Gen Z | సీనియ‌ర్ల‌ను మ‌ట్టిక‌రిపించారు.. జైపూర్ ఎన్నిక‌ల్లో జెన్ జీ యూవ‌త‌

Gen Z | త్రినేత్ర‌.న్యూస్: రాజ‌స్థాన్ రాజ‌ధాని జైపూర్‌లో జ‌రిగిన మున్సిప‌ల్ ఎన్నిక‌ల్లో జెన్ జీ యువ‌త (Gen Z candidates) స‌త్తా చాటారు. ఇప్పుడిప్పుడే రాజ‌కీయాల్లోకి ప్ర‌వేశించిన యువ‌త‌ త‌మ కంటే సీనియ‌ర్ల‌ను మ‌ట్టిక‌రిపించారు. జైపూర్ మున్సిపాలిటీలో (Jaipur Municipal Corporation) మొత్తం 150 వార్డులు ఉండ‌గా.. బీజేపీ, కాంగ్రెస్ పార్టీలు 18 మంది న‌వ యువ‌కుల‌ను (Gen Z) బ‌రిలోకి దింపాయి. వారిలో ఆరుగురు అభ్య‌ర్థులు విజ‌యం సాధించారు. న‌లుగురు కాంగ్రెస్ (Congress) నుంచి గెలుపొంద‌గా, మిగిలిన ఇద్ద‌రు బీజేపీ (BJP) నుంచి ఎన్నిక‌య్యారు. ఈ ఎన్నిక‌ల్లో కాంగ్రెస్ 12 మందికి, బీజేపీ ఆరుగురు జెన్ జీల‌కు టికెట్లు ఇచ్చాయి.

విజేత‌ల్లో అతి పిన్న వ‌య‌స్కుడు కాంగ్రెస్ పార్టీకి చెందిన 21 ఏండ్ల ఫైజ్ హ‌స‌న్‌. 71వ వార్డు నుంచి పోటీచేసి అత‌డు 39 ఏండ్ల స్వ‌తంత్ర అభ్య‌ర్థి మ‌హమ్మ‌ద్ స‌లీన్‌ను ఓడించాడు. ప‌దో వార్డు నుంచి పోటీచేసిన బీజేపీ అభ్య‌ర్థి పాల‌క్ యాద‌వ్ (21) 39 ఏండ్ల కాంగ్రెస్ క్యాండిడేట్ వంద‌నా జ‌ఖ‌ర్‌ను మ‌ట్టిక‌రిపించాడు. ఇక 29 ఏండ్ల సూర‌జ్ గొడివాల్ 115 వార్డు నుంచి బీజేపీ అభ్య‌ర్థిగా పోటీచేశాడు. అత‌డు 67 ఏండ్ల కాంగ్రెస్ క్యాండిడేట్ సురేశ్ బివాల్‌ను 1,063 ఓట్ల‌తో ఓడించాడు. జైపూర్ మున్సిపాలిటీలోనే కాకుండా.. అల్వార్ జిల్లాలోని త‌నగాజి వార్డుకు జ‌రిగిన ఎన్నిక‌ల్లో 21 ఏండ్ల జ‌ర్న‌లిస్టు నేహా శ‌ర్మ విజ‌యం సాధించారు. రాజ‌కీయాల్లో కూడా జెన్ జీ యువ‌త (Young Candidates) రాణించ‌వ‌చ్చ‌ని ఈ ఎన్నిక‌ల ద్వారా నిరూపించారు.