BRSV Protest | బండి సంజయ్ ను మంత్రివర్గం నుంచి బర్తరఫ్ చేయాలి.. డీజీపీ ఆఫీస్ వ‌ద్ద బీఆర్ఎస్‌వీ నేత‌ల డిమాండ్‌

BRSV Protest | త్రినేత్ర‌.న్యూస్‌: కేంద్ర హోం శాఖ‌ సహాయ మంత్రి బండి సంజయ్ (Bandi Sanjay) ను మంత్రివ‌ర్గం నుంచి బ‌ర్త‌ర‌ఫ్ చేయాల‌ని బీఆర్ఎస్‌వీ నాయ‌కులు డిమాండ్ చేశారు. ఆయ‌న కుమారుడు సాయి భ‌గీర‌థ్ (Sai Bhagirath) ఓ బాలిక‌పై అత్యాచార య‌త్నం చేయడం దుర్మార్గ‌మ‌ని మండిప‌డ్డారు. పోక్సో కేసు న‌మోదైన‌ప్ప‌టికీ బండి కుమారుడిని ఎందుకు అరెస్టు చేయ‌డం లేద‌ని నిల‌దీశారు. ఈ మేర‌కు ఆదివారం ఉద‌యం డీజీపీ కార్యాల‌యం (DGP Office) వద్ద బీఆర్ఎస్వీ నాయ‌కులు ఆందోళన చేప‌ట్టారు.

ఈ క్ర‌మంలో డీజీపీ కార్యాల‌యంలోకి చొచ్చుకెళ్లేందుకు ప్ర‌యత్నించ‌డంతో పోలీసులు వారిని అడ్డుకున్నారు. దీంతో గేటు వ‌ద్దే నేల‌పై బైఠాయించి ప్ర‌భుత్వానికి, బండి సంజ‌య్‌కు వ్య‌తిరేకంగా నినాదాలు చేశారు. వెంటనే సాయి భ‌గీర‌థ్‌పై కఠిన చర్యలు తీసుకోవాలని డిమాండ్ చేశారు. బాధిత కుటుంబానికి ప్ర‌భుత్వం అండ‌గా నిల‌వాల్సింది పోయి కేసును నీరుగార్చేందుకు ప్ర‌య‌త్నించ‌డం దుర్మార్గ‌మైన చ‌ర్య అని అన్నారు. దీంతో అక్క‌డ ఉద్రిక్త ప‌రిస్థితులు చోటుచేసుకున్నాయి.

ఈ సంద‌ర్భంగా గెల్లు శ్రీనివాస్ యాద‌వ్ మాట్లాడుతూ.. రెండు మూడు నెల‌లుగా బాలిక త‌ల్ల‌దండ్రులు పోలీస్‌స్టేష‌న్ల చుట్టూ తిరిగినా పోలీసులు ప‌ట్టించుకోలేద‌ని మండిప‌డ్డారు. ఇన్ని రోజులు కేసు న‌మోదు చేయ‌కుండా నిర్ల‌క్ష్యం చేశారు. చ‌ట్టాలు పెద్దోళ్ల‌కు ఒక‌తీరు, పేదోళ్ల‌కు ఒక‌తీరు ఉంట‌యా అని ప్ర‌శ్నించారు. సాయి భ‌గీర‌థ్‌పై పోక్సో కేసు న‌మోదైన‌ప్ప‌టికీ ఇప్ప‌టివ‌ర‌కు అరెస్టు చేయ‌క‌పోవ‌డాన్ని తీవ్రంగా ఖండిస్తున్న‌ట్లు చెప్పారు. బాధిత బాలిక‌కు వెంట‌నే న్యాయం చేయ‌క‌పోతే బీఆర్ఎస్‌వీ ఆధ్వ‌ర్యంలో పెద్దఎత్తున ఆందోళ‌న‌ల‌కు దిగుతామ‌ని హెచ్చ‌రించారు.

బేటీ ప‌డావో, బేటీ బ‌చావో అని చెప్పేది ఉట్టి జూటానేనా అని ప్ర‌శ్నించారు. రేవంత్ ప్ర‌భుత్వం, బీజేపీ లోపాయ‌కారి ఒప్పందంతో ప‌ని చేస్తున్నాయ‌ని ఆరోపించారు. బండి సంజ‌య్‌ను వెంట‌నే మంత్రివ‌ర్గం నుంచి బ‌ర్త‌ర‌ఫ్ నుంచి చేయాల‌ని డిమాండ్ చేశారు. బండి ఆయ‌న కొడుకును ఎందుకు వెన‌కేసుకొస్తున్నాడో చెప్పాల‌న్నారు. మాజీ జ‌ర్న‌లిస్టుతో బాధిత కుటుంబ స‌భ్యుల‌తో చ‌ర్చ‌లు జ‌రిపించ‌డం ఏంట‌ని ప్ర‌శ్నించారు.

ఈ కార్య‌క్ర‌మంలో బీఆర్ఎస్‌వీ రాష్ట్ర అధ్యక్షుడు గెల్లు శ్రీనివాస్ యాదవ్, ఉపాధ్యక్షుడు తుంగ బాలు, నాయకులు యాద క్రాంతి, అభి ముదిరాజ్ తదితరులు పాల్గొన్నారు.

Live: డీజీపీ కార్యాలయం వద్ద బీఆర్ఎస్వీ నిరసన https://t.co/guh4y71k3T

— BRS Party (@BRSparty) May 10, 2026