Riteish Deshmukh | తెలుగు సినిమాలో జెనీలియా భ‌ర్త – రామ్ కోసం విల‌న్‌గా మారిన బాలీవుడ్ హీరో

Riteish Deshmukh |  బొమ్మ‌రిల్లు, స‌త్యం, సై సినిమాల‌తో హీరోయిన్‌గా తెలుగు ప్రేక్ష‌కుల‌ను మెప్పించింది జెనీలియా. ఒకానొక ద‌శ‌లో టాప్ హీరోయిన్ అవుతుంద‌ని అంతా అనుకున్నారు. కానీ బాలీవుడ్ హీరో రితేష్ దేశ్‌ముఖ్‌ను పెళ్లి చేసుకొని సినిమాల‌కు దూరమైంది. తాజాగా జెనీలియా భ‌ర్త రితేష్ దేశ్‌ముఖ్ తెలుగులో ఓ సినిమా చేయ‌బోతున్నాడు. విల‌న్ రోల్‌లో టాలీవుడ్‌లోకి ఎంట్రీ ఇస్తున్నాడు.

డైరెక్ట‌ర్‌గా రామ్‌...

టాలీవుడ్ హీరో రామ్ పోతినేని డైరెక్ట‌ర్‌గా మారి ఓ సైక‌లాజిక‌ల్ థ్రిల్ల‌ర్ సినిమాను తెర‌కెక్కిస్తోన్నారు. ఇందులో ఆయ‌నే హీరోగా క‌నిపించ‌బోతున్నారు. ఈ సినిమాలో విల‌న్‌గా రితేష్ దేశ్‌ముఖ్ క‌నిపించ‌బోతున్నాడు. సోమ‌వారం ఈ బాలీవుడ్ హీరో రామ్ మూవీ సెట్స్‌లో అడుగుపెట్టారు. ఈ సంద‌ర్భంగా మేక‌ర్స్ ఓ స్పెష‌ల్ వీడియోను రిలీజ్ చేశారు. నేటి నుంచి కొత్త షెడ్యూల్ మొద‌లైన‌ట్లు ప్ర‌క‌టించారు. పాత‌కాలం నాటి బిల్డింగ్‌లో షూటింగ్ జ‌రుగుతోన్న‌ట్లు ఈ వీడియోలో చూపించారు.

వంద కోట్ల బ‌డ్జెట్‌...

రితేష్‌, జెనీలియా ఫ్యామిలీతో రామ్‌కు చ‌క్క‌టి స్నేహం ఉంది. రామ్‌, జెనీలియా క‌లిసి రెడీ సినిమాలో న‌టించారు. ఆ స్నేహ‌బంధంతోనే రామ్ డైరెక్ష‌న‌ల్ డెబ్యూ మూవీలో న‌టించ‌డానికి రితేష్ ఒప్పుకున్న‌ట్లు స‌మాచారం. ఈ సినిమాను రామ్ సోద‌రుడు కృష్ణ‌చైత‌న్య నిర్మిస్తున్నారు. దాదాపు వంద కోట్ల బ‌డ్జెట్‌తో ఈ మూవీ రూపొందుతోన్న‌ట్లు స‌మాచారం.

సంయుక్త హీరోయిన్‌...

ఈ సినిమాలో సంయుక్త మీన‌న్ హీరోయిన్‌గా న‌టిస్తోంది. రామ్ హీరోగా న‌టిస్తోన్న 23వ సినిమా ఇది. సామ్ సీఎస్ మ్యూజిక్ అందిస్తున్నారు.