Ind Vs WI | ఐదో టీ20లోకి భువ‌నేశ్వ‌ర్ కుమార్‌.. అర్ష్‌దీప్‌కు గాయం!

Ind Vs WI | వెస్టిండీస్‌తో ఐదో టీ20కి ముందు భారత జట్టులో కీలక మార్పు చోటుచేసుకుంది. గాయంతో అర్ష్‌దీప్‌ సింగ్‌ ఆడటంపై సందేహాలు నెలకొనడంతో పేసర్‌ భువనేశ్వర్‌ కుమార్‌ను జట్టులోకి తీసుకున్న‌ది బీసీసీఐ. ముందు జాగ్రత్త చర్యగా భువీని ఎంపిక చేసినట్లు వెల్లడించింది. అర్ష్‌దీప్ అందుబాటులో ఉంటాడా లేదా అన్న‌దాన్ని బ‌ట్టి నిర్ణయం తీసుకోన్నారు. వెస్టిండ్‌తో చివ‌రి మ్యాచ్ శ‌నివారం బెంగ‌ళూరు వేదిక‌గా జ‌రుగ‌నున్న‌ది. వెస్టిండీస్‌తో బుధవారం హైదరాబాద్‌లో జరిగిన నాలుగో టీ20లో భారత ఇన్నింగ్స్‌ చివరి ఓవర్‌లో అర్ష్‌దీప్‌ గాయపడ్డాడు. షమర్‌ జోసెఫ్‌ వేసిన బౌన్సర్‌ అతడి ఎడమ భుజానికి బలంగా తగిలింది. నొప్పితో విలవిల్లాడిన అర్ష్‌దీప్‌ను ఫిజియో పరీక్షించారు. దీంతో చివరి మ్యాచ్‌లో అత‌ను ఆడ‌డంపై అనిశ్చితి కొన‌సాగుతోంది.

నాలుగేళ్ల తర్వాత జట్టులోకి..

భువనేశ్వర్‌ కుమార్‌కు జాతీయ జట్టులో చోటు దక్కడం మరోసారి చర్చనీయాంశమైంది. న్యూజిలాండ్‌తో ఐదు టీ20ల సిరీస్‌కు ఇప్పటికే ఎంపికైన భువీ.. నాలుగేళ్ల విరామం తర్వాత భారత జట్టులోకి తిరిగొచ్చాడు. 2022 నవంబర్‌ 22న భారత్‌ తరఫున చివరి మ్యాచ్‌ ఆడిన అతడు.. ఆ తర్వాత జట్టుకు దూరమయ్యాడు. కొత్త పేసర్లు వెలుగులోకి వచ్చినా, తన ప్రయత్నాలను కొనసాగించిన భువీకి ఇప్పుడు మరో అవకాశం లభించింది. న్యూజిలాండ్‌ సిరీస్‌కు ముందు అతడి ప్రదర్శనను అంచనా వేసేందుకు జట్టు యాజమాన్యం ఈ నిర్ణయం తీసుకున్నట్లు తెలుస్తోంది.

ఐదో టీ20కి భారత జట్టు

శ్రేయస్‌ అయ్యర్‌ (కెప్టెన్‌), అభిషేక్‌ శర్మ, వైభవ్‌ సూర్యవంశీ, ఇషాన్‌ కిషన్‌ (వికెట్‌ కీపర్‌), సంజూ శాంసన్‌ (వికెట్‌ కీపర్‌), తిలక్‌ వర్మ (వైస్‌ కెప్టెన్‌), శివమ్‌ దూబే, కుల్దీప్‌ యాదవ్‌, అక్షర్‌ పటేల్‌, రవి బిష్ణోయ్‌, నితీశ్‌ కుమార్‌ రెడ్డి, అర్ష్‌దీప్‌ సింగ్‌, ప్రిన్స్‌ యాదవ్‌, మయాంక్‌ యాదవ్‌, నమన్‌ ధీర్‌, భువనేశ్వర్‌ కుమార్‌.