Ukraine Fires | రష్యాపై డ్రోన్ల‌తో విరుచుకుప‌డ్డ ఉక్రెయిన్‌.. చ‌మురు కేంద్రాల్లో మంట‌లు

Ukraine Fires | రష్యా–ఉక్రెయిన్‌ యుద్ధం మరింత తీవ్రరూపం దాల్చింది. ఆదివారం రష్యాలోని పలు ప్రాంతాలపై ఉక్రెయిన్‌ భారీ డ్రోన్‌ దాడులు నిర్వహించింది. ఈ దాడుల్లో సెయింట్‌ పీటర్స్‌బర్గ్‌లోని చమురు ఎగుమతి టెర్మినల్‌, చమురు నిల్వ కేంద్రంలో మంటలు చెలరేగాయి. ఈ ఘటనలో ఒకరు మృతి చెందగా.. మరో ఐదుగురు గాయపడ్డారు. రష్యా రక్షణ శాఖ మాత్రం తమ సైన్యం 15 ప్రాంతాలతో పాటు క్రిమియా ద్వీపకల్పం, నల్ల సముద్రం పరిధిలో మొత్తం 1,015 ఉక్రెయిన్‌ డ్రోన్లను కూల్చివేసినట్లు ప్రకటించింది. ఉక్రెయిన్‌ చేపట్టిన అతిపెద్ద వైమానిక దాడుల్లో ఇదొకటిగా పేర్కొంటున్నారు.

చమురు కేంద్రాలు, డేటా సెంటర్‌ లక్ష్యంగా..

సెయింట్‌ పీటర్స్‌బర్గ్‌లోని చమురు ఎగుమతి టెర్మినల్‌, రుచి చమురు నిల్వ కేంద్రంపై డ్రోన్‌ దాడులు జరగడంతో మంటలు చెలరేగాయి. రష్యాకు చెందిన రిటైల్‌ సంస్థ ఓజోన్‌ లాజిస్టిక్స్‌ కేంద్రం, టెక్నాలజీ సంస్థ వీకే డేటా సెంటర్‌పైనా దాడులు జరిగినట్లు సమాచారం. ఈ దాడులను రెండు సంస్థలూ ధ్రువీకరించాయి. సెయింట్‌ పీటర్స్‌బర్గ్‌ గవర్నర్‌ అలెగ్జాండర్‌ బెగ్లోవ్‌ ఒకరు మృతి చెందగా, ఐదుగురు గాయపడినట్లు వెల్లడించారు. మరోవైపు, ఉక్రెయిన్‌లోని దక్షిణ నగరం జపోరిజ్జియాపై రష్యా రెండు దాడులు చేసింది. ఈ ఘటనల్లో ఓ మహిళ మృతి చెందగా.. కనీసం ఇద్దరు గాయపడ్డారు. గాయపడిన వారిలో ఆరేళ్ల బాలిక కూడా ఉంది. దాడుల కారణంగా రెండు అపార్ట్‌మెంట్‌ భవనాలు, 18 కార్లు, ఓ విద్యాసంస్థ దెబ్బతిన్నాయని ప్రాంతీయ సైనిక పరిపాలన అధిపతి మిఖాయిలో సెమికిన్‌ తెలిపారు.

ఇంధన కేంద్రాలపై దాడులు నిలిపివేయాలన్న ట్రంప్‌

రష్యా, ఉక్రెయిన్‌ ఇంధన మౌలిక సదుపాయాలపై పరస్పర దాడులు నిలిపివేయడానికి అంగీకరించాయని అమెరికా అధ్యక్షుడు డొనాల్డ్‌ ట్రంప్‌ అక్టోబర్‌ 11న ప్రకటించారు. అయితే, ఈ ఒప్పందానికి సంబంధించిన వివరాలను వెల్లడించలేదు. అయినప్పటికీ ఇరు దేశాల మధ్య ఇంధన కేంద్రాలే లక్ష్యంగా దాడులు కొనసాగుతున్నాయి. మూడు రోజుల విరామం తర్వాత రష్యా చమురు కేంద్రాలపై దాడులను తిరిగి ప్రారంభించినట్లు ఉక్రెయిన్‌ గురువారం ధ్రువీకరించింది. ట్రంప్‌ ప్రకటన తర్వాతి వారంలో రష్యా తమ ఇంధన, చమురు, గ్యాస్‌ రంగాలపై 76 సార్లు దాడులు చేసిందని ఉక్రెయిన్‌ అధ్యక్షుడు వొలోదిమిర్‌ జెలెన్‌స్కీ ఆదివారం తెలిపారు. గత రాత్రి నాలుగు ప్రాంతాల్లోని ఇంధన కేంద్రాలపై దాడులు జరిగాయని, వేలాది కుటుంబాలకు ఇంకా విద్యుత్‌ సరఫరా పునరుద్ధరణ కాలేదని పేర్కొన్నారు.

రష్యాపై ఒత్తిడి పెంచాలి : జెలెన్‌స్కీ

ఉక్రెయిన్‌లో విద్యుత్‌ సరఫరాకు అంతరాయం కలిగించడమే లక్ష్యంగా రష్యా దాడులు చేస్తోందని జెలెన్‌స్కీ ఆరోపించారు. రష్యాపై ఒత్తిడిని మరింత పెంచాలని అమెరికాను కోరారు. ఆంక్షల సడలింపులు, ఒప్పందాలున్నప్పటికీ రష్యా తన వైఖరిని మార్చుకోవడం లేదని విమర్శించారు. యుద్ధం కొనసాగడానికి ఉక్రెయిన్‌ ఆత్మరక్షణ కారణం కాదని, రష్యా దూకుడు చర్యలే కారణమని పేర్కొన్నారు. శాంతి అవకాశాలు మెరుగుపడాలంటే రష్యాపై ఒత్తిడి తప్పనిసరి అని స్పష్టం చేశారు.