BHEL | నాలుగో త్రైమాసికంలో BHEL గ‌ణ‌నీయ‌మైన వృద్ధి.. భారీగా పెరిగిన షేర్ ధ‌ర‌..

BHEL | ప్ర‌భుత్వ రంగ సంస్థ భార‌త్ హెవీ ఎల‌క్ట్రిక‌ల్స్ లిమిటెడ్ (BHEL) త‌న నాలుగో త్రైమాసిక ఫ‌లితాల్లో గ‌ణనీయ‌మైన వృద్ధిని సాధించింది. సోమ‌వారం ప్ర‌క‌టించిన ఈ ఫ‌లితాలు పెట్టుబ‌డిదారుల‌ను ఆక‌ట్టుకున్నాయి. కంపెనీ సమీకృత లాభం సంవత్సరానికోసారి (YoY) 156 శాతం పెరిగి దాదాపు మూడు రెట్లు ఎగిసి రూ.1,290.47 కోట్లకు చేరుకుంది. గత ఆర్థిక సంవత్సరం ఇదే కాలంలో లాభం రూ.504.45 కోట్లు మాత్రమే కావడం గ‌మ‌నార్హం. అసాధారణ అంశాలు, పన్నుల ముందు లాభం రూ.1,710.81 కోట్లుగా నమోదై, గతేడాది రూ.694.50 కోట్లతో పోలిస్తే 146 శాతం పెరుగుదల సాధించింది. ఆపరేషన్ల నుంచి వచ్చిన ఆదాయం కూడా గణనీయంగా పెరిగింది. నాలుగో త్రైమాసికంలో ఆదాయం ఏకంగా 37 శాతం పెరిగి రూ.2,310.37 కోట్లకు చేరుకుంది. గతేడాది ఇదే కాలంలో ఇది రూ.8,993.37 కోట్లుగానే ఉంది.

బ‌లంగా పెరిగిన ఈబీఐటీడీఏ..

ఈబీఐటీడీఏ కూడా బలంగా పెరిగి 103 శాతం YoY వృద్ధితో రూ.2,013 కోట్లకు చేరుకుంది. గత సంవత్సరం ఇదే కాలంలో ఇది రూ.991 కోట్లుగా ఉంది. ఈ త్రైమాసికంలో ఈబీఐటీడీఏ మార్జిన్ 16.35 శాతం ఉండగా, గతేడాది 11.02 శాతంతో పోలిస్తే 533 బేసిస్ పాయింట్లు పెరిగింది. అయితే కంపెనీ ఖర్చులు కూడా పెరిగాయి. మొత్తం వ్యయాలు 28.3 శాతం పెరిగి రూ.10,842.69 కోట్లకు చేరుకోగా, గతేడాది ఇదే కాలంలో అవి రూ.8,448.14 కోట్లుగా ఉన్నాయి. డివిడెండ్ విషయంలో కూడా బీహెచ్ఈఎల్ షేర్‌హోల్డర్లకు శుభవార్త చెప్పింది. ఫైనాన్షియల్ ఇయర్ 2026 కోసం ఒక్కో రూ.2 ముఖ విలువ గల షేర్‌పై రూ.1.40 ఫైనల్ డివిడెండ్‌ను బోర్డు సిఫార్సు చేసింది. ఈ మొత్తాన్ని వార్షిక సర్వసభ్య సమావేశం తర్వాత 30 రోజుల్లో చెల్లించనుంది.

52 వారాల గ‌రిష్టాన్ని తాకిన షేర్ ధ‌ర‌..

2026 మొత్తం ఆర్థిక‌ సంవత్సరానికి బీహెచ్ఈఎల్ లాభం 200 శాతం పెరిగి మూడు రెట్లు ఎగిసి రూ.1,600.26 కోట్లకు చేరుకుంది. గత సంవత్సరం ఇది రూ.533.90 కోట్లుగానే ఉంది. ఆదాయం కూడా 19 శాతం వృద్ధితో రూ.33,782.18 కోట్లకు పెరిగింది. 2025 ఆర్థిక సంవ‌త్స‌రంలో ఇది రూ.28,339.48 కోట్లుగా ఉంది. కంపెనీ సమర్పించిన ఎక్స్చేంజ్ ఫైలింగ్ ప్రకారం, బీహెచ్ఈఎల్‌కు అనుబంధంగా ఉన్న జాయింట్ వెంచర్లలో బీహెచ్ఈఎల్‌-జీఈ గ్యాస్ ట‌ర్బైన్ స‌ర్వీసెస్ ప్రైవేట్ లిమిటెడ్‌, రాయ‌చూర్ ప‌వ‌ర్ కార్పొరేష‌న్ లిమిటెడ్‌, ఎన్టీపీసీ-బీహెచ్ఈఎల్ ప‌వ‌ర్ ప్రాజెక్ట్స్ ప్రైవేట్ లిమిటెడ్‌, భార‌త్ కోల్ గ్యాసిఫికేష‌న్ అండ్ కెమిక‌ల్స్ లిమిటెడ్ ఉన్నాయి. బలమైన ఫలితాల నేపథ్యంలో బీహెచ్ఈఎల్ షేర్ ధరలు కూడా గణనీయంగా పెరిగాయి. సోమవారం బీఎస్ఈలో ఈ స్టాక్ 13 శాతానికి పైగా పెరిగి రూ.398.90 వద్ద 52 వారాల గరిష్టాన్ని తాకింది.

లాభాలు, ఆదాయం, ఈబీఐటీడీఏ ప్రధాన సూచీలు బలంగా పెరగడం బీహెచ్ఈఎల్ పనితీరును ప్రతిబింబిస్తోంది. బలమైన ఫండమెంటల్స్, మార్కెట్ విశ్వాసం కారణంగా ఈ పీఎస్‌యూ స్టాక్ అంద‌రి దృష్టిని ఆకర్షిస్తోంది. అయితే స్టాక్ మార్కెట్‌లో పెట్టుబ‌డులు పెట్టేముందు నిపుణుల స‌ల‌హాల‌ను తీసుకోవ‌డం మంచిది.