POCSO Case | బాలిక‌పై లైంగిక దాడి.. ఆపై అపార్ట్‌మెంట్ పైనుంచి తోసేసిన నిందితుడు

• ఖ‌మ్మంలో ఆల‌స్యంగా వెలుగులోకి ఘ‌ట‌న‌

POCSO Case | త్రినేత్ర‌.న్యూస్‌: ఖ‌మ్మం న‌గ‌రంలో దారుణం జ‌రిగింది. ఓ కామాంధుడు బాలిక‌పై లైంగిక దాడికి య‌త్నించిన ఘ‌ట‌న ఆల‌స్యంగా వెలుగులోకి వ‌చ్చింది. న‌గ‌రానికి చెందిన 12 ఏండ్ల బాలిక‌పై ఆ కిరాత‌కుడు ఈ దారుణానికి ఒడిగ‌ట్ట‌గా బాధితురాలు కేక‌లు వేసింది. దీంతో అపార్ట్‌మెంట్‌పై నుంచి కింద‌కు తోసేసి పరార‌య్యాడు.

పోలీసుల ప్రకారం వివ‌రాలిలా ఉన్నాయి. ఖమ్మం రెండో పట్టణ పోలీస్‌ స్టేషన్‌ పరిధిలోని ఓ అపార్ట్‌మెంట్‌ వద్ద ఓ కుటుంబం కాపలా ఉంటూ జీవ‌నం సాగిస్తున్నారు. వారికి 12 ఏండ్ల కుమార్తె ఉంది. ఈనెల 6న (శ‌నివారం) ఎవ‌రూ లేని స‌మ‌యం చూసి వారి కుమార్తెపై అదే అపార్ట్‌మెంట్‌లో ఉంటున్న వ్యక్తి లైంగిక దాడికి యత్నించాడు. దీంతో ఆ బాలిక భయపడిన కేకలు వేసింది. అంత‌టితో ఆగ‌కుండా కిరాత‌కుడు అపార్ట్‌మెంట్‌పై నుంచి బాలిక‌ను కిందకు తోసేయ‌డంతో ఆమె వెన్నెముఖ, పక్కటెముకలకు తీవ్ర గాయాలయ్యాయి. బాధితురాలిని ఖమ్మంలోని ఓ ప్రైవేటు ఆసుపత్రికి తరలించి చికిత్స అందిస్తున్నారు. బాలిక తల్లిదండ్రుల ఫిర్యాదు మేరకు నిందితుడిపై పోక్సో కేసు నమోదు చేసి ద‌ర్యాప్తు చేస్తున్న‌ట్లు పోలీసులు తెలిపారు.