Thalapathy Vijay Trisha Spotted Together | విడాకుల వార్తల వేళ త్రిషతో కలిసి ప్రత్యక్షమైన విజయ్.. ఒకే కారులో వెడ్డింగ్ రిసెప్షన్‌కు హాజరు.. నెట్టింట వీడియో వైరల్!

Thalapathy Vijay Trisha Spotted Together | త్రినేత్ర.న్యూస్ : కోలీవుడ్ స్టార్ హీరో, తమిళగ వెట్రి కళగం (TVK) అధినేత దళపతి విజయ్ వ్యక్తిగత జీవితం ఇప్పుడు వార్తల్లో నిలుస్తోంది. గత కొంతకాలంగా విజయ్ తన భార్య సంగీత నుంచి విడిపోతున్నారనే వార్తలు వైరల్ అవుతున్న సంగతి తెలిసిందే. ఈ నేపథ్యంలో, నటి త్రిషతో కలిసి విజయ్ ఒకే కారులో కనిపించడం తమిళ సినీ వర్గాల్లో సంచలనం రేపుతోంది.

పెళ్లి వేడుకలో త్రిష-విజయ్ సందడి

చెన్నైలో జరిగిన ఓ ప్రముఖ వెడ్డింగ్ రిసెప్షన్‌కు విజయ్, త్రిష కలిసి హాజరయ్యారు. వీరు ఇద్దరూ ఒకే కారులో ప్రయాణించి వేడుక వద్దకు చేరుకోవడం అక్కడున్న వారిని ఆశ్చర్యానికి గురిచేసింది. ఈ సందర్భంగా విజయ్ సాంప్రదాయక పట్టు చొక్కా, ధోతీ ధరించగా.. త్రిష సైతం ఆయనకు మ్యాచింగ్ అయ్యే విధంగా అందమైన చీరలో మెరిశారు. దీనికి సంబంధించిన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.

విడాకుల పిటిషన్‌లో నటి ప్రస్తావన?

విజయ్ భార్య సంగీత విడాకుల కోసం కోర్టును ఆశ్రయించారని, తన భర్తకు ఒక నటితో వివాహేతర సంబంధం ఉందని ఆమె తన పిటిషన్‌లో పేర్కొన్నట్లు సమాచారం. అయితే, ఆ నటి మరెవరో కాదు త్రిషేనని ఇప్పటికే తమిళ మీడియా కోడై కూస్తోంది. ఇప్పుడు వీరిద్దరూ బహిరంగంగా కలిసి తిరగడం ఆ వార్తలకు మరింత బలాన్ని చేకూరుస్తోంది.

మౌనంగానే విజయ్..

రాజకీయాల్లోకి ఎంట్రీ ఇచ్చి తనకంటూ ఒక ప్రత్యేక గుర్తింపు తెచ్చుకునే ప్రయత్నంలో ఉన్న విజయ్, ఈ వివాదాలపై ఇంతవరకు అధికారికంగా స్పందించలేదు. మరోవైపు త్రిష సైతం ఈ రూమర్లను ఖండించకుండా మౌనంగానే ఉంటోంది. గతంలో వీరిద్దరూ కలిసి పలు సూపర్ హిట్ సినిమాల్లో నటించారు. తాజాగా మరోసారి వీరిద్దరూ కలిసి కనిపించడంతో అభిమానుల్లో రకరకాల చర్చలు మొదలయ్యాయి.