Chariot Festival | స్వర్ణరథంపై శ్రీనివాసుడి ద‌ర్శ‌నం.. గోవింద నామస్మరణలతో మార్మోగిన తిరుమాడ వీధులు

Chariot Festival | కలియుగ ప్రత్యక్ష దైవం శ్రీ వేంకటేశ్వరస్వామివారి నవరాత్రి బ్రహ్మోత్సవాల్లో భాగంగా సోమవారం స్వర్ణరథోత్సవం కన్నులపండువగా జరిగింది. ఎనిమిదో రోజు ఉదయం శ్రీదేవి, భూదేవి సమేతంగా శ్రీ మలయప్పస్వామివారు బంగారు రథంపై తిరుమాడ వీధుల్లో విహరించారు. ఉదయం 7 గంటలకు ప్రారంభమైన ఈ వేడుకలో స్వర్ణకాంతులతో మెరిసిన రథంపై స్వామివారు భక్తులకు అభయమిస్తూ దర్శనమిచ్చారు. మంగళవాయిద్యాల మధుర ధ్వనులు, భక్తుల గోవింద నామస్మరణల మధ్య తిరుమల పురవీధులు ఆధ్యాత్మిక శోభను సంతరించుకున్నాయి.

మహిళల భాగస్వామ్యంతో వైభవం

స్వర్ణరథోత్సవాన్ని తిలకించేందుకు భక్తులు పెద్ద సంఖ్యలో తిరుమాడ వీధులకు చేరుకున్నారు. ముఖ్యంగా మహిళలు విశేష సంఖ్యలో పాల్గొని భక్తిప్రపత్తులతో స్వర్ణరథాన్ని లాగారు. బంగారు తేరుపై కొలువుదీరిన శ్రీదేవి, భూదేవి సమేత మలయప్పస్వామివారి దివ్యమంగళ స్వరూపాన్ని దర్శించుకున్న భక్తులు పులకించిపోయారు. అడుగడుగునా గోవింద నామస్మరణలు చేస్తూ స్వామివారికి భక్తితో నీరాజనాలు పలికారు.

సకల శుభాలు కలుగుతాయని విశ్వాసం

స్వర్ణరథంపై శ్రీనివాసుడిని దర్శించుకోవడం సకల శుభప్రదమని భక్తుల నమ్మకం. శ్రీ మహాలక్ష్మీదేవి అనుగ్రహంతో సంపదలు, భోగభాగ్యాలు సిద్ధిస్తాయని, భూదేవి కరుణతో ధాన్యసంపదలు వృద్ధి చెందుతాయని భక్తులు విశ్వసిస్తారు. శ్రీ వేంకటేశ్వరస్వామివారి కృపతో సుఖసంతోషాలు, శుభాలు కలుగుతాయని ప్రగాఢంగా నమ్ముతారు. ఈ నేపథ్యంలో స్వర్ణరథంపై స్వామివారి దర్శనం భక్తులకు ఆధ్యాత్మిక అనుభూతిని, ఆనందాన్ని అందించింది. స్వర్ణరథోత్సవంలో తిరుమల పెద్దజీయర్ స్వామి, చిన్నజీయర్ స్వామి, టీటీడీ ఈవో ముద్దాడ రవిచంద్ర, అదనపు ఈవో సీహెచ్‌ వెంకయ్య చౌదరి, బోర్డు సభ్యులు పనబాక లక్ష్మి, నన్నపనేని సదాశివరావు, సీవీఎస్వో మురళీకృష్ణతో పాటు పలువురు అధికారులు పాల్గొన్నారు.