CM Revanth Reddy | అంత‌ర్జాతీయ ప్ర‌మాణాల‌తో యంగ్ ఇండియా స్పోర్ట్స్ యూనివ‌ర్సిటీ : సీఎం రేవంత్ రెడ్డి

ఒలింపిక్స్ ల‌క్ష్యంగా క్రీడాకారుల‌కు శిక్ష‌ణ ఇవ్వాలి
గ‌చ్చిబౌలి స్టేడియంను పున‌రుద్ధ‌రించండి
శిక్ష‌ణ‌, పోటీల‌కు అనుగుణంగా స్టేడియంల‌ను తీర్చిదిద్దాలి
క్రీడా శాఖ స‌మీక్ష‌లో సీఎం రేవంత్ రెడ్డి

CM Revanth Reddy | త్రినేత్ర‌.న్యూస్ : ఒలింపిక్స్ లక్ష్యంగా క్రీడాకారులకు శిక్షణ ఇచ్చేందుకు వీలుగా రాష్ట్రంలో అన్ని సౌకర్యాలతోపాటు స్పోర్ట్స్ యూనివర్సిటీ నిర్మాణాలు ఉండాలని సీఎం రేవంత్ రెడ్డి సూచించారు. జూబ్లీహిల్స్‌లోని త‌న నివాసంలో క్రీడా శాఖ‌పై సీఎం రేవంత్ స‌మీక్ష నిర్వ‌హించారు. ఈ స‌మీక్ష స‌మావేశం సంద‌ర్భంగా అంతర్జాతీయ ప్రమాణాలతో యంగ్ ఇండియా స్పోర్ట్స్ యూనివర్సిటీలో సౌకర్యాల కల్పన, అన్ని రకాల క్రీడలకు మైదానాల ఏర్పాటుపై చ‌ర్చించారు.

గచ్చిబౌలి ఔట్ డోర్ స్టేడియంను పునరుద్ధరించడంతోపాటు, స్టేడియం ఆవరణలో ఇండోర్ స్టేడియం, యూనివర్సిటీ కాంప్లెక్స్, హాస్టల్ భవనాలు, అన్ని రకాల క్రీడా మైదానాలు, శిక్షణకు అవసరమైన ఇతర సౌకర్యాలు ఉండేలా జాగ్రత్తలు తీసుకోవాలని సీఎం సూచించారు. ఈ నిర్మాణాల‌కు సంబంధించి ప‌లు డిజైన్ల‌ను సీఎం ప‌రిశీలించారు. డిజైన్లకు సంబంధించి అధికారులకు రేవంత్ ప‌లు సూచ‌న‌లు చేశారు.

ఒలింపిక్స్, కామన్ వెల్త్ క్రీడలకు తెలంగాణ ఆతిథ్యం ఇచ్చేలా, ఒలింపిక్స్‌లో తెలంగాణ క్రీడాకారుల సత్తా చాటడమే లక్ష్యంగా ప్రణాళికలు సిద్ధం చేయాలని ముఖ్యమంత్రి సూచించారు. నగరంలోని కోట్ల విజయభాస్కర్ రెడ్డి స్టేడియం, ఎల్బీ స్టేడియం, సరూర్ నగర్ స్టేడియంలను భవిష్యత్ అవసరాలు, శిక్షణ, పోటీలకు అనుగుణంగా ఆధునీకరించాలని అధికారులను ఆదేశింశారు.

ఈ స‌మీక్ష‌కు మంత్రులు వాకిటి శ్రీహరి, పొంగులేటి శ్రీనివాస్ రెడ్డి, సీఎం సలహాదారు వేం నరేందర్ రెడ్డి, శాట్ చైర్మన్ శివసేనా రెడ్డి, ప్రభుత్వ ప్రధాన కార్యదర్శి రామకృష్ణారావు, సిఎం ప్రిన్సిపల్ సెక్రటరీలు శ్రీనివాస రాజు, శేషాద్రి, శాట్ ఎండీ సోనీ బాలదేవి, యంగ్ ఇండియా స్పోర్ట్స్ యూనివర్సిటీ వీసీ డాక్టర్ జి. కిషోర్, ఉన్నతాధికారులు హాజ‌ర‌య్యారు.