Nampally Criminal Court | నాంప‌ల్లి క్రిమిన‌ల్ కోర్టులో అగ్నిప్ర‌మాదం..

Nampally Criminal Court | త్రినేత్ర‌.న్యూస్‌: హైద‌రాబాద్‌లోని (Hyderabad) నాంప‌ల్లి క్రిమిన‌ల్ కోర్టులో (Nampally Criminal Court) అగ్నిప్ర‌మాదం (Fire Accident) జ‌రిగింది. సోమ‌వారం తెల్ల‌వారుజామున కోర్డు భ‌వ‌నం మూడో అంత‌స్తులో ఒక్క‌సారిగా మంట‌లు చెల‌రేగాయి. దీంతో అప్ర‌మ‌త్త‌మైన సిబ్బంది అగ్నిమాప‌క శాఖ అధికారుల‌కు స‌మాచారం అందించారు. రెండు ఫైర్ ఇంజిన్ల‌తో ఘ‌ట‌నా స్థ‌లానికి చేరుకుని అగ్నిమాప‌క సిబ్బంది.. మంట‌ల‌ను అదుపులోకి తీసుకొచ్చారు.

సిబ్బంది వేగంగా స్పందించ‌డంతో మంట‌లు ఇత‌ర అంత‌స్తుల‌కు వ్యాపించ‌లేదు. దీంతో పెను ప్ర‌మాదం త‌ప్పింద‌ని అధికారులు వెల్ల‌డించారు. షార్ట్ స‌ర్క్యూట్ (Short Circuit) కార‌ణంగానే మంట‌లు చెల‌రేగిన‌ట్లు ప్రాథ‌మికంగా నిర్ధారించారు. అయితే మంట‌ల్లో కీల‌క‌మైన ఫైళ్లు ఎవైనా కాలిపోయాయా, జ‌రిగిన ఆస్తి న‌ష్టం గురించి ఇంకా తెలియ రాలేదు. తెల్ల‌వారుజామున ప్ర‌మాదం జ‌రగ‌డంతో ఎలాంటి ప్రాణ‌న‌ష్టం జ‌ర‌గ‌లేద‌ని అధికారులు చెప్పారు. ఈ ఘ‌ట‌న‌పై కేసు న‌మోదుచేసిన పోలీసులు ద‌ర్యాప్తు చేస్తున్నారు.