China Population Collapse | చైనా జనాభా పతనం భారత్‌తో యుద్ధానికి దారితీస్తుందా? తైవాన్ కంటే మన దేశమే ఎందుకు టార్గెట్?

China Population Collapse | త్రినేత్ర న్యూస్ : ఇన్నాళ్లూ పాశ్చాత్య దేశాలు.. చైనా వేగంగా ఎదగడం ప్రపంచ దేశాల స్థిరత్వానికి పెను ముప్పు అని భావించాయి. కానీ ఆ అంచనా తప్పు అని, చైనా ఎదుగుదల కంటే 'చైనా పతనమే' ప్రపంచానికి అత్యంత ప్రమాదకరమని వాషింగ్టన్‌కు చెందిన ప్రముఖ విశ్లేషకుడు మైఖేల్ రూబిన్ (Michael Rubin) హెచ్చరించారు. ముఖ్యంగా చైనాలో జనాభా వేగంగా పడిపోతుండటం భారత్‌తో యుద్ధానికి దారితీసే ప్రమాదం ఉందని ఆయన తన తాజా విశ్లేషణలో పేర్కొన్నారు.

జనాభా తగ్గితే యుద్ధాలు ఎందుకు వస్తాయి?

సాధారణంగా జనాభా ఎక్కువగా ఉన్న దేశాలు తమ ప్రజల అవసరాల కోసం పొరుగు దేశాల భూభాగాలపై కన్నేస్తాయని చరిత్ర చెబుతోంది. గతంలో నాజీ జర్మనీ, ఇంపీరియల్ జపాన్, కువైట్‌పై దాడి చేసిన ఇరాక్ ఇదే సూత్రాన్ని అనుసరించాయి. కానీ జనాభా తగ్గిపోతున్న దేశాలు కూడా అంతే దూకుడుగా వ్యవహరిస్తాయని రష్యా, ఇరాన్ పరిణామాలు నిరూపిస్తున్నాయి.

1990ల ప్రారంభంలో 14.8 కోట్లుగా ఉన్న రష్యా జనాభా.. జననాల రేటు తగ్గడం, వలసల వల్ల ప్రస్తుతం 14.3 కోట్లకు పడిపోయింది. రష్యా అధ్యక్షుడు వ్లాదిమిర్ పుతిన్ 2008లో జార్జియాపై, 2014లో క్రిమియాపై, 2022లో ఉక్రెయిన్‌పై దాడి చేయడానికి ముందు జనాభా సంక్షోభాన్ని ప్రధాన సమస్యగా ప్రస్తావించారు.

అలాగే ఇరాన్‌లో కూడా 1980-88 ఇరాన్-ఇరాక్ యుద్ధం తర్వాత జననాల రేటు దారుణంగా పడిపోయింది. జనాభాను పెంచేందుకు ఆ దేశ దివంగత సుప్రీం లీడర్ అలీ ఖమేనీ చేసిన ప్రయత్నాలు విఫలం కావడంతో, ప్రజల దృష్టిని మళ్లించేందుకు ఇరాన్‌ను ఘర్షణల వైపు నడిపించారు.

చైనా చేసిన చారిత్రక తప్పిదం.. 'వన్-చైల్డ్ పాలసీ'

రష్యా, ఇరాన్‌లతో పోలిస్తే చైనా జనాభా సంక్షోభం మరింత తీవ్రంగా ఉంది. ఆర్థిక సంస్కరణల ఫలితాలు జనాభా పెరుగుదల వల్ల ఆవిరైపోతాయనే భయంతో కమ్యూనిస్ట్ ప్రభుత్వం ఏకంగా 36 ఏళ్ల పాటు 'వన్-చైల్డ్ పాలసీ' (ఒక్క సంతానం విధానం) కఠినంగా అమలు చేసింది. బలవంతపు ఆపరేషన్లు, ఆడ శిశువుల హత్యల వల్ల ఒక తరం గడిచేసరికి చైనాలో మహిళల సంఖ్య భారీగా తగ్గిపోయింది.

1976లో ప్రతి వెయ్యి మందికి 20గా ఉన్న జననాల రేటు.. 2016 నాటికి 13కు, 2025 నాటికి ఏకంగా 6 కంటే దిగువకు పడిపోయింది. 1949 తర్వాత ఇదే అత్యంత కనిష్ఠ స్థాయి. ఐక్యరాజ్యసమితి (UN) లెక్కల ప్రకారం 2023 ఏప్రిల్‌లోనే చైనాను దాటి భారత్ ప్రపంచంలోనే అత్యధిక జనాభా కలిగిన దేశంగా అవతరించింది. 2100 నాటికి భారత్ జనాభా 150 కోట్లు దాటితే, చైనా జనాభా మాత్రం సగానికిపైగా తగ్గి 63.3 కోట్లకు పడిపోనుంది.

