Tiger Shroff | టైగర్‌ ష్రాఫ్‌ కారుపై కాల్పులు.. బిష్ణోయ్‌ గ్యాంగ్ ప‌నే..!

Tiger Shroff | బాలీవుడ్‌ నటుడు టైగర్‌ ష్రాఫ్‌ కారుపై ముంబ‌యిలో కాల్పులు జరిగాయి. జుహు ప్రాంతంలో ఆదివారం సాయంత్రం ఫుట్‌బాల్‌ గ్రౌండ్‌ నుంచి బయలుదేరిన సమయంలో బైక్‌పై వచ్చిన ముగ్గురు దుండగులు ఆయన కారుపై కాల్పులు జరిపారు. ఈ ఘటనలో టైగర్‌ ష్రాఫ్‌ సురక్షితంగా బయటపడగా.. ఆయన డ్రైవర్‌ గాయపడ్డాడు. దాడికి తామే బాధ్యులమంటూ లారెన్స్‌ బిష్ణోయ్‌ గ్యాంగ్‌ పేరిట ఓ వీడియో సోషల్‌ మీడియాలో ప్రత్యక్షమైంది. దీంతో బాలీవుడ్‌లో కలకలం రేగింది.

సల్మాన్‌తో పనిచేస్తున్నందుకే దాడి?

వైరల్‌గా మారిన వీడియోలో అనిల్‌ పండిత్‌ అనే వ్యక్తి తాను లారెన్స్‌ బిష్ణోయ్‌కు సన్నిహితుడినని చెప్పుకున్నాడు. టైగర్‌ ష్రాఫ్‌ తమ హెచ్చరికలను పట్టించుకోకపోవడంతోనే దాడి చేసినట్లు పేర్కొన్నాడు. సల్మాన్‌ ఖాన్‌తో కలిసి పనిచేస్తున్నవారిని లక్ష్యంగా చేసుకుంటామని హెచ్చరించినట్లు వీడియోలో ఉంది. సల్మాన్‌ ఖాన్‌ క్షమాపణ చెప్పాలని, లేదంటే ఆయన కుటుంబ సభ్యులనూ విడిచిపెట్టబోమని బెదిరింపులకు దిగినట్లు తెలుస్తోంది. అయితే, ఈ వీడియోలోని వ్యక్తి లారెన్స్‌ బిష్ణోయ్‌ గ్యాంగ్‌తో సంబంధాలను పోలీసులు అధికారికంగా ధ్రువీకరించాల్సి ఉంది. వీడియో ప్రామాణికత, దాడిలో గ్యాంగ్‌ ప్రమేయంపై దర్యాప్తు కొనసాగుతోంది.

సల్మాన్‌ ఖాన్‌కు గతంలోనూ బెదిరింపులు

1998 కృష్ణజింకల వేట కేసు నేపథ్యంలో సల్మాన్‌ ఖాన్‌పై లారెన్స్‌ బిష్ణోయ్‌ పలుమార్లు బెదిరింపులకు పాల్పడ్డాడు. 2023లో జాతీయ దర్యాప్తు సంస్థ (ఎన్‌ఐఏ) వెల్లడించిన వివరాల్లోనూ సల్మాన్‌ ఖాన్‌ పేరు బిష్ణోయ్‌ లక్ష్యంగా పెట్టుకున్న ప్రముఖుల్లో ఉంది. దీంతో నటుడి భద్రతపై గతంలోనూ ఆందోళనలు వ్యక్తమయ్యాయి. 2024 అక్టోబర్‌ 12న ముంబ‌యి మాజీ మంత్రి, ఎన్సీపీ నేత బాబా సిద్ధిఖీ హత్యకు గురయ్యారు. సల్మాన్‌ ఖాన్‌తో ఆయనకున్న సన్నిహిత సంబంధాల నేపథ్యంలో ఈ హత్యకు లారెన్స్‌ బిష్ణోయ్‌ గ్యాంగ్‌ బాధ్యత వహించినట్లు ప్రకటించింది. ఈ ఘటన దేశవ్యాప్తంగా సంచలనం సృష్టించింది.

నిందితుల కోసం పోలీసుల గాలింపు

టైగర్‌ ష్రాఫ్‌ కారుపై కాల్పుల ఘటనపై ముంబ‌యి పోలీసులు దర్యాప్తు చేపట్టారు. సీసీటీవీ దృశ్యాలను పరిశీలిస్తూ దుండగుల ఆచూకీ కోసం గాలిస్తున్నారు. కాల్పుల్లో గాయపడిన డ్రైవర్‌కు చికిత్స అందిస్తున్నారు. మరో ఆటో డ్రైవర్‌ కూడా గాయపడినట్లు సమాచారం. ఈ ఘటనతో బాలీవుడ్‌ ప్రముఖుల భద్రత మరోసారి చర్చనీయాంశమైంది.