OTT | తండ్రికి ఎదురుతిరిగిన సోనాక్షి – డైరెక్ట్‌గా ఓటీటీలోకి జ్యోతిక‌ బాలీవుడ్ కోర్ట్‌రూమ్ థ్రిల్ల‌ర్ మూవీ

OTT | సోనాక్షి సిన్హా, జ్యోతిక హీరోయిన్లుగా న‌టిస్తున్న బాలీవుడ్ మూవీ సిస్ట‌మ్ థియేట‌ర్ల‌ను స్కిప్ చేస్తూ నేరుగా ఓటీటీలో రిలీజ్ కాబోతుంది. కోర్ట్‌రూమ్ డ్రామాగా తెర‌కెక్కిన ఈ సినిమాకు అశ్విని అయ్య‌ర్ తివారీ ద‌ర్శ‌క‌త్వం వ‌హించారు. మే 22 నుంచి అమెజాన్ ప్రైమ్ వీడియోలో ఈ మూవీ స్ట్రీమింగ్ కాబోతుంది.

ట్రైల‌ర్ రిలీజ్‌...

మంగ‌ళ‌వారం మేక‌ర్స్ సిస్ట‌మ్ ట్రైల‌ర్‌ను రిలీజ్ చేశారు. ప‌లుకుబ‌డి, అధికారానికి... న్యాయానికి మ‌ధ్య నెల‌కొన్న సంఘ‌ర్ష‌ణ‌తో ఈ ట్రైల‌ర్ ఆస‌క్తిక‌రంగా సాగింది. పవర్ ముందు నిజం నిలబడగలదా? న్యాయం గెలుస్తుందా? అనే అంశాల‌తో పాటు ధ‌నిక పేద మ‌ధ్య అంత‌రాల‌ను, కోర్టుల్లో నిజంగా పేదోడికి న్యాయం జ‌రుగుతుందా అనే సందేశాన్ని ఈ సినిమాలో చ‌ర్చంచ‌బోతున్న‌ట్లు తెలుస్తోంది.

లాయ‌ర్‌గా సోనాక్షి...

ఇందులో నేహా అనే యువ లాయ‌ర్‌గా సోనాక్షి సిన్హా క‌నిపించ‌బోతుంది. కోర్టుల్లోని లోతుపాతుల‌న్నీ తెలిసిన స్టెనోగ్రాఫ‌ర్‌గా జ్యోతిక న‌టిస్తోంది. తండ్రి అడుగుజాడ‌ల్లోనే గొప్ప లాయ‌ర్‌గా క‌నిపించాల‌ని అనుకున్న నేహా... చివ‌ర‌కు తండ్రికే వ్య‌తిరేకంగా కోర్టులో ఎందుకు వాదించాల్సివ‌చ్చింద‌న్న‌ద‌నే అంశాల‌తో సిస్ట‌మ్ మూవీ రూపొందుతోన్న‌ట్లు తెలుస్తోంది. సిస్ట‌మ్ మూవీలో బాలీవుడ్ సీనియ‌ర్ డైరెక్ట‌ర్ అశుతోష్ గోవారిక‌ర్ కీల‌క పాత్ర‌లో క‌నిపించ‌బోతున్నారు.

గ‌తంలో డైరెక్ట‌ర్‌గా బైరెల్లీకి బ‌ర్ఫీ, పంగా, త‌ర్లా, బ‌వాల్ సినిమాలు చేసింది అశ్విని అయ్య‌ర్ తివారీ. మూడేళ్ల గ్యాప్ త‌ర్వాత బాలీవుడ్‌లోకి డైరెక్ట‌ర్‌గా రీఎంట్రీ ఇవ్వ‌బోతుంది.రెండేళ్ల క్రితం రిలీజైన సైతాన్‌తో యాక్ట‌ర్‌గా బాలీవుడ్‌లోకి రీఎంట్రీ ఇచ్చింది జ్యోతిక‌. శ్రీకాంత్‌తో పాటు డ‌బ్బా కార్టెల్ అనే వెబ్ సిరీస్‌లోనూ న‌టించింది.