Asian Games | ఆసియా గేమ్స్‌లో భారత షట్లర్లకు చుక్కెదురు..

• నాలుగు ఈవెంట్లలో పరాజయం
• సింధు, ఉన్నతి పోరాటం వృథా..
• బ్యాడ్మింటన్‌ పతక ఆశలు ఆవిరి

Asian Games | ఆసియా గేమ్స్‌లో ఆదివారం భారత బ్యాడ్మింటన్‌ జట్టుకు నిరాశ ఎదురైంది. నాలుగు విభాగాల్లో భారత ఆటగాళ్లు ఓటమిపాలై పోటీ నుంచి నిష్క్రమించారు. మహిళల సింగిల్స్‌లో పీవీ సింధు, ఉన్నతి హూడా.. మహిళల డబుల్స్‌లో త్రిషా జాలీ–గాయత్రి గోపీచంద్‌.. మిక్స్‌డ్‌ డబుల్స్‌లో తనీషా క్రాస్టో–ధ్రువ్‌ కపిల జోడీలు క్వార్టర్‌ఫైనల్లోనే ఇంటిబాట పట్టాయి. మహిళల సింగిల్స్‌ క్వార్టర్‌ఫైనల్లో పీవీ సింధు ప్రపంచ నాలుగో ర్యాంకర్‌ చెన్‌ యుఫీ (చైనా) చేతిలో 21-11, 18-21, 10-21తో ఓడింది. తొలి గేమ్‌ను సునాయాసంగా గెలిచిన సింధు.. తర్వాతి రెండు గేమ్‌ల్లో పట్టు కోల్పోయింది. చెన్‌ యుఫీ వరుసగా రెండు గేమ్‌లు గెలిచి సెమీఫైనల్‌కు చేరింది. అంతకుముందు యువ షట్లర్‌ ఉన్నతి హూడా ప్రపంచ మూడో ర్యాంకర్‌ అకానె యమగుచి (జపాన్‌)తో హోరాహోరీగా తలపడింది. మూడు గేమ్‌ల మ్యాచ్‌లో 16-21, 21-14, 17-21తో ఓటమిపాలైంది. తొలి గేమ్‌ కోల్పోయిన ఉన్నతి రెండో గేమ్‌లో అద్భుతంగా పుంజుకుని 21-14తో గెలిచి మ్యాచ్‌ను సమం చేసింది. నిర్ణాయక మూడో గేమ్‌లోనూ గట్టిపోటీ ఇచ్చినా 17-21తో ఓడింది.

తనీషా–ధ్రువ్‌ పోరాటం వృథా

మిక్స్‌డ్‌ డబుల్స్‌ క్వార్టర్‌ఫైనల్లో తనీషా క్రాస్టో–ధ్రువ్‌ కపిల ప్రపంచ నంబర్‌వన్‌ జోడీ ఫెంగ్‌ యాన్‌జె, హువాంగ్‌ డాంగ్‌పింగ్‌ (చైనా) చేతిలో 14-21, 21-18, 18-21తో ఓడింది. తొలి గేమ్‌ను కోల్పోయిన భారత జోడీ రెండో గేమ్‌లో పుంజుకుని గెలిచింది. నిర్ణాయక గేమ్‌లో చైనా జోడీ 12-6తో ఆధిక్యంలోకి వెళ్లినా భారత ఆటగాళ్లు రెండు పాయింట్లకు అంతరాన్ని తగ్గించారు. అయితే ఒత్తిడి కొనసాగించిన చైనా జోడీ 21-18తో గేమ్‌తోపాటు మ్యాచ్‌ను సొంతం చేసుకుంది. మహిళల డబుల్స్‌ క్వార్టర్‌ఫైనల్లో ప్రపంచ చాంపియన్‌షిప్‌ కాంస్య పతక విజేతలు త్రిషా జాలీ–గాయత్రి గోపీచంద్‌ 18-21, 9-21తో ప్రపంచ ఐదో ర్యాంక్‌ జోడీ పెర్లీ టాన్‌–తినాహ్‌ మురళీధరన్‌ (మలేసియా) చేతిలో ఓడారు. తొలి గేమ్‌లో గట్టిపోటీ ఇచ్చిన భారత జోడీ చివర్లో కీలక పాయింట్లు కోల్పోయింది. రెండో గేమ్‌లో 3-0తో ఆధిక్యంలోకి వచ్చినా వరుసగా 9 పాయింట్లు కోల్పోవడంతో మ్యాచ్‌ మలేసియా జోడీ చేతుల్లోకి వెళ్లింది. ఇక పురుషుల సింగిల్స్‌లో లక్ష్యసేన్‌ రెండో రౌండ్‌లో మాజీ ప్రపంచ చాంపియన్‌ లో కీన్‌ యూ (సింగపూర్‌) చేతిలో ఓడి నిష్క్రమించాడు. 2023 హాంగ్జౌ ఆసియా గేమ్స్‌ పురుషుల డబుల్స్‌ చాంపియన్లు సాత్విక్‌సాయిరాజ్‌ రంకిరెడ్డి–చిరాగ్‌ శెట్టి కూడా ఈసారి తొలి రౌండ్‌లోనే ఓడి తమ టైటిల్‌ నిలబెట్టుకోలేకపోయారు.