Ashika Ranganath | మెగాస్టార్‌ సినిమాలో అవకాశం.. ఆషిక ఆశలన్నీ ‘విశ్వంభర’పైనే!

Ashika Ranganath | సినీ రంగంలో ఒక్కో అవకాశం ఒక్కో మలుపును తీసుకొస్తుంది. ముఖ్యంగా స్టార్‌ హీరోల సినిమాల్లో భాగమయ్యే అవకాశం కథానాయికల కెరీర్‌కు ప్రత్యేక గుర్తింపును తీసుకొస్తుంది. మెగాస్టార్‌ చిరంజీవి సరసన నటించే అవకాశం రావడం ఏ కథానాయికకైనా ప్రత్యేకమే. కన్నడ నటి ఆషిక రంగనాథ్‌ కూడా అలాంటి అవకాశాన్ని అందుకుంది. చిరంజీవి కథానాయకుడిగా తెరకెక్కుతున్న భారీ ఫాంటసీ చిత్రం ‘విశ్వంభర’లో కీలక పాత్రకు ఎంపికైన ఆమె.. ఈ సినిమా తన తెలుగు కెరీర్‌కు మరింత ఊతమిస్తుందని భావిస్తోంది. ‘విశ్వంభర’లో త్రిష కథానాయికగా నటిస్తుండగా.. ఆషిక రంగనాథ్‌ కీలక పాత్రలో కనిపించనుంది. రెండో కథానాయికగా ఆమె పాత్రకు కథలో ప్రాధాన్యం ఉంటుందని చిత్ర వర్గాలు చెబుతున్నాయి.

ఇప్పటికే చిత్రీకరణ పూర్తయిన ఈ సినిమా విడుదల కోసం ప్రేక్షకులు ఆసక్తిగా ఎదురుచూస్తున్నారు. అయితే, పలు కారణాలతో సినిమా విడుదల ఆలస్యమవుతూ వస్తోంది. దీంతో ఈ ప్రాజెక్ట్‌ కోసం ఆషికతో పాటు అభిమానులుఎదురుచూస్తున్నారు. తెలుగు చిత్ర పరిశ్రమలో తనకంటూ ప్రత్యేక గుర్తింపు తెచ్చుకోవాలని ప్రయత్నిస్తున్న ఆషికకు ‘విశ్వంభర’ కీలక చిత్రంగా మారింది. చిరంజీవి వంటి అగ్ర కథానాయకుడితో కలిసి నటించిన ఈ సినిమా ద్వారా తన నటనకు మరింత గుర్తింపు వస్తుందని ఆమె ఆశిస్తోంది. ఇదిలా ఉండగా, ‘విశ్వంభర’ ఆలస్యమవుతున్న సమయంలో ఆషిక రవితేజ సరసన ‘భర్త మహాశయులకు విజ్ఞప్తి’ చిత్రంలో నటించింది. ఈ సినిమా ద్వారా తెలుగు ప్రేక్షకులకు మరింత చేరువైంది. అయితే, ఆమె కెరీర్‌లో పెద్ద స్థాయి గుర్తింపు తీసుకురాగల అవకాశంగా ‘విశ్వంభర’ను సినీ వర్గాలు భావిస్తున్నాయి. కన్నడ చిత్ర పరిశ్రమ నుంచి వచ్చిన ఆషిక రంగనాథ్‌.. తక్కువ సమయంలోనే దక్షిణాదిలో మంచి గుర్తింపు తెచ్చుకుంది.

2016లో ‘క్రేజీ బాయ్‌’ చిత్రంతో కథానాయికగా పరిచయమైన ఆమె.. ఆ తర్వాత కన్నడలో పలు విజయవంతమైన చిత్రాల్లో నటించింది. ‘రాంబో 2’, ‘రాజు కన్నడ మీడియం’, ‘మధగజ’ వంటి సినిమాలు ఆమెకు గుర్తింపు తీసుకొచ్చాయి. విభిన్న పాత్రలు ఎంచుకుంటూ దక్షిణాది ప్రేక్షకుల్లో తనకంటూ ప్రత్యేక స్థానాన్ని సంపాదించుకుంది. తెలుగులో నాగార్జున, నాగచైతన్య నటించిన ‘బంగార్రాజు’ చిత్రంతో అడుగుపెట్టిన ఆషిక.. తొలి సినిమాతోనే ప్రేక్షకుల దృష్టిని ఆకర్షించింది. ఆ తర్వాత కల్యాణ్‌రామ్‌ కథానాయకుడిగా నటించిన ‘అమిగోస్‌’లో కనిపించింది. నటనకు ప్రాధాన్యం ఉన్న పాత్రలను ఎంచుకుంటూ టాలీవుడ్‌లో తన స్థానాన్ని బలపరుచుకునే ప్రయత్నం చేస్తోంది. ప్రస్తుతం ఆషికకు తెలుగు, తమిళ భాషల్లో అవకాశాలు వస్తున్నాయి. చిరంజీవితో కలిసి నటించిన ‘విశ్వంభర’ విజయం సాధిస్తే.. టాలీవుడ్‌లో ఆమెకు మరిన్ని అవకాశాలు వచ్చే అవకాశం ఉంది. మరోవైపు తమిళంలో కార్తీ సరసన ‘సర్దార్‌ 2’లోనూ నటిస్తోంది. ఇప్పటివరకు వచ్చిన అవకాశాలను అందిపుచ్చుకుంటూ ముందుకు సాగుతున్న ఆషికకు.. ‘విశ్వంభర’ కెరీర్‌లో ఎంతటి మైలురాయిగా నిలుస్తుందన్నది ఆసక్తికరంగా మారింది.