CJP Student Protest Case | స్టూడెంట్స్‌పై కేసుల ఉపసంహరణకు సుప్రీంకోర్టు గ్రీన్ సిగ్నల్.. పోలీసుల దౌర్జన్యంపై సీరియస్!

CJP Student Protest Case | త్రినేత్ర.న్యూస్ : పేపర్ లీక్ (Paper leak) వ్యవహారంతో పాటు పలు ఇతర డిమాండ్లతో దేశవ్యాప్తంగా ఆందోళన బాటపట్టిన విద్యార్థులకు సుప్రీంకోర్టు (Supreme Court) భారీ ఊరటనిచ్చింది. ఈ ఆందోళనల్లో పాల్గొన్న స్టూడెంట్స్‌పై నమోదైన ఎఫ్‌ఐఆర్‌లను (FIRs) రాష్ట్ర ప్రభుత్వాలు చట్టప్రకారం మూసివేయవచ్చని లేదా వెనక్కి తీసుకోవచ్చని సోమవారం ఆగస్టు 3న స్పష్టం చేసింది. చీఫ్ జస్టిస్ ఆఫ్ ఇండియా (CJI) జస్టిస్ సూర్యకాంత్, జస్టిస్ జాయ్‌మాల్యా బాగ్చీ, జస్టిస్ వి.మోహనలతో కూడిన త్రిసభ్య ధర్మాసనం ఈ మేరకు కీలక ఆదేశాలు జారీ చేసింది.

'క్రిమినల్ రికార్డ్' పదంపై క్లారిటీ

జూలై 28న ఇచ్చిన ఆదేశాల్లో.. 'క్రిమినల్ రికార్డ్ లేని విద్యార్థులపై ఎలాంటి కఠిన చర్యలు తీసుకోవద్దు' అని సుప్రీంకోర్టు పేర్కొంది. అయితే, ఈ పదం వాడుక వల్ల ట్రాఫిక్ ఉల్లంఘనలు లాంటి చిన్న చిన్న కేసులున్న విద్యార్థులు కూడా ఇబ్బందులు పడే అవకాశం ఉందని పిటిషనర్లు కోర్టు దృష్టికి తీసుకొచ్చారు. దీనిపై స్పందించిన ధర్మాసనం.. ఇక్కడ 'క్రిమినల్ రికార్డ్' (Criminal antecedents) అంటే కేవలం అత్యంత తీవ్రమైన, దారుణమైన నేరాలకు (grave and heinous offences) మాత్రమే వర్తిస్తుందని స్పష్టం చేసింది.

ఎఫ్‌ఐఆర్‌ల రద్దుపై లీగల్ కన్ఫ్యూజన్

నిరసనలు విరమించేందుకు కాక్రోచ్ జనతా పార్టీ (CJP) నేతలకు ఇచ్చిన హామీ మేరకు.. విద్యార్థులపై ఎఫ్‌ఐఆర్‌లను ఉపసంహరించుకోవడానికి కేంద్రం సిద్ధంగా ఉందని సొలిసిటర్ జనరల్ (SG) తుషార్ మెహతా కోర్టుకు తెలిపారు. అయితే, క్రిమినల్ చట్టం ప్రకారం ఒక ఎఫ్‌ఐఆర్‌ను నేరుగా విత్‌డ్రా చేసుకునే ఆప్షన్ లేదని.. క్లోజర్ రిపోర్ట్ (Closure report) దాఖలు చేయడమో లేదా కోర్టులు క్వాష్ చేయడమో జరగాలని ఆయన వివరించారు. దీనిపై స్పందించిన జస్టిస్ బాగ్చీ.. ఎఫ్‌ఐఆర్‌లను రద్దు చేసేందుకు న్యాయస్థానం తగిన ప్రక్రియను రూపొందిస్తుందని హామీ ఇచ్చారు.

పోలీసుల దౌర్జన్యంపై సుప్రీం సీరియస్

జూలై 20న సీజేపీ ఆధ్వర్యంలో జరిగిన 'ఛలో సంసద్' మార్చ్‌లో చెలరేగిన హింసపై పలు పిటిషన్లు దాఖలయ్యాయి. నిరసనకారులపై పోలీసులు పెల్లెట్ గన్స్ (Pellet guns), మేకులున్న లాఠీలు వాడటంపై సీనియర్ న్యాయవాదులు గోపాల్ శంకరనారాయణన్, వృందా గ్రోవర్ కోర్టులో వాదనలు వినిపించారు. బయోమెట్రిక్ డేటా, ఫేషియల్ రికగ్నిషన్ టెక్నాలజీ ద్వారా స్టూడెంట్స్‌ను గుర్తించడాన్ని తీవ్రంగా తప్పుబట్టారు. నిజాముద్దీన్ పోలీస్ స్టేషన్‌లో అరెస్టయిన విద్యార్థులను కలవడానికి వెళ్లిన ఓ లాయర్‌పై కూడా పోలీసులు దాడి చేశారని న్యాయవాది కొలిన్ గొన్సాల్వేస్ కోర్టు దృష్టికి తెచ్చారు.

దీనిపై చీఫ్ జస్టిస్ సూర్యకాంత్ తీవ్రంగా స్పందించారు. "మితిమీరిన బలప్రయోగానికి పాల్పడిన పోలీసు అధికారులను వెనకేసుకురావాల్సిన అవసరం లేదు. అదే సమయంలో.. విద్యార్థుల ముసుగులో ఉన్న కరడుగట్టిన నేరస్థులను కూడా వదిలిపెట్టకూడదు." అని సీజేఐ వ్యాఖ్యానించారు.

తదుపరి విచారణ ఆగస్టు 18కి వాయిదా

నిరసనకారులపై పెల్లెట్ గన్స్ వాడకంపై కోర్టు త్వరలో ఒక ప్రొటోకాల్‌ను తీసుకురానున్నట్లు సీజేఐ తెలిపారు. ఈ మొత్తం వ్యవహారంపై స్వతంత్ర దర్యాప్తు కోసం సుప్రీంకోర్టు మాజీ న్యాయమూర్తి నేతృత్వంలో స్పెషల్ ఇన్వెస్టిగేషన్ టీమ్ (SIT) ఏర్పాటు చేసే అవకాశం ఉంది. ఈ కేసు తదుపరి విచారణను ధర్మాసనం ఆగస్టు 18వ తేదీకి వాయిదా వేసింది.

దేశవ్యాప్తంగా ఢిల్లీ, అస్సాం, బీహార్, పశ్చిమ బెంగాల్, ఉత్తరప్రదేశ్, మధ్యప్రదేశ్, మహారాష్ట్ర, కేరళ రాష్ట్రాల్లో జూలై 20 నుంచి జరిగిన పరీక్షా పత్రాల లీకేజీ ఆందోళనల సందర్భంగా పోలీసులు అత్యుత్సాహం ప్రదర్శించారంటూ పలు పిటిషన్లు దాఖలయ్యాయి. ఇప్పటికే సీసీటీవీ (CCTV) ఫుటేజీలు, డ్రోన్ రికార్డింగ్స్ భద్రపరచాలని కోర్టు ఆదేశించిన సంగతి తెలిసిందే.