Nepal Helicopter Crash | ల్యాండింగ్ స‌మ‌యంలో కుప్ప‌కూలిన హెలికాప్ట‌ర్‌.. తూర్పు నేపాల్‌లో ఘ‌ట‌న‌..!

Nepal Helicopter Crash | తూర్పు నేపాల్‌లోని ఖోటాంగ్ జిల్లా ఎయిర్ డైనాస్టీకి చెందిన ఒక హెలికాప్టర్ ల్యాండింగ్ స‌మ‌యంలో కుప్ప‌కూలింది. ప్రమాదం జరిగిన సమయంలో హెలికాప్ట‌ర్‌లో పైలట్‌తో సహా ఆరుగురు ఉన్నారు. నివేదిక‌ల ప్ర‌కారం.. ఉద‌యం 11.5 గంట‌ల ప్రాంతంలో ఈ ఘ‌ట‌న జ‌రిగింది. 9ఎన్‌-ఏఎస్‌క్యూ నంబ‌ర్ గ‌ల ఎయిర్ డైనాస్టీ హెలికాప్ట‌ర్ ఖోటాంగ్ జిల్లాలో ల్యాండ్ అయ్యేందుకు ప్రయత్నిస్తుండగా అదుపు తప్పి నేల‌ను తాకింది. హెలికాప్టర్‌లో ఉన్నవారందరూ సురక్షితంగా ఉన్నారని, కేవలం ఒక వ్యక్తికి స్వల్ప గాయాలయ్యాయని ఖోటాంగ్ చీఫ్ డిస్ట్రిక్ట్ ఆఫీసర్ రేఖా కండెల్ తెలిపారు. స‌మాచారం మేర‌కు.. ల్యాండింగ్ సమయంలో బలమైన గాలులు వీస్తున్నాయి.

దుమ్ము, బలమైన గాలుల కారణంగా పైలట్ ల్యాండింగ్ చేయడానికి ఇబ్బందిప‌డ్డాడు. ఈ క్ర‌మంలోనే హెలికాప్ట‌ర్ కుప్ప‌కూలిపోయింది. పైలట్ సబిన్ థాపా హెలికాప్టర్‌ను నడుపుతున్నారు. పైలట్, ఇతర ప్రయాణికులు సురక్షితంగా ఉన్నారని హెలికాప్టర్ కంపెనీ ఒక ప్రకటనలో తెలిపింది. ఈ ప్రమాదంపై సమగ్ర దర్యాప్తునకు ఆదేశించారు. ప్రమాదం గురించి సమాచారం అందిన వెంటనే అధికారులు సహాయక చర్యలు చేపట్టారు. గాయపడిన ప్రయాణికుడిని ఆసుపత్రికి తరలించడానికి, రెస్క్యూ ఆపరేషన్లు నిర్వహించడానికి కంపెనీ రెండో హెలికాప్టర్‌ను సంఘటనా స్థలానికి పంపింది. ఇతర ప్రయాణికులను, పైలట్‌ను సురక్షిత ప్రాంతానికి తరలించారు. పోలీసులు, స్థానిక అధికారులు సంఘటనా స్థలానికి చేరుకుని పరిస్థితిని అంచనా వేశారు.

https://x.com/SmritiSharma_/status/2034181627107283247