దేశీయ సంక్షోభం నుంచి దృష్టి మళ్లించే వ్యూహం

ఆర్టిఫిషియల్ ఇంటెలిజెన్స్ (AI) ఎంత అభివృద్ధి చెందినా, జనాభా తగ్గితే దేశ ఆర్థిక వ్యవస్థ కుచించుకుపోతుంది. చైనాలో వృద్ధుల సంఖ్య పెరిగిపోయి, వారిని చూసుకునే పిల్లలు లేక పేదరికం, ఒంటరితనం పెరుగుతున్నాయి. ఇలాంటి ఆర్థిక, సామాజిక సంక్షోభం నుంచి ప్రజల దృష్టిని మళ్లించడానికి, దేశంలో జాతీయవాదాన్ని రెచ్చగొట్టడానికి బీజింగ్ ఏదో ఒక యుద్ధ సాహసానికి ఒడిగట్టే ప్రమాదం ఉందని భారత్ గుర్తించాలి.

తైవాన్ కంటే భారత్ ఎందుకు టార్గెట్ కావొచ్చు?

చైనా తన దూకుడుకు తైవాన్‌ను టార్గెట్ చేస్తుందని, 2027 నాటికి తైవాన్‌పై దాడికి సిద్ధమవుతుందని అమెరికా నిఘా సంస్థ (CIA) అంచనా వేసింది. అయితే తైవాన్‌పై దాడి చేయడం చైనాకు అంత సులభం కాదు. తైవాన్‌కు మద్దతుగా అమెరికా రంగంలోకి దిగే అవకాశం ఉంది. పైగా తైవాన్ భౌగోళిక పరిస్థితి ఆఫ్ఘనిస్తాన్ తరహాలో కొండలతో చాలా కఠినంగా ఉంటుంది.

ఇక్కడే భారత్‌కు అసలు ప్రమాదం పొంచి ఉంది. తైవాన్‌పై దాడి చేస్తే అంతర్జాతీయంగా వచ్చే ప్రతిఘటన కంటే, భారత్‌పై దూకుడు ప్రదర్శిస్తే పెద్దగా ఇబ్బంది ఉండదని చైనా పాలకులు భావించే అవకాశం ఉంది. గతంలో అమెరికా జాతీయ భద్రతా సలహాదారు హెన్రీ కిసింజర్ హయాంలో జరిగినట్లుగానే.. అమెరికా కేవలం 'రియల్ పాలిటిక్స్' (రాజకీయ ప్రయోజనాలు) పేరుతో భారత్‌కు అండగా నిలవకుండా తప్పుకునే ప్రమాదం ఉంది.

ముఖ్యంగా అరుణాచల్ ప్రదేశ్, ఈశాన్య రాష్ట్రాలను కలిపే వ్యూహాత్మక 'చికెన్స్ నెక్' (Chicken's Neck) ప్రాంతాలు ప్రమాదంలో పడవచ్చు. మరోవైపు చైనా, పాకిస్థాన్‌లు కలిసి బంగ్లాదేశ్‌ను తమకు అనుకూలంగా మార్చుకుంటుండటం ఈ ముప్పును మరింత పెంచుతోంది.

భారత్ సిద్ధంగా ఉందా?

తైవాన్ లాగా కాకుండా భారత్ వద్ద అణ్వాయుధాలు (Nuclear Power) ఉన్న మాట వాస్తవమే. కానీ భారత్ అంతర్జాతీయ చట్టాలకు కట్టుబడి ఉంటుందని, ఐక్యరాజ్యసమితిలో తమకున్న పలుకుబడితో భారత్ అణ్వాయుధ ప్రయోగానికి దిగకుండా అడ్డుకోవచ్చని చైనా లెక్కలు వేస్తోంది.

2022 ఫిబ్రవరిలో పుతిన్ ఉక్రెయిన్‌పై దాడి చేసే వరకు అలాంటి యుద్ధం జరుగుతుందని ఎవరూ ఊహించలేదు. 2024 ఏప్రిల్‌లో ఇరాన్ నేరుగా ఇజ్రాయెల్‌పై దాడి చేస్తుందని కూడా ఎవరూ అనుకోలేదు. తమ అధికారాన్ని కాపాడుకోవడం కోసం నియంతృత్వ ప్రభుత్వాలు ఎలాంటి మొండి నిర్ణయాలకైనా తెగిస్తాయి. కాబట్టి చైనా జనాభా సంక్షోభం సృష్టించబోయే ఈ భౌగోళిక రాజకీయ ముప్పును ఎదుర్కోవడానికి భారత్ సిద్ధంగా ఉందా అనేదే ఇప్పుడు మన ముందున్న అసలు ప్రశ్న.