Google Playstore | ప్లే స్టోర్‌లో యాప్ మాయం అయితే వెంటనే అలర్ట్.. త్వ‌ర‌లో ఆండ్రాయిడ్ ఫోన్ల‌లో కొత్త ఫీచ‌ర్‌..

Google Playstore | ఆండ్రాయిడ్ యూజర్ల కోసం గూగుల్ త్వరలో కొత్త ఫీచర్ తీసుకురానుంది. ఇప్పటికే ఇన్‌స్టాల్ చేసిన యాప్‌లు గూగుల్ ప్లే స్టోర్ నుంచి తొలగించబడితే, అలాగే వాటికి ఇకపై అప్‌డేట్లు రాకపోతే యూజర్లకు నోటిఫికేషన్ పంపించే సిస్టమ్‌పై కంపెనీ పని చేస్తున్నట్లు తెలుస్తోంది. ఈ వివరాలను ఆండ్రాయిడ్ అథారిటీ వెల్ల‌డించింది. ఈ మేర‌కు ఆ సైట్ తాజాగా ఏపీకే టియర్‌డౌన్ రిపోర్ట్‌ను ప్ర‌వేశ‌పెట్టింది. అందులోనే ఆయా వివ‌రాల‌ను తెలియ‌జేసింది. ఈ ఫీచర్‌కు సంబంధించిన కోడ్ ప్లే స్టోర్ వర్షన్ 51.4.19లో కనిపించినట్లు రిపోర్ట్ తెలిపింది. ప్రస్తుతం ఏదైనా యాప్ ప్లే స్టోర్ నుంచి తొలగించబడితే, యూజర్లకు ఎలాంటి సమాచారం అందదు. సాధారణంగా కొత్త ఫోన్‌కు మారినప్పుడు, యాప్‌ను మళ్లీ ఇన్‌స్టాల్ చేయాలనుకున్నప్పుడు లేదా బయటి రిపోర్టుల ద్వారా మాత్రమే ఆ విషయం తెలిసే పరిస్థితి ఉంది.

యాప్‌ను తీసేస్తే అలర్ట్ ఇస్తారు..

ఇప్పటివరకు గూగుల్ ప్లే ప్రొటెక్ట్ కేవలం హానికర ప్రవర్తన లేదా తీవ్రమైన పాలసీ ఉల్లంఘనలతో గుర్తించిన యాప్‌లపై మాత్రమే అలర్ట్‌లు ఇస్తోంది. కానీ డెవలపర్ స్వయంగా యాప్ తొలగించడం, పాలసీ మార్పులు, కంప్లయన్స్ అప్‌డేట్లు వంటి సెక్యూరిటీకి సంబంధం లేని కారణాలతో యాప్ డీలిస్ట్ అయితే, ఇప్పటికే ఆ యాప్ వాడుతున్న వారికి ఎలాంటి నోటిఫికేషన్ ఉండదు. కొత్త ఫీచర్ అమల్లోకి వస్తే, ప్లే స్టోర్ నుంచి తొలగించబడిన యాప్ ఇకపై అప్‌డేట్లు అందుకోదని యూజర్లకు స్పష్టమైన అలర్ట్ వస్తుంది. ఒకేసారి పలు యాప్‌లకు సంబంధించిన సమాచారం కూడా చూపించే అవకాశం ఉందని రిపోర్ట్ చెబుతోంది. దీంతో యాప్ సపోర్ట్ పరిస్థితిపై యూజర్లకు మరింత క్లారిటీ లభించనుంది.

అయితే ఈ ఫీచర్‌పై ఇప్పటివరకు అధికారిక ప్రకటన వెలువడలేదు. ప్రస్తుతం ఇది టియర్‌డౌన్ కోడ్‌లో మాత్రమే కనిపించిందని, అధికారిక విడుదలకు ముందు మార్పులు జరిగే అవకాశం ఉందని తెలుస్తోంది.