Twisha Sharma case | తెలుగు న‌టి కేసులో సుప్రీంకోర్టు కీలక ఆదేశాలు.. భోపాల్ కోర్టులో విచార‌ణ‌పై స్టే

Twisha Sharma case | తెలుగు నటి త్విషా శర్మ అనుమానాస్పద మృతి కేసులో సుప్రీంకోర్టు కీలక ఆదేశాలు జారీ చేసింది. భోపాల్‌ సెషన్స్‌ కోర్టులో కొనసాగుతున్న విచారణపై తదుపరి ఉత్తర్వులు ఇచ్చే వరకు స్టే విధించింది. కేసును ఢిల్లీకి బదిలీ చేయాలని త్విషా తండ్రి నవనిధి శర్మ దాఖలు చేసిన పిటిషన్‌పై స్పందన తెలియజేయాలని సీబీఐ, త్విషా భర్త సమర్థ్‌ సింగ్‌, అత్త గిరిబాలా సింగ్‌లకు నోటీసులు జారీ చేసింది. ఈ పిటిషన్‌పై త‌ర్వాతి విచారణను అక్టోబర్‌ 26కు వాయిదా వేసింది.

న్యాయమైన విచారణ జరగాలని పిటిషన్‌..

సుప్రీంకోర్టు ప్రధాన న్యాయమూర్తి జస్టిస్‌ సూర్యకాంత్‌, జస్టిస్‌ జోయ్‌మాల్య బాగ్చీలతో కూడిన ధర్మాసనం శుక్రవారం ఈ మేరకు ఉత్తర్వులు జారీ చేసింది. మధ్యప్రదేశ్‌లో కేసు విచారణ నిష్పక్షపాతంగా జరిగే విషయంలో ఆందోళనలు ఉన్నాయని నవనిధి శర్మ తన పిటిషన్‌లో పేర్కొన్నారు. నిందితురాలిగా ఉన్న త్విషా అత్త గిరిబాలా సింగ్‌ గతంలో జిల్లా న్యాయమూర్తిగా పనిచేశారని ప్రస్తావించారు. తాను ఢిల్లీ-ఎన్‌సీఆర్‌ ప్రాంతంలో నివసిస్తున్నందున కేసును భోపాల్‌ నుంచి ఢిల్లీలోని సంబంధిత న్యాయస్థానానికి బదిలీ చేయాలని కోరారు. పిటిషన్‌పై ప్రతివాదులు తమ సమాధానాలు దాఖలు చేసేందుకు ధర్మాసనం గడువు ఇచ్చింది.

మే 12న అనుమానాస్పద మృతి..

నోయిడాకు చెందిన మోడల్‌, టాలీవుడ్ న‌టి త్విషా శర్మ 2026 మే 12న భోపాల్‌లోని తన అత్తింట్లో అనుమానాస్పద పరిస్థితుల్లో మృతి చెందింది. ఆమె మృతిపై తల్లి తరఫు కుటుంబ సభ్యులు భర్త సమర్థ్‌ సింగ్‌, అత్తింటివారిపై వేధింపుల ఆరోపణలు చేశారు. ఈ నేపథ్యంలో పోలీసులు కేసు నమోదు చేసి ప్రత్యేక దర్యాప్తు బృందాన్ని (సిట్‌) ఏర్పాటు చేశారు. పోస్టుమార్టం నివేదికలో గాయాలు ఉన్నట్లు వెల్లడవడంతో మృతిపై కుటుంబ సభ్యులు అనుమానాలు వ్యక్తం చేశారు. నిష్పక్షపాత దర్యాప్తు జరపాలని డిమాండ్‌ చేశారు.

సీబీఐకి కేసు..

హైకోర్టు ఆదేశాల మేరకు రెండోసారి పోస్టుమార్టం నిర్వహించిన అనంతరం కేసు దర్యాప్తును సీబీఐకి అప్పగించారు. దర్యాప్తు పూర్తి చేసిన సీబీఐ.. త్విషా భర్త సమర్థ్‌ సింగ్‌, అత్త గిరిబాలా సింగ్‌లపై చార్జిషీట్‌ దాఖలు చేసింది. అందుబాటులో ఉన్న సమాచారం ప్రకారం.. త్విషా మృతిని ఆత్మహత్యగా పేర్కొంటూ వేధింపుల ఆరోపణలపైనా దర్యాప్తు చేపట్టింది. చార్జిషీట్‌ను పరిశీలించిన న్యాయస్థానం ప్రాథమికంగా నేరం జరిగినట్లు ఆధారాలు ఉన్నాయని భావించడంతో కేసు సెషన్స్‌ కోర్టుకు చేరింది. తాజాగా విచారణను ఢిల్లీకి బదిలీ చేయాలన్న పిటిషన్‌పై సుప్రీంకోర్టు ఇచ్చిన ఆదేశాలతో కేసు విచారణ స్థానం అంశం కీలక దశకు చేరింది.