీర్‌ ఉదాహరణను ప్రస్తావిస్తూ.. అతడు బ్యాటింగ్‌తో పాటు బౌలింగ్‌లోనూ జట్టుకు ఉపయోగపడగలడని గవాస్కర్‌ పేర్కొన్నారు. ‘నమన్‌ ధీర్‌ తన బౌలింగ్‌ బాధ్యతలను చక్కగా నిర్వర్తిస్తున్నాడు. ఈ మ్యాచ్‌లో అతడి బ్యాటింగ్‌ను కూడా గమనించండి. ఈ సిరీస్‌ నుంచి భారత్‌ నేర్చుకోవాల్సిన విషయం ఏమిటంటే.. కనీసం నలుగురు రెగ్యులర్‌ బౌలర్లతో బరిలోకి దిగాలి. ఐదు, ఆరు బౌలింగ్‌ ఆప్షన్లుగా బ్యాటింగ్‌ చేయగల ఆల్‌రౌండర్లను ఉపయోగించుకోవాలి’ అని సూచించారు. నమన్‌ ధీర్‌ ప్రధానంగా బ్యాటర్‌ అయినప్పటికీ రెండు, మూడు ఓవర్లు వేయగలడని.. అక్షర్‌ పటేల్‌ తన నాలుగు ఓవర్ల కోటాను పూర్తి చేయగల ఆటగాడని వివరించారు.

ఎనిమిదో స్థానం వరకు బ్యాటింగ్‌..

బ్యాటింగ్‌ ఆర్డర్‌ను ఎనిమిదో స్థానం వరకు పొడిగించాలనే ఆలోచనతో బౌలింగ్‌ విభాగాన్ని బ‌ల‌హీన‌ప‌ర‌చొద్ద‌ని గవాస్కర్‌ హెచ్చరించారు. ‘ఎనిమిదో స్థానం వరకు బ్యాటింగ్‌ చేయగల ఆటగాళ్లను ఉంచే ప్రయత్నంలో బౌలింగ్‌ బలహీనపడుతుంది. అందుకే ఓటములు ఎదురవుతాయి’ అని వ్యాఖ్యానించారు. వర్షం కారణంగా రద్దయిన మ్యాచ్‌లో భారత బౌలర్ల ప్రదర్శనను చూడలేకపోయామని, తొమ్మిది ఓవర్ల మ్యాచ్‌ జరిగి ఉంటే బౌలర్లు ఎలా రాణించేవారో ఆసక్తికరంగా ఉండేదని పేర్కొన్నారు. భారత జట్టు స్పిన్‌ బౌలింగ్‌ ఆప్షన్లను గుర్తించి, వారికి నిరంతరం మద్దతు ఇవ్వాల్సిన అవసరం ఉందని గవాస్కర్‌ సూచించారు. తుది జట్టులో తరచూ చోటు దక్కకపోయినా.. జట్టు భవిష్యత్తు ప్రణాళికల్లో స్పిన్నర్లకు ప్రాధాన్యం ఉండాలని పేర్కొన్నారు. ముఖ్యంగా పొట్టి ఫార్మాట్లలో స్పిన్నర్ల ఆత్మవిశ్వాసం త్వరగా తగ్గే అవకాశం ఉన్నందున.. వారికి జట్టు యాజమాన్యం భరోసా కల్పించాలని అభిప్రాయపడ్డారు.