Traffic Restrictions | హైద‌రాబాద్‌లో 3 రోజుల పాటు ట్రాఫిక్ ఆంక్ష‌లు..

Traffic Restrictions | త్రినేత్ర న్యూస్ : పీపుల్స్ ప్లాజా, గార్డెన్ పాయింట్, జ‌ల‌విహార్‌తో పాటు సంజీవ‌య్య పార్కులో కృతిమంగా ఏర్పాటు చేసిన కొల‌నుల్లో దుర్గామాత విగ్ర‌హాల నిమ‌జ్జ‌నం నేప‌థ్యంలో ట్రాఫిక్ పోలీసులు ఆంక్ష‌లు విధించారు. ఈ నెల 21 మ‌ధ్యాహ్నం 3 గంట‌ల నుంచి 24వ తేదీ తెల్ల‌వారుజామున 6 గంట‌ల వ‌ర‌కు ట్రాఫిక్ ఆంక్ష‌లు(Traffic Restrictions ) అమ‌ల్లో ఉంటాయ‌ని పోలీసులు తెలిపారు. ఈ క్ర‌మంలో వాహ‌న‌దారులు ప్ర‌త్యామ్నాయ మార్గాల‌ను ఎంపిక చేసుకోవాల‌ని పోలీసులు సూచించారు.

ట్రాఫిక్ మ‌ళ్లింపులు ఇలా..

• పంజాగుట్ట, రాజ్‌భవన్ రోడ్డు వైపు నుండి ఖైరతాబాద్ ఫ్లైఓవర్ వైపు వచ్చే ట్రాఫిక్‌ను వి.వి. విగ్రహం వద్ద నిరంకారి జంక్షన్ వైపు మళ్లిస్తారు (ఈ మార్గంలో అమ్మవారి విగ్రహాల వాహనాలకు మాత్రమే అనుమతి ఉంటుంది).
• నిరంకారి జంక్షన్ నుండి ఇక్బాల్ మినార్ వైపు వచ్చే ట్రాఫిక్‌ను పాత పీఎస్ సైఫాబాద్ వద్ద రవీంద్ర భారతి, మాసాబ్‌ట్యాంక్ వైపు మళ్లిస్తారు (ఇక్బాల్ మినార్ వైపు కేవలం అమ్మవారి విగ్రహాల వాహనాలను మాత్రమే అనుమతిస్తారు).
• ఇక్బాల్ మినార్ నుండి సెక్రటేరియట్ జంక్షన్ వైపు వచ్చే ట్రాఫిక్‌ను తెలంగాణ తల్లి ఫ్లైఓవర్ ప్రారంభం వద్ద తెలంగాణ తల్లి ఫ్లైఓవర్ మీదుగా లోయర్ ట్యాంక్ బండ్ వైపు మళ్లిస్తారు.
• ఖైరతాబాద్ బడా గణేష్ లేన్ / మింట్ కాంపౌండ్ నుండి నెక్లెస్ రోటరీ వైపు ట్రాఫిక్‌ను అనుమతించరు. ప్రింటింగ్ ప్రెస్ జంక్షన్ వద్ద మింట్ కాంపౌండ్ / రాజీవ్ గాంధీ విగ్రహం వైపు మళ్లిస్తారు.
• అప్పర్ ట్యాంక్ బండ్ నుండి సెక్రటేరియట్ జంక్షన్ వైపు వచ్చే ట్రాఫిక్‌ను పాత అంబేడ్కర్ విగ్రహం వద్ద లిబర్టీ వైపు మళ్లిస్తారు.
• లిబర్టీ నుండి సెక్రటేరియట్ జంక్షన్ వైపు వచ్చే ట్రాఫిక్‌ను అనుమతించరు. పాత అంబేడ్కర్ విగ్రహం వద్ద అప్పర్ ట్యాంక్ బండ్ వైపు మళ్లిస్తారు (పాత అంబేడ్కర్ విగ్రహం – సెక్రటేరియట్ జంక్షన్ – ఎన్టీఆర్ మార్గ్ – నెక్లెస్ రోడ్డు వైపు కేవలం అమ్మవారి విగ్రహాల వాహనాలను మాత్రమే అనుమతిస్తారు).
• అప్పర్ ట్యాంక్ నుండి నల్లగుట్ట బ్రిడ్జ్, పీవీ మార్గ్ (నెక్లెస్ రోడ్డు) వైపు వచ్చే ట్రాఫిక్‌ను సోనాబీ అబ్దుల్లా మసీదు వద్ద మినిస్టర్ రోడ్డు (కార్బాలా - రాణిగంజ్ మీదుగా) వైపు మళ్లిస్తారు.
• రాణిగంజ్ / మినిస్టర్ రోడ్డు నుండి నెక్లెస్ రోడ్డు వైపు వచ్చే ట్రాఫిక్‌ను నల్లగుట్ట 'ఎక్స్' రోడ్స్ వద్ద మినిస్టర్ రోడ్డు / రాణిగంజ్ వైపు మళ్లిస్తారు.
• తాజా ట్రాఫిక్ వివరాల కోసం మా సోషల్ మీడియా వేదికలైన హైదరాబాద్ ట్రాఫిక్ పోలీస్ ఫేస్‌బుక్ పేజీ (facebook.com/HYDTP), ఎక్స్ (ట్విట్టర్) (@HYDTP) ఖాతాలను అనుసరించండి. అత్యవసర సమయాల్లో ప్రయాణ సాయం కోసం మా ట్రాఫిక్ హెల్ప్‌లైన్ నంబర్ 9010203626 ను సంప్రదించగలరు.