IPL 2026 | ఐపీఎల్‌లో నిరాశ ప‌రిచిన ముంబ‌యి.. హెడ్ కోచ్ మ‌హేలా జ‌య‌వ‌ర్ధ‌నే ఏమ‌న్నాడంటే..?

IPL 2026 | ఐపీఎల్‌లో 2026 సీజ‌న్‌లో ముంబ‌యికి ఆశించిన ఫ‌లితం ద‌క్క‌లేదు. ఆరోసారి టైటిల్ గెల‌వాల‌న్న ఆశ జ‌ట్టుకు నిరాశే ఎదురైంది. జట్టు విజయాల్లో కీలక పాత్ర పోషిస్తారని భావించిన సీనియర్ ఆటగాళ్లు రోహిత్ శర్మ, జ‌స్‌ప్రీత్ బుమ్రా ఆశించిన స్థాయిలో రాణించ‌క‌పోవ‌డంతో జ‌ట్టుపై తీవ్ర ప్ర‌భావం చూపింది. ముఖ్యంగా ఈ ఏడాది జరిగిన ఐసీసీ టీ20 ప్రపంచకప్‌లో భారత జట్టు విజయంలో కీల‌క‌పాత్ర పోషించి బుమ్రా.. ఐపీఎల్‌లో మాత్రం త‌న‌దైన ముద్ర వేయ‌లేక‌పోయాడు. ఐపీఎల్ హిస్ట‌రీలో అత్యంత విజ‌య‌వంత‌మైన బ్యాట్స్‌మెన్‌, కెప్టెన్‌గా గుర్తింపు పొందిన సీజ‌న్ తొలి మ్యాచ్‌లోనే ఆఫ్ సెంచ‌రీతో ఆక‌ట్టుకున్నాడు. ఆ త‌ర్వాత స్థిరంగా ప‌రుగులు చేయ‌లేక‌పోయాడు. రాజస్థాన్ రాయల్స్‌తో వాంఖడే స్టేడియంలో జ‌రుగుతున్న చివరి లీగ్ మ్యాచ్‌కు ముందు వరకు రోహిత్ ఎనిమిది మ్యాచ్‌ల్లో కేవలం 283 పరుగులు మాత్రమే చేశాడు.

హ్యామ్‌స్ట్రింగ్ గాయం కారణంగా ప‌లు మ్యాచుల‌కు దూర‌మ‌య్యాడు. కొన్ని మ్యాచుల్లో ఇంపాక్ట్ ప్లేయ‌ర్‌గా వ‌చ్చాడు. ఈ క్ర‌మంలో ముంబ‌యి హెడ్ కోచ్ మ‌హేలా జ‌య‌వ‌ర్ధ‌నే స్పందించాడు. జట్టు ఎంపిక పూర్తిగా ఆ మ్యాచ్ పరిస్థితులు, జట్టు అవసరాల ఆధారంగానే జరుగుతుందని తెలిపాడు. రోహిత్ కూడా జట్టు ప్రయోజనాలకే ప్రాధాన్యం ఇస్తాడ‌ని పేర్కొన్నారు. “ముంబై ఇండియన్స్ జట్టును ఎంపిక చేసే సమయంలో భారత జట్టు అవసరాల గురించి నేను ఆలోచించను. ఆ రోజు జట్టుకు ఏది మంచిదో దాన్నే దృష్టిలో పెట్టుకుంటాం. రోహిత్ నిజమైన టీమ్ ప్లేయర్‌. జట్టుకు ఏది అవసరమో అతడికి బాగా తెలుసు.

అతడికి హ్యామ్‌స్ట్రింగ్ గాయం ఉండడంతో కోలుకునేందుకు తగిన సమయం ఇచ్చాం. తిరిగి వచ్చిన తర్వాత అతని బ్యాటింగ్ విషయంలో చాలా జాగ్రత్తగా వ్యవహరించాం” అని జయవర్ధనే వివరించాడు. మరోవైపు జస్ప్రీత్ బుమ్రా విషయానికొస్తే టీ20 ప్రపంచకప్ అనంతరం అత‌నికి సరైన విశ్రాంతి దక్కలేదని జయవర్ధనే వెల్లడించాడు. ఈ సీజన్‌లో బుమ్రా 13 మ్యాచ్‌ల్లో కేవలం నాలుగు వికెట్లు మాత్రమే తీయ‌డం అభిమానుల‌ను తీవ్ర నిరాశ‌కు గురి చేసింది. “ప్రపంచకప్ ఆడేటప్పుడే బుమ్రాకు చిన్న గాయం ఉంది. టోర్నీ ముగిసిన తర్వాత అతడికి పూర్తిగా కోలుకునేందుకు ఎక్కువ విశ్రాంతి ఇచ్చాం. సీజన్ ప్రారంభంలో అతడి వేగం, రిథమ్ తగ్గినట్టు కనిపించడానికి అదే కారణం. ఫిట్‌నెస్‌ను మళ్లీ సాధించుకునే ప్రక్రియలో అతడు క్రమంగా ముందుకు వచ్చాడు” అని జయవర్ధనే చెప్పాడు